Aigupta sùnna hla
30
1 LALPA thu chu ka kuomah a hung tlung a. 2 “Mihriem naupa, hril lawk la, ‘Hieng hin Lalpa PATHIEN chun a tih’ tiin hril rawh:‘E khai! Chungrikna ni tak hi chu aw!’
Tiin trap khêk chèl chûl ro.
3 Chu ni chu a hnai ta a,
LALPA ni chu a hnai tah,
Sûmpui hung zǐngna ni ding,
Hnamhai sietna ni ding chu.
4 Aigupta-ah chemsen inlêngin,
Lungngainan Kush tlun a tih-
Aiguptaah ruong zâl thluk a,
A hausaknahai tol hmangpèk a,
A lungphŭmhai a chim ni chun.
5 Ethiopia, Put, Lydia le Arabia,
Libya le thuthlung rama mihai,
Aigupta leh chemsenin tlûng an tih.
6 LALPA chun hieng hin a tih:
Aigupta inkoppuihai po po khom,
An rêngin tlu vong an ta,
A tha hrat a suong hlak chu,
Chauin hung zûr thlang a ta,
Migdol a’nthok Aswan chenin,
Kawlhnâmin tlu vong an tih’
Lalpa PATHIEN chun a tih.
7 Rausana um ramhai lai,
Ram rausan ni ve’ng an ta,
An khawpui rausanhai khom,
Khaw chul ram chang tang an tih.
8 Aigupta ka raw phaa,
A thrangpuituhai ka rawt ram pha,
LALPA chu ka nih ti hrieng an tih.
9 “Chu ni chun ngai thra deua um Ethiopia mihai chu thrawng tho dingin zuolkohai chu longin suok an tih. Aigupta siet tuok ni chun beidongnan hung nang tawl a tih; a hung tlung ngei ding a ni si a. 10 “Lalpa PATHIEN-in hieng hin a tih:
Babulon lal Nebukadnezzar hmangin,
Aigupta hausakna suktawp ka tih.
11 Hnamhai laia tribaium tak,
Ama le a sipai ruolhai chu,
Ram sukse dingin hung an ta,
Aigupta lakah chemsen inlèn an ta,
A ram chu mithi ruongin sip a tih.
12 Nile vadung hnàrhai po po,
A rêngin sukkang ka ta,
Ram chu mi suolhai kuomah,
Ka zor hmang vong ding a nih.
Ram dang mihai kut hmangin,
A ram chu sukram ka tih,
A sunga um po po leh, ti hi
Kei LALPA hin ka puong a nih.
13 “Lalpa PATHIEN-in hieng hin a tih:
A milim biekhai suksieng ka ta,
Memfis-aa a milim po po khom,
Sukbohmang vong ka tih.
Aiguptaah lal um ta nawng an ta,
A ram pumah tritna inlêng a tih.
14 Aigupta chuonchung sukramin,
Zoanb chu meiin raw hmang ka ta,
Thebesckhom hrem bok ka tih.
15 Aigupta kulpui suongtawlol,
Pelusium-ah ka lungturûk bur ka ta,
Thebe ruol chu râwt vong ka ta,
16 Aiguptaah mei insuong ka ta,
Na tuorin Pelusium inkon a ta,
Buoinan Memfis tlung chil a tih.
17 Heliopolis le Bubastis valhai chu,
Kawlhnâmin sâm thlu phung an ta,
A khaw mihai salah thruoi an tih.
18 Aigupta ringkol ka suktliek pha,
A chapopui hratna ka suktawp pha,
Tahpanhesd chan chu inthim a tih;
Sûmpuiin chìm khum a ta,
A mi chenghai salah thruoi an tih.
19 Chu ang chun Aigupta chungah,
Hremna intlungtir ka ta,
LALPA chu ka nih ti hrieng an tih.
20 Babulon sala lal Jehoiachin intànga inthoka kum sawm le pakhatna, thla khatna le ni sarina,e chun LALPA thu chu ka kuomah a hung tlung a. 21 “Mihriem naupa, Aigupta lal Faraw bàn chu ka suktliek ta a, a hung dam nawk theina dinga tuom a ni naw a, kawlhnâm chel thei khopa hung hrat nawk thei dinga ngar khuo a ni bok nawh. 22 Chuleiin, Lalpa PATHIEN chun hieng hin a tih: Ngai rawh, Aigupta lal Faraw chu ka khing a nih. A bân khing hniin, a thratna tieng le tliekna tieng khom suktliek ka ta, a kuta inthokin kawlhnâm chu sukthlâng ka tih. 23 Aigupta mihai chu hnam tin lai sukdar ka ta, ram tinah dêng dar ka tih. 24 Babulon lal bân chu sukhrat ka ta, a kutah ka kawlhnâm inchawitir ka ta, Faraw bân ruok chu vaw bong ka ta, a hmaa chun thi suola na tuor inrûm angin inrûm a tih. 25 Babulon lal bàn chu sukhrât ka ta, Faraw bân ruok chu zûr tlep a tih. Babulon lal kutah ka kawlhnâm sie, Aigupta lakah a vilik pha chun, LALPA chu ka nih ti hre tang an tih. 26 Aigupta mihai chu hnam tin lai sukdar ka ta, ram tinah um dar an tih. Chu pha chun LALPA chu ka nih ti hrieng an tih” tiin.