Pathienin Edom a hremna
35
1 LALPA thu chu ka kuomah a hung tlung a. 2 “Mihriem naupa, Seir tlang hmason la, a chungthu ding hieng hin hrilpêk rawh: 3 ‘Lalpa PATHIEN chun hieng hin a tih: Seir tlang, nang hi ka khing che a, i chungah kut inlet ka ta, hmun rausanah siem ka ti che. 4 I khawpuihai intlûk ramtir vong ka ta, rausanin um i ta, chu pha chun LALPA chu ka nih ti hung hre tang i tih.5 “Tiena i lungintarna kha la pâi zingin, Israelhai ngirhmun siet lai, hremna vawrtawp an hmasuon lai khan kawlhnâmin i lo bei lem a. 6 Chuleiin, thisen kutah inhlàn ka ti che a, chu chun hnot thlûr a ti che ti hi kei, Lalpa PATHIEN hring zing hin ka hril a nih. Thisen insuo i châk a, thisen chun hnot thlûr a ti che. 7 Seir tlang chu ram se trâwngah siem ka ta, a fe le hunghai khom suktawp vong ka tih. 8 I tlanghai chu mithi ruongin suksip ka ta, i muol hai, phai hai le ruom haia chun kawlhnâma an thathai ruong inhlum rem rum a tih. 9 Rausan ram ni song i ta, i khawpuihai chu hluo ni ta naw ni hai. Chu phâ chun kei hi LALPA chu ka nih ti hung hre tang i tih.
10 Kei LALPA hi ka um zinga chu, ‘Hieng hnam pahnihai le ram pahnihai hi kan ta hung ning an ta, nei kan tih’ tia i hril leiin, 11 anni hi theida a, an chungah lungsen a, an ram i’n hnar ang char hin i chungah thaw veng ka ta, i chungthu ka rĕl pha chu keima hi an kuomah inhriettir ka tih ti hi kei Lalpa PATHIEN hring zing hin ka hril a nih. 12 Israel tlanghai diriem khum a, “Sukramin a um ta a, dol el dingin kan kuomah pĕkin a um tah” i tihai po po kha kei LALPA hin ka lo hriet vong a nih ti, chu pha chun hre tang i tih. 13 I mi uongkhum a, insûm der loa i mi trong khumhai kha ka hriet vong. 14 Hnuoi pumpui lawmah sukram ka ti che ti hi Lalpa PATHIEN hril a nih. 15 Israel sungkuohai rochan ram sukrama a um khan i hlim hle a, chuong ang char chun thaw veng ka ti che. Aw nang Seir tlang, Edom ram po po leh sukram ka ti che. Chu pha chun LALPA chu ka nih ti hung hre tang an tih.