Lebanona sidar thing
31
1 Babulon sala lal Jehoiachin intànga inthoka kum sawm le pakhatna, thla thumna, ni khatna,a chun LALPA thu chu ka kuomah a hung tlung a. 2 “Mihriem naupa, Aigupta lal Faraw le a khuo le tuihai kuoma chun hieng hin hril rawh:Ropuinaa sîng zotu che,
Tu am an um hrim hrim a?
3 Lebanon sidar lo ni ta hlak,
Asuria ang kha i nih.
A zârin thing dang khûmin,
Thing buk dang po po chungah,
A dawk lŭr hlak a ni kha.
4 Siktui inthienga chawm lien,
Tui hnàr rila chawm a nih.
A kûng bul vela hai chun,
Fiertui a luong dem dem a.
Chu tui hnàr luong dar pei chun,
Ram thing tin an chawm lien a.
5 Chuonga inthrang lien peiin,
Ram thing danghai a khûm a,
A buk a lien deu deu a,
A kauhai a’n zâr duoi a,
Fiertui thieng chawm a ni si.
6 Chungleng va tinrênghaiin,
A zâr bukah bu an sep a;
Hnuoileng ramsa tinrênghan,
A buk hnuoiah hrai chawiin,
Hnam ropui tam tak el chu,
A zâr hlima chun an chĕng.
7 A buk ropuiin a mawi a,
A kâu a’n zâr phei duoi a,
A zung chu hnienghnâr taka
Fiertui thienga chawm a nih.
8 Pathien huona sidarhai lai,
Ama sîng zo an um nawh;
Far thing po pohai nĕkin,
A buk a’n zàr thra lem a,
Thing danghai po po khomin,
A kâu zâr chu an chen nawh.
Pathien huona thinghaiin,
A mawizie an sǐng zo nawh.
9 A zârhai chu inbuk hlûpa,
Mawi taka siemtu ka na,
Pathien huon Eden thinghan,
An thǐk le er tak a nih.
10 “Chuleiin, Lalpa PATHIEN chun hieng hin a tih: A hung insang tah êm êm a, thing buk dang po po chungah a dâwk lŭr a, a’n sang êm lei chun a hung chapo a. 11 Chuleiin, hnamhai chunga rorêltu kutah ka pêk suok a, ama chun a rîtlona angin thawng a tih. Ama chu sirah ka hnawl a, 12 hnamhai laia tribaium tak chun phûr thluin maksan a ta, tlâng le phaihai a bukin del a ta, ruoma hai chun a kau tliekhai chu tlu dar rem rum a tih. A buk hlima chêng hnam po pohai chu hung suok an ta, zàmsan an tih. 13 Thing tlu sop hnuoia chun chunglèng vatehan bu khuor an ta, a kau zarhai chu ramsahan chîl sop an tih. 14 Chuleiin, tuta hnungah, ieng anga tui chawm thrat thing khom ni sien, ama anga sûm tong rak khopa insang um ta naw ni hai. Mihriemhai ang boka thi el dinga ruot le mithi khuo, khur inthuka liem thla ve vong dinga ka ruot sa a nih.
15 “Lalpa PATHIEN chun hieng hin a tih: Mithi khawa a liem ni chun tui hnàr rilhai chu insŭntir ka ta, an hnàr kang chat a ta, tui insuo naw nih. Lebanon chu lusûn thuom inbeltir ka ta, ram thing hnahai chu thêm vong a tih. 16 Khuorkhurûma liem tahai umna thlàna ka pei thlak ni chun, a tlàk ri hrein hnamhai chu inthin hawp an tih. Mithi khawa lo liem tah, tuia chawm Eden huona thing po po le Lebanona thing thrâ thrahai chun an umna khuorkhurûma a hung tlăk thlăk an hmu chun an ha dam huoi a tih. 17 A zâr hlima chêng, a’n koppui hnamhai khom chu ama ruolin kawlhnâma an that tahai leh liem thla diel an tih.
18 “Eden thinghai lai hin mawina le ropuinaah nang le hril khi ding tu am an um a? Chuong sà khom chun nang chu Eden thinghai leh hnuoi rilah pei thlak ning i ta, chu taka chun kawlhnâma that, sertan lohai lai zâl vêng i tih. Hi hi Faraw le a khuo le tuihai chan chu a nih’ ti hi Lalpa PATHIEN thu suok a nih” tiin.