Pathienin vêngtuah Ezekiel a ruot
33
1 LALPA thu chu ka kuomah a hung tlung a. 2 “Mihriem naupa, i hnam chanpuihai kuomah hieng hin thu hril rawh: ‘Ram chungah kawlhnâm ka hung inlèngtir pha leh, mipuihaiin anni laia mi pakhat thlang suokin vengtuah sieng an ta, 3 a ram laka kawlhnâm a hung inlĕng ti a hmu pha leh ama chun mipui inralringna dingin tawtawrawt mût a ta, 4 tu khom tawtawrawt ri chu hrea, poisa nawtu chu kawlhnâm leia a hringna a chàn a ni chun a thisen maw chu ama lu chungah tlâng a tih. 5 Tawtawrawt ri chu a hriet a, a poisak naw leiin a thisen maw chu amain a phur a nih. Poisa sien chu a hringna hum a tih. 6 Amiruokchu, vêngtu chun kawlhnâm hung inlĕng chu a hmu a, mipuihai inralring theina dingin tawtawrawt a mût si naw chun, kawlhnâm leiin mi pakhat khomin a hringna lo chàn sien, chu mi chu vêngtu suol leia thiah ngai ka ta, a thisen phuba chu vêngtu laka chun la’ng ka tih.7 “Chuong ang chun nang mihriem naupa, Israel sungkuo ta dingin vêngtuah ka siem che a, chuleiin ka băua thu suok hi ngaithla la, keima laka an inralring dan ding chu hril tawl rawh. 8 Chun, keiin mi rilo kuomah, ‘Aw mi rilo, thi ngei ngei i tih’ ka ta, mi rilo chu a lampui maksan dinga i hril naw chun mi rilo chu a suolnaah thi’ng a ta, a thisen phuba chu i lakah la’ng ka tih. 9 Amiruokchu, mi rilo chu a um dan maksan dingin i hril a, a maksan si naw chun a suolnaah thi’ng a ta, nang ruok chun i nun i humhim ni’ng a tih.
Mani senga mawphurna
10 “Chun, mihriem naupa, Israel sungkuohai kuomah hieng hin hril rawh: ‘Ei bawsietnahai le suolnahai chun an mi del a, chuonghai lei chun ei ongrop zo tah a nih. Hieng ringot hin chu iengtin am ei hring zo ding a na?’ in ti hlak a. 11 Chuleiin an kuomah, ‘Mi rilo thinaa hin lawmna hrim ka nei naw a, inlamlĕta a dam hi ka lawmna lem chu a nih ti hi kei Lalpa PATHIEN hring zing hin ka hril. Chuleiin, kîr ro, in nun dan suola inthokin kîr ro! Aw Israel sungkuohai, ieng leiin am in thi el ding a na?’ tiin hril tawl rawh.
12 “Mihriem naupa, i hnam chanpuihai kuomah hieng hin hril rawh: ‘Mi fel felna chun a bawsiet niah san him naw ni a, mi rilo rîtlona chun a lamlĕt niah suktlu bok naw nih. Mi felin a bawsiet chun a hmaa a felna leiin hring naw nih. 13 Mi fel kuomah, ‘Hring ngei i tih’ ti ka hril a, a felna ringa thil suol a thaw chun a thil thra thaw tah pakhat khom hriet zing ni naw ni a, a thil suol thaw lei chun thi lem a tih. 14 Chun, mi rilo kuomah, ‘Thi ngei i tih’ ti ka hril a, a suolna inlamlĕt a, thil thra le indik thaw a, 15 a thil inpuktir leia dàkhama a lăk chu pe kîr a, a thil inrŭk thak kîr a, hringna petu dan thusuokhai chu zawm a, thil thra lo ieng khom thaw loa a um chun hring ngei a ta, thi naw nih. 16 Suol a lo thaw tahai po po khom hriet zing ni ta naw nih. Thil thra le indik a thaw leiin, matheiloin hring a tih.
17 “I hnam chanpuihaiin, ‘LALPA thaw dan hi a felfăk nawh’ an ti a, sienkhom anni thaw dan a nih a felfăk naw lem chu. 18 Mi felin felna lampui nghatsana suol a thaw chun thi ngêi a tih. 19 Mi riloin a rîtlona nghatsana thil thra le indik a thaw chun, a thilthaw leiin hring a tih. 20 Chuong sà khom chun, aw Israel sungkuohai, ‘LALPA thaw dan hi a felfăk nawh’ in la ti zing tho. In thilthaw dan ang peiin mi tin chungah ro ka rèl ding a nih’ tiin hril rawh” a ta.
Jerusalem tlùkna thu
21 Babulon sala kan intanga inthoka kum sawm le pahnina, thla sawmna, ni ngana chun Jerusalema inthoka mi pakhat hung tlan suok hi ka kuomah a hung a, “Khawpui chu an lăk tah!” a ta. 22 Mi tlân suok hung tlung hma zan tieng chun ka lu chungah LALPAN kut a hung innghat a; a tûk zîngkara mi tlân suokin a mi hung hmu hma chun ka bău a mi hongpek a, ka bău a hong tak lei chun ka to thei ta naw a.
23 LALPA thu chu ka kuomah a hung tlung a. 24 “Mihriem naupa, Israel rama hmun sukram ta hnunga chênghai chun, ‘Abraham chu màkhât chau ni sien khom ram chu a hluo dinga a pek a ni chun, eini ruok chu tam tak ei la ni a, ram pum hi ei rochung dinga a mi pek ngei chu a lo nih’ tiin an hril a. 25 Chuleiin an kuomah, ‘Sa thisen in făk a, milim biekna tieng mit in inlĕn a, thisen in insuo si chun nangnin ram chu in chang ding maw? 26 In kawlhnăm in ringsan a, thil tirdakum tam tak in thaw a, in tuolbawmhai nuhmei in sukporchè a. Chuong sà khom chun ram chu in hluo ding maw? ti hi Lalpa PATHIEN thu suok a nih’ tiin hril rawh.
27 “Hieng ang hin an kuomah hril rawh: ‘Lalpa PATHIEN chun hieng hin a tih: ‘Hmun ram ta hnunga chênghai chu kawlhnâmin that an ta, ram hnuoia umhai chu sakolhai făk zo dingin pe’ng ka ta, kul nghet le pûka umhai chu hripuiin thing an tih ti hi kei Lalpa PATHIEN hring zing hin ka hril. 28 Ram chu rausan ramah siem ka ta, an chapopui, an thilthawtheina chu hung bo a ta, Israel tlanghai chu rausan an ta, tu khomin sir ta naw nih. 29 Thil tirdakum tak tak an thaw leia a ram ka suktlaran pha chun LALPA chu ka nih ti hung hre ta’ng an tih.
30 “Chun, nang, mihriem naupa, kul bang bul le kotkhar bula hai chun i hnam chanpuihaiin hril huoi huoi an ti che a, mi tinin an unauhai kuomah, ‘Hung ro, LALPA thu hung tlung chu va ngaithlang ei tiu’ tiin inhril tuong an tih. 31 A hon honin i kuomah hung an ta, ka mihai ni âwm takin i hmaah inthrung an ta, i thu ngaithla’ng an ta, sienkhom zawm chuong naw ni hai. An bauin hmangaina thu hril an ta, an lungril ruok chun hlĕprûka hausak dan a nih an ngaituo. 32 A nih, anni ta ding chun rawl mawi taka hmangaina hla sak a, rimawi thiem ĕm êma tumtu ang chauh i nih; i thuhai chu an hriet a, sienkhom anniah a takin hmang an tum nawh. 33 Hieng thilhai po po hi a hung tlung pha, a hung tlung ngei bok ding a na, anni lai zawlnei a um a nih ti hung hre ta’ng an tih’ a tih, tiin hril tawl rawh” a ta.