Aigupta chungthu hril lawkna
29
1 Babulon sala lal Jehoiachin intănga inthoka kum sawmna, thla sawmna le ni sawm le pahnina,a chun LALPA thu ka kuomah a hung tlung a. 2 “Mihriem naupa, Aigupta lal Faraw chu hmason la, a chungthu le Aigupta ram po po chungthu ding hrilpêk rawh. 3 Hieng hin hril rawh: ‘Lalpa PATHIEN chun hieng hin a tih:Nang Aigupta lal Faraw,
Vadung suoa rul hrĕu bok,
Ka khing che a nih.
“Nile vadung hi ka tâ a na,
Keimain ka siem a nih”
I ti rop hlak a ni kha!
4 I khâkah kuoi ka ti che a,
I phuhlipah nga inkopptir ka ta,
I phuhlipa kai nga po po leh,
Vadung a’nthok pot suok ka che.
5 Nang le i vadunga nga po po,
Thlalĕrah maksan ka ti cheu.
Ram palailèngah tla dar in ta,
Rŭt khawm ni naw ti niu a,
Ramsa le chungleng vatehai
Tlàn dingin pe suok ka cheu.
6 “Chu pha chun, Aigupta rama chêng po poin kei hi LALPA chu ka nih ti hung hre tang an tih. Israel sungkuo ta dingin luong hmol i lo ni hlak a. 7 Funghrola an hmang che leh i por ruop a, an dàr an her el pha a; an hang innghai che leh i tliek buk a, an zăng ru a’n pelsol a.
8 “Chuleiin, Lalpa PATHIEN chun hieng hin a tih: Nangma bei dingin kawlhnâm leh hung inthok ka ta, i mi le sahai ka râwt bo vong ding a nih. 9 Aigupta chu rausan ram hung inchang a ta, chu pha chun LALPA chu ka nih ti hung hre tang an tih. ‘Nile vadung hi ka tâ a na, keima siem a nih’ i ti hlak kha. 10 Chuleiin, nang le i vadunghai hi ka do cheu a, Migdol-a inthoka Aswan chen le Ethiopia ramri chenin sukram vong ka ta, rausan ramah ka siem ding a nih. 11 Mihriem kein sir naw ni hai a, ramsahai khomin sir naw ni hai a, kum sawmli sung hluo loin um a tih. 12 Aigupta chu rausan ramah siem ka ta, a khawpui tlu ram tahai chu hluo loin kum sawmli sung tlu sop a tih. Aigupta mihai chu hnam tin lai sukdar ka ta, ram tinah indar an tih.
13 Chuong sa khom chun, Lalpa PATHIEN chun hieng hin a tih: ‘Kum sawmli a kin pha leh Aigupta mihai chu an tlan darna hnamhai kuta inthokin thruoi khawm nawk ka tih. 14 An saltangnaa inthokin an pi le puhai ram, Aigupta chuonchunga chun thruoi kir nawk ka ta, chu taka chun innêm takin inlal an tih. 15 Lalram po po laia a mong dàp ning a ta, hnam danghai chungah insuklal ta ngai naw ni a, hnam dang chunga inlal nawk ta lo dingin, hrat naw takin siem ka tih. 16 Israelhai ringsan ni ta loin, thrangpuitu dinga Aigupta tieng an lo ngha kha an lo thaw suolzie inhriet nontirtu hung ni ta lem a tih. Chu pha chun Lalpa PATHIEN chu ka nih ti hung hre tang an tih a tih’ ti rawh” tiin.
17 Babulon sala lal Jehoiachin intànga inthoka kum sawmhni le pasarina, thla khatna le ni khatna,b chun LALPA thu chu ka kuomah a hung tlung a. 18 “Mihriem naupa, Babulon lal Nebukadnezzar chun ngor taka Tura bei dingin a sipaihai a nor a, an lu kol rak khop le an dàr vunhai inhlip neng nung khopin an bei a, sienkhom ama le a sipaihaiin Tura an beinaa inthokin hlawkna ieng khom an hmu si nawh. 19 Chuleiin, Lalpa PATHIEN chun hieng hin a tih: Aigupta ram chu Babulon lal Nebukadnezzar kutah pe’ng ka ta, a hausaknahai chu hawn a tih. Rok a ta, a rama thil umhai chu râllâk sumah la’ng a ta, chu chu a sipaihai hlawah peng a tih. 20 Ama le a sipaihaiin ka rong an bawl leiin Aigupta ram hi lawmmanah ka pêk ding a nih ti hi Lalpa PATHIEN thu suok a nih.
21 “Chu ni chun Israel sungkuo ki chu sukzâr ka ta, an hmaah i bau inphongtir ka ti che a, chu pha chun LALPA chu ka nih ti hung hre tang an tih” tiin.