Tura lal chungthu hril lawkna
28
1 LALPA thu chu ka kuomah a hung tlung a. 2 “Mihriem naupa, Tura lal kuomah hieng hin hril rawh, ‘Lalpa PATHIEN chun hieng hin a tih:I lungril a chapo a,
“Kei hi pathien ka nih,
Tuipui laili lai takah,
Pathien thrungnaah ka thrung”
Tiin i hril hlak a ni kha!
Pathien ang hiela varin,
I lo inngai a ni khomin,
Mihriem ve el chauh i na,
Pathien i ni hrim hrim nawh.
3 Daniel nĕkin i var lem maw?
Thu thup i hriet vonga maw?
4 I varna le i hriet thiemnain,
Hausakna i khawl khawm a,
I robawmah rangkachak le
Tangkaruo i hlù lùt rawn hle.
5 I sumdawng thiemna leiin,
I hung hausa ta hle a,
I hung hausa tah leiin,
I hung chapo tah a nih.
6 Chuleiin, Lalpa PATHIENIN,
Hieng ang hin a ti a nih:
Pathien anga var hiel a,
I hung inngai tah leiin,
7 Nangma hung beitu dingin,
Hnam dang mi tribaium tak,
I kuomah hung tir ka ta,
I varna chungah kawlhnâm,
Inlet khum an ti che a,
I ropuina sun tlang an tih.
8 Khurah hnûk lut an ti che a,
Tuipui rilah rawng takin,
An that ding che a ni si.
9 A thattu che hmaa chun,
“Pathien ka nih” i ti ngam ding?
A thattu che kuta chun,
Pathien ni naw ti ni a,
Mihriem el ni lem i tih.
10 Ram dang mihai kuta chun,
Ser tan lo thiin thing i tih’
Lalpa PATHIEN-in a tih.
11 LALPA thu chu ka kuomah a hung tlung nawk a.
12 “Mihriem naupa, Tura lal sŭnna hla insam la, a kuomah hieng ang hin hril rawh: ‘Hi hi Lalpa PATHIEN hril chu a nih:
Varna le hmêl thratnaa,
Famkim tling zo i ni khah!
13 Pathien huon Edenah chêngin,
Lunghlu tinrêng i’n bel a,
Rubi, topaz, emeral,
Krisolit, onik le jaspi,
Safir, torki le beril haiin,
Lunghluhai belna ding chu,
Rangkachaka siem a na,
Siema i um ni ngei khan,
Chuonghai chu buotsai a nih.
14 Vengtu cherub ni dingin,
Hriek khom ka nâl diem che a,
Chu dinga namnghet i nih.
Pathien tlang thienghlimah umin,
Lung tle sût chungah i lêng.
15 Siema i uma inthokin,
Rîtlona i thaw hma po khan,
Soisel boin i khawsa hlak.
16 I sumdawngna a hung lien a,
Inpawngnêknan i hung sip a,
Suolah i hung tlu lût ta si.
Pathien tlânga inthokin,
Hnawlin ka hnot suok che a;
Aw nang vengtu cherub,
Lung tle sût laia inthokin,
Ka hnot suok che a ni kha.
17 I hmêl thratnan lungrilah,
Chapona a pêk che a,
I varna khom i ropuinan,
A hung sukkhawlo vong a;
Hnuoiah ka pei thlak che a,
Lalhai hrilfàk tling khopin,
Ennuomah ka siem chê hi.
18 Fel lo taka sumdawnga,
Suol tam tak i thaw leiin,
I hmun thienghlim po po chu,
Tirdakumah i siem a,
Chuleichun nangni sungah,
Mei ka hung insuoktir a,
Chu chun a kang hmang che a,
A thlir taphot mithmuah,
Meivămah ka’n changtir che.
19 A hretu che hnam tinin,
Maktiin pangzat an ti che,
I tawp dan a râpthlâk êm a,
I bo song ding a ni si” tiin.
Sidon chungthu hril lawkna
20 LALPA thu chu ka kuomah a hung tlung a: 21 “Mihriem naupa, Sidon khuo hmason la, a chungthu ding hieng hin hril rawh: 22 ‘Lalpa PATHIEN chun hieng hin a tih:
“Aw Sidon, ka khing chê a nih;
I sungah chawimawi ni nawk ka ta,
Hremna ka’n tlun zo pha a,
Ka thienghlimzie ka’n entir pha,
LALPA ka nizie hrieng an tih.
23 Hripui inlengtir ka ta,
A kotthlĕrah thisen luong a tih.
A sûngah tlu hlum phung an ta,
Kawlhnâmin huol vel a ta,
LALPA ka nih ti hrieng an tih.
Israel hamthratna ding
24 “Israel sungkuohai ta dingin anni sun na hlaktu hling buk le hling zum ang tuolbawm suol um ta naw ni hai. Chu pha chun Lalpa PATHIEN chu ka nih ti hung hre tang an tih.
25 “Lalpa PATHIEN chun hieng hin a tih: An um darna ramhaia inthoka Israel sungkuohai ka thruoi khawm pha chun, hnam tin mithmuah Israelhai lai ka thienghlimna inentir ka ta, chu pha chun Jakob kuoma ka pĕk, an ram ngeia chun chĕng tăng an tih. 26 Chuongchun, him takin um tang an ta, in bawlin grep huon siem an ta; anni sukse tumtu, an vela cheng hnamhai ka hrem pha chun muong takin um tang an tih. Chu pha chun kei hi LALPA an Pathien chu ka nih ti hre tang an tih” tiin.