Tura sŭnna hla
27
1 LALPA thu chu ka kuomah a hung tlung a. 2 “Mihriem naupa, Tura sŭnna hla insam rawh. 3 Sumdawng hnamhai le tuipui kam ram tam tak hnaia tuipui suoa um Tura chungchang chu, hieng ang hin Lalpa PATHIEN chun a tih tiin Tura kuoma chun hril rawh:‘Aw nang Tura,
“Ka mawi famkim” i ti kha maw!
4 I chètna chu tuipui lien a na,
A siemtuhai chê khomin,
Mawi famkim di’n an duong che.
5 Senira fàr-in an bawl che a,
I ngula hmang ding khomin,
Lebanon sidar a nih an hmang.
6 Zàpna hmola i hmang dingin,
Basan saisaw thing an hmang.
I truong chu Kuprab kaia inthoka,
Far thing an hung tol a nih.
I long khandar po po khom,
Saihaa cheimawi a nih.
7 Long puonzara i hmang khom,
Aigupta puon chei a na,
Chu chun i’n chikna a chuong.
Puon rong dumpawl le senduk,
Elisha kaia inthoka lak chu,
Hliepzărah i hmang bok a.
8 I long kartuhai po pohai chu,
Zidon le Arvad mi an na,
I long khal thiemhai po po khom,
Tura khaw mi vong an nih.
9 I longa chun Gebalc mi un,
Long thol le char nghettu ding,
Mi themthiem ruol an um a.
Tuipuia long le a puhaiin,
Hung panin an dawr hlak che.
10 Persia, Lydia le Libya mihai,
I sipaiah an thrang tawl a,
I banga an phaw le lukhum,
An tàrhai chun a sukmawi che.
11 I kul chu a sir tuokin,
Arvad le Helek-han an vĕng a,
I kulbing sang tieng po chu
Gamad mihan an vêng bok.
Bangah phaw inkhai tuor chu,
I hming sukmawitu a nih.
12 Dawr thuomhnaw i hau leiin,
Tarsis-hand an hung dawr che a,
Tangkaruo, thîr le suonhai,
Thuomhnaw manah an pèk che.
13 Grik,e Tubal le Mesek ramhan,
Sal le dâr, bûr le bèl chawiin,
An hung dawr hlak bok che a.
14 Chuongna le tawlailira ding,
Sakor le sabengtung chawiin,
Togarma-han an hung dawr che.
15 Dedan mihan an dawr che,
Tuipui kama ram dang khomin,
Saiha le eboni an hung chawi.
16 Dawr thuomhnaw i hau leiin,
Edom mihan an hung dawr che,
Lunghlu hai, puon senduk hai,
Thruichei puon, puon zai inhmi,
Kawral le rubi belmawihaiin.
17 Juda le Israelhan an dawr che,
Minnit-a inthoka huit dam,
Theichang em trawl dam,
Khuoizu dam, oliv hriek dam,
Thing hnai damdawi dam chawiin.
18 Thilsiem chi hrang hranghai le
Dawr thuomhnaw i hau leiin,
Helbon uoiin le Zahar sahmulin,
Damaska-in a hung dawr che.
19 Uzala-a Dan le Grik mihan,
Thîr le thingzungthak phurin,
Mafu rimtui leh an hung dawr che.
20 Dedanhan sakor thuom lum,
Phurin an hung dawr hlak che.
21 Arabia mihai le Kedar lalhan,
Beramte le beramchal dam,
Kel dam keiin an hung dawr che.
22 Seba le Rama mihan rimtui thra,
Lungmantam le rangkachak fir,
Chawiin an hung dawr hlak che.
23 Haran le Kanne le Eden mihai,
Seba, Asur le Kilmad rama mi,
Sumdawnghan an hung dawr che.
24 Silfen mawi, puon dumpawl,
Thruichei puon, karpet triel mawi,
Pat thlŭra nghet taka tahai chu,
Chawiin an hung dawr hlak che.
25 Tarsis long ruol po po chu,
I thuomhnaw phurtu an na,
Tuipuiah an intlon duol duol a,
An phur khom a rik tawl hle.
26 Sienkhom long khaltuhaiin,
Tui fawnah an khal lut che;
Tuipui laili lai taka chun,
Khaw sak thliin hung notin,
A nuoi phit ding che a nih.
27 I hausakna, dawr thuomhnaw,
Long mihai le long khaltuhai,
Long siemtu le chàrtuhai,
Sumdawngtuhai le sipaihai,
Long sunga um po po leh,
Long siet i tuok ni pha chun,
Tuipuiah pil vong in tih.
28 I long khaltuhai khek ri chun,
Vakama mihai sukthin a ta,
29 Long karna hmol cheltuhan,
Long chu tlansan vong an ta,
Long khaltu le long mihai chu,
Va kama chun ngir an tih.
30 I chungah trap rawl insuoin,
Lung na takin tra’ng an ti che.
An luah pilvut phul an ta,
Vut lai zalin inbuol an tih.
31 I leiin lu met kol an ta,
Saiipin inthuom an ta,
Lungna takin tra’ng an ti che a,
I pûr inrim takin do an tih
32 Lungse vankaiin trap an ta,
Sŭnna hla dam phuok an ta,
“Tuipui rila zal tah hnung,
Tura ang hi an um hlak am?”
Tiin trap hla inzâwt an tih.
33 I thuomhnawhai chu tuipuiah,
An thon suok chang hnamhai an tlai.
I sum le pai le thuomhnawhan,
Hnuoi lalhai i sukhausa hlak.
34 Sienkhom sietna i tuok ni khan,
Tuipui rilah i pil hmang a,
I sumdawngna thil po po khom,
Nangma ruolin an thamral tah.
35 Tuipui kama chêng po poin,
An pangzat huoi huoi che a,
An lalhai an inthin hăwp a,
Tritnan an hmai a sawm kon.
36 Hnam tin laia sumdawngtuhan,
An inchek khum tlok tlok che;
I tawp dan a rapthlâk êm a,
I bo song ding a ni si” tiin.