Aigupta le awlé tekhinna
32
1 Babulon sala Jehoiachin intanga inthoka kum sawm le pahnina, thla sawm le pahnina le ni khatna,a chun LALPA thu chu ka kuomah a hung tlung a. 2 “Mihriem naupa, Aigupta lal Faraw sŭnna hla inzawt la, a kuomah hieng hin hril rawh:“Hnamhai lai hin nang chu,
Sakeibaknei angin i’n ngai a,
Tuipui dragon angin i’n ngai;
I chĕngna va hnârah inperin,
Kea tui per phul buon buonin,
Vadung tuihai i suknŭ zo.
3 “Lalpa PATHIEN-in i chungthu,
Hieng ang hin a lo hril a: ‘Lĕna nangma mantu dingin,
Mi tam tak hung tir ka ta,
Lĕnin khâi suok an ti che.
4 Khawmuolah pei ka ti che a,
Khaw hnawmah pei ka ti che,
Chungleng vatehai po po chu,
A tlàn ding che’n hung tir ka ta,
Hnuoia ramsahai po poin,
Fain pot chen neng an ti che.
5 I ruong chu tlâng le ruomah,
Ka thè dar phung ding a nih.
6 I chĕngna hmun le tlângah,
I thisen inluongtir ka ta,
Kor tin le ruom tinhai chu,
I ruongin hnaw sip ka tih.
7 Ka sukchimit pha che chun,
Vanhai chu khup khum ka ta,
Arasi sukthim ka ta,
Sûmin nisa inhlietir ka ta,
Thlain var insuo naw nih.
8 Van sânga var po pohai,
I chungah sukthim ka ta,
Thimin i ram bawm a tih,
Lalpa PATHIEN chun a tih.
9 Sietna ka hung intlun pha,
I hriet ngai lo rama chen,
Mi tam tak chî-ăi an tih.
10 Mihai pangzat huoi huoiin,
An hmaah siem ka ti che a,
Ka kawlhnâm ka vilik pha,
Nangma leiin lalhai khom,
Thlabârin inthin an tih.
I sietna ni a tlung pha chun,
Mi tinin nun chàn inlauin,
Triin inthin hâwp an tih.
11 “Lalpa PATHIEN-in a hril: ‘Babulon lal kawlhnâm chun,
A hung bei ding chè a nih.
12 Mi ralhrânghai kawlhnàmah,
I mihai intluktir ka tih,
Hnam tribaium tawphai kutah.
Aigupta ropuina suksein,
A mipuihai po po chu,
Ka sukbohmang ding a nih.
13 Tui tam tak kama tla hlak,
A ran ruolhai sukbo ka ta,
Mihriem ke le ran kein,
Tui chu pal nu ta naw nih.
14 A tuihai sukvâr ka ta,
An vadung chu hriek angin,
Luong dêl dêl ta lem a tih,
Lalpa PATHIEN-in a tih.
15 Aigupta suktlaran a,
A iengkim sukram vong a,
A chênghai ka sukhlum pha,
Kei hi LALPA chu ka nih,
Ti hi hung hre tang an tih,’
tiin.
16 “Hi hi a sûnna hla ding chu a nih. Hnam tin naunuhai chun hi trap hla hi insamin, Aigupta le a mihai chu tràng an tih’ ti hi Lalpa PATHIEN thu suok a nih.
Mithi khuo
17 Babulon sala Jehoiachin inlala inthoka kum sawm le pahnina, ni sawm le panganab chun LALPA thu chu ka kuomah a hung tlung a. 18 “Mihriem naupa, Aigupta ruol chu trap khum rak rak la, ama le hnam ropui tak tak naunuhai chu khuorkhurûma liem thla tahai kuom tieng hnuoi rilah thon thla tawl rawh. 19 An kuoma chun,
‘Mi nêkin ditsak i hlaw bik ding maw?
Fe thla la, sertan lohai lai khun zu zâl rawh’
tiin hril rawh.
20 Kawlhnâma thathai lai chun zâl ve’ng an tih. Kawlhnâm chu phawi a ni ta a; a mihai rawi leh hnûk hmang rawh. 21 Thlan khur nghaka um thruoitu hrathai chun Aigupta le a thloptuhai chungthu chu hrilin, ‘An hung thla a, kawlhnâma that, sertan lohai lai an zàl’ la ti’ng an tih.
22 “Thlana chun Asuria chu a sipaihai po po leh a um a, kawlhnâma a mi thathai thlàn chun an huol vel a. 23 An thlànhai chu khuorkhurûm inthûk taka um a na, a sipaihai thlan chun a thlan chu an inhuol vel a. Mihring rama thlabarna siem hlaktuhai po po chu that an ni ta a, kawlhnâma that vong an nih.
24 “Chu taka chun Elam khom chu a zâl ve a, a mihai thlànin a’n huol vel a. An rêng chun kawlhnâma that vong an nih. Anni chu mihring rama thlabàrna siem hlaktu le sertan lohai laia zâl dinga khuorkhurûm monga fe thla an nih. Thlàna chun khuorkhurûma liem tahai leh an muolphona chu an zàlpui a. 25 Thata umhai lai chun ama le a rawihai zalna ding chu an siempek a. An rêng chun sertan lo, kawlhnâma that vong an nih. Mi hring rama thlabârna siemtu an ni leiin, thathai lai inzaltirin, khuorkhurûma liem tahai leh an muolphona chu an phur tlàng a nih.
26 “Mesek le Tubal hai khom chu taka chun an rawihai leh an zàl a; an rawihai thlànin an thlàn chu a’n huol vel a. An rêngin sertan lo an na, mi hring ramah thlabârna an siem hlak leia kawlhnâma that vong an nih. 27 Anni chu tiena sertan lo mi râlhrât tlu tah, an ralthuomhai leh thlànah liem a, an phawin an ruhai inkhum a, an kawlhnàm lukhama zâl tahai le chun hmun khatah an zàl naw am a ni? Hieng râlhrâthai tritrămumna chun mi hring ram lo inhuol vel hlak sien khom, an suol leia hremna chu an ru chungah a tla ta si a. 28 Nang khom aw Faraw, kawlhnâma that, sertan lohai lai chun bong rem rumin zâl ve’ng i tih.
29 “Chu taka chun Edom khom a lalhai le hotuhai po po leh a um ve a, an hrât hlè hlaka chu kawlhnâma thathai lai an rêngin an inzàltir a, khuorkhurûma liem tah sertan lohai lai chun an sie a.
30 “Chu taka chun hmar tienga hotuhai chu an rêngin, Sidon mihai po po, thathai laia liem thla tahai le chun an um a, an hrătnain mi sukthlabâr hlak sienla khom kawlhnâma that, sertan lohai lai muolpho takin an zăl a, khuorkhurûma fe tahai leh an muolpho tlăng tah a nih.
31 “‘Farawin a mihai po po, ama le kawlhnâma that tah, a sipai ruol po po leh, a lo hmu pha chun thlamuong pha hiel a tih’ ti hi Lalpa PATHIEN thu suok a nih. 32 Faraw le a rawihai chu mi hring rama thlabârna inlêngtir dinga ka hmang ni hai sien khom sertan lo, kawlhnâma thathai lai chun zâl ve’ng an tih’ ti hi Lalpa PATHIEN thu suok a nih” a ta.