Tura chungthu hril lawkna
26
1 Babulon sala lal Jehoiachin intànga inthoka kum sawm le kum hnina, thla sawm le thla khatna ni hmasa takaa chun LALPA thu chu ka kuomah a hung tlung a. 2 “Mihriem naupa, Tura chun Jerusalem siet thuah, ‘Eheu, sak ram le insumdawng tuona kotkhar chu a se tah ie! A siet tăk leiin keinin hmuingil phá hlauh kan tih’ an ti vèl a. 3 “Chuleiin, Lalpa PATHIEN chun hieng hin a tih: Aw Tura, ngai rawh, ka do che a nih. Tuipui fawn invor tung angin nangma beitu ding hnam tam tak hung tir ka tih. 4 Tura kul banghai chu nor chim an ta, a kulbing sanghai chu sukchim an ta, a tlu sophai po po chu lên fai vong a ta, lungpui fil ringotin siem ka tih. 5 Kei Lalpa PATHIEN hin ka hril tah angin, ngamantuhai lèn zar hulna hmunah inchang a ta, hnam danghai rok ramin um a tih. 6 A ram sunga chĕngna hmunhai po po chu kawlhnâmin rawt ram an tih. Chu pha chun LALPA chu ka nih ti hung hre ta’ng an tih.7 “Lalpa PATHIEN chun hieng hin a tih: ‘Tura beitu dingin hmar tienga inthokin Babulon lal Nebukadnezzar, lalhai lal chu hung tir ka ta, a sakor hai, tawlailir hai, sakor chungchuong mi le sipai tam tak leh hung a tih. 8 A ram sunga chĕngna hmun po po chu kawlhnâmin râwt ram a ta, inhuol a ti che a, muol pawng siem a ta, i kul chenin thramte dawng a ta, a phawin nêk a ti che. 9 I kul banghai chu a sutnain sut hong a ta, a hriemhrei chawiin i kulbing sanghai chu sukchim a tih. 10 A sakorhai chu an tam êm leiin an pilvut pal khuk chun vur khum a ti che. Miin kul bang vera khuoa a lut anga i kotkhara a hung lut pha chun indo sakorhai inhnawt ri le tawlailir tlân ri chur chur lei chun i kul banghai chu inhnîng dur dur a tih. 11 I kotthlĕr chu a sakorhai tin bawrin sir chip vong an ta; i mihai chu kawlhnâmin that a ta, i banpui detdo tak takhai chu hnuoiah tlu sop a tih. 12 I hausaknahai chu râllâk sumah hawn a ta, i sumdawng thuomhnawhai chu rok a ta, i bang sutchim a ta, i in mawi tak takhai thriek a ta, a lung le thing le hnephnawlhai chu tuipuiah pei a tih. 13 I hla sak ri suktawp ka ta, i tringtrang tum hri hrim hriet ni ta ngai naw nih. 14 Lungpui fil ringotah inchangtir ka ti che a, lèn zar hulna hmunah inchang i tih. Indin ni nawk ta naw ti nih ti kei LALPA hin ka hril ta si a’ ti hi Lalpa PATHIEN thu suok a nih.
15 “Hi hi Tura chungthua Lalpa PATHIEN hril chu a nih: ‘I sûngah inthatna um a, hliemhai inrûm a, i tlŭk riin tuipui kama ramhai a nghor pha chun an inthin hawp naw ding maw? 16 Chu phâ chun chuong rama lalhai po po chu an lalthrungphaa inthoka trumin, an silpuonhai thè thlain, an silfen thruicheihai hlîp an ta, thlabârna puon sil an ta, hnuoiah inthrung sop an ta, nangma pangzatin inthin hlop hlop an tih.
17 Nangma sûnna hla phuok an ta, hieng hin ting an tih:
Aw nang khawpui hmingthang,
Tui thiem mihai chĕngna hmun,
I siet dan chu a va râpthlăk de!
Nang le i sûnga chênghai chu,
Tuifinrieta thuneitu niin,
Mi trisim an ni hlak vei le khan!
18 I hang tlûk rum ni khan chu,
Vakama chenghai inthin hawpin,
I tlŭk sop nuoi chu pangzatin,
Thlierkarhai an ai inchi’
tiin.
19 Lalpa PATHIEN chun hieng hin a tih: Khawpui rausan ta hnung, tu khom hluo lo anga ka siem phâ chè chun, tuifinriet li mongah inpiltir ka ti che a, tui tam takin chìm pil an ti che. 20 Tiena tlanga inthoka mihai lutna khur inthuk takah thlâk ka ti che a, lo fe tahai kuomah tir thlang ka ti che a, hmakhawsanga tlu ram tah hnuoia zalhai angin hnuoi pilrilah anni leh inchengtir ka ti che a, mihring ramah hung kirin i hmun hluo ta ngai naw ti nih. 21 Tawpna rapthlak i chungah intlungtir ka ta, boral song ta’ng i tih. Mihaiin zong an ti che a, sienkhom hmu naw top an ti che’ ti hi Lalpa PATHIEN thu suok a nih.