Israel vêngtu berampuhai
34
1 LALPA thu chu ka kuomah a hung tlung a. 2 “Mihriem naupa, Israelhai vĕngtu berampuhai chungthu chu an kuomah hieng ang hin hril rawh: ‘Lalpa PATHIEN chun hieng hin a tih: Israelhai vĕngtu berampuhai, mani chauh inngaisaktuhai chung chu a pik! Berampuhai chun beram ruol in ngaisak lem ding a ni naw am a ni? 3 An nenetui khal in fak a, an hmulin in inthuom lum a, a thâu thâu in that a, sienkhom beram ruol chu in enkol si nawh. 4 Chauhai in sukhrăt naw a, natna neihai in enkol naw a, hliem tuorhai in tuompek naw a, pêt hmanghai in thruoi kir naw a, inhmanghai in zong bok nawh. Khauh tak le râwng takin an chungah lal in hrot a. 5 Berampu an um naw leiin sukdarin an um a, an indar chu ramsa kolhai bu remchângah an inchang a. 6 Ka beramhai chu tlang tin le muol tinah an indar a, hnuoi hmun tinah an invăk dar a, zongtu le enkaitu tu khom an um nawh’ tiin hril rawh” a ta.7 “Chuleiin, nangni berampuhai, LALPA thu hi ngaithla ro. 8 Ka beramhaiin berampu an nei naw leiin suomin an um a, ramsa kolhai bu an inchang a; ka berampuhaiin ka beramhai chu an zong naw a, beram ruol nekin anni hmakhuo chauh an ngaituo lem a nih ti hi kei Lalpa PATHIEN HRING hin ka hming meu salin ka hril a nih. 9 Chuleiin, aw berampuhai, LALPA thu hi lo ngaithla ro: 10 Lalpa PATHIEN chun hieng hin a tih: Berampuhai chu khing ka ta, ka beramhai maw chu anni inphurtir ka tih. Beram vêngtu an nina chu suktawp ka ta, mani inchawmnan hmang thei ta naw ni hai. An băua inthokin ka beramhai chu inchu thlapêk ka ta, an ta dinga bu ni ta naw ni hai’ tiin.
Berampu thra
11 “Lalpa PATHIEN chun hieng hin a tih: ‘Keima ngeiin ka beramhai chu zong suok ka ta, enkol tawl ka tih. 12 Berampuin a beram tla darhai enkola a umpui angin ka beramhai chu enkol ka ta, sûmpui zing le thim hnuoia khom ka beramhai chu an tlat darna hmuna inthokin san suok ka tih. 13 Hnam tin laia inthokin la suok ka ta, ram tina inthokin hung thruoi khâwm ka ta, an ramah hung thruoi kîr ka ta, Israel tlâng le ruom le a rama umhmun an khuorna hmuna hai chun intlattir ka tih. 14 Hlo thratna hmuna hai thruoi ka ta, Israel tlâng sanghai chu an tlatna hmun ni’ng a tih. Chuong tlatna hmun inhoia chun bok an ta, Israel tlanga hlo thrâ thrahai chun inchawm an tih. 15 Keima ngeiin ka beramhai chu enkol ka ta, inboktir ka tih ti hi Lalpa PATHIEN thu suok a nih. 16 Beram inhmanghai chu zong ka ta, a pêt hmanghai chu hung thruoi kîr ka tih. Hliem tuokhai tuompek ka ta, a chăuhai chu sukhrât ka ta, a thâuhai le a hrâthai chu sukbo ka ta, beram ruol chu indik takin enkol ka tih.
17 “Nangni ka beram ruolhai chungthuah, Lalpa PATHIEN chun hieng hin a tih: Ka beramhai inkàr thu chu rêlpêk ka ta, beramchal le kelchal inkàr thuhai khom. 18 Tlatna hmun thraa tlat hi in ta dingin a hun tawk an naw maw? Ieng leiin am tlatna hmun thra danghai chu kein in chìl siet ding a na? Tui inthieng in dawn hi a hun tawk an naw maw? Ieng leiin am tuikhur danghai chu kein in pal nù ding a na? 19 Ka beram ruolhai chun kea in sir sop hnung hlo chu petin, in pal nù ta hnung tui bal chu an dawn ding am a ni?
20 “Chuleiin, Lalpa PATHIEN chun an kuomah hieng hin a tih: Ngai ro, keima ngeiin beram thâu le beram chêr inkàr thu chu rêl ka tih. 21 A hrât nawhai chu in nàk le in dàrin in nĕk a, in kiin in phir a, in sik dar hlak. 22 Kei ruok chun ka beram ruolhai chu hum ka ta, tu khomin suom ta naw ni hai. Beram le beram inkâr chungthu chu keiman rêl ka tih. 23 Anni enkoltu dingin berampu pakhat, ka siehlaw Davida chu sieng ka ta, ama chun enkol a ta, an vêngtu ning a ta, anni chu chawm a tih. 24 Kei LALPA hi an Pathien ning ka ta, ka siehlaw Davida chu an chunga hotu ning a tih ti hi kei LALPA thu suok chu a nih.
25 “Chun, anni leh inremna thuthlung siem ka ta, sakolhai chu a rama inthokin sukbo ka ta, thlalĕra hai khom him takin chêng an ta, ramngaw hnuoia khom ngaingam takin in bor bor thei tang an tih. 26 Anni chu mal sawm ka ta, an vêla tlanghai khom mal sawm bok ka tih. A hun takah ruo insurtir ka ta, malsawmna ruopui sûr a tih. 27 Rama thinghai chun ra insuong an ta, hnuoiin ra insuong a ta, a rama chênghai chu him an tih. An ringkolhai suktliekpek a, bawia siemtuhai kuta inthoka ka san suok tawl pha chun kei hi LALPA chu ka nih ti hung hre tang an tih. 28 Hnam danghaiin rok ta naw ni hai a, ramsa kolhaiin sè ta bok naw ni hai a, him takin khawsang an ta, tu khomin suktri ta naw ni hai. 29 Thlai thratna hmuna mi hril chu pêng ka ta, a ram sungah trăm tuor ta naw ni hai a, hnam danghai hmusitna tuor ta bok naw ni hai. 30 Chu pha chun kei, LALPA an Pathien hi an kuomah ka um ti le Israel sungkuo hi ka mihai an nih ti hung hre tang an tih ti hi Lalpa PATHIEN thu suok a nih. 31 Nangni ka beramhai, ka ran tlatna hmuna beramhai hi ka mihai chu in na, keima hi in Pathien chu ka nih’ ti hi Lalpa PATHIEN thu suok a nih” tiin.