25
1 LALPA thu chu ka kuomah a hung tlung a. 2 “Mihriem naupa, Amon mihai hi hmasonin an chungchang thu hrilpek rawh. 3 An kuomah, ‘Lalpa PATHIEN thu hi lo ngaithla ro. Hi hi Lalpa PATHIEN hril chu a nih: Ka tempul an suosam lai le Israel ram an sukram lai le Judai ram mipuihai sala an thruoi lai khan, ‘Eheu!’ tia in lo diriem leiin, 4 khawsak mihai kutah ka pêk suok ding chêu a nih. Nangni lai umhmun khuorin an puon inhai zar an ta, in thei rahai tlànin, in bawngnenehai dawn an tih. 5 Raba khuo chu sanghawngseihai tlatna hmunah siem ka ta, Amon thlahai ram chu beram ruol bok khawmna hmunah siem bok ka ta, chu pha chun kei hi LALPA chu ka nih ti hre ta’ng in tih. 6 Lalpa PATHIEN chun hieng hin a tih: Israel ram chu nangnin kut ben khum a, ke tet khum a, in lungril po poa a sietna chunga in lawm leiin, 7 in chungah kut inlet ka ta, hnam danghai ràllàka hawn dingin inroktir ka ti cheu. Hnamhai laia inthokin sat thlang ka ti cheu a, ramhai laia inthokin sukbohmang daih ka ti cheu. Ka suksiet phâ cheu LALPA chu ka nih ti hung hre tang in tih.
Moab chungthu hril lawkna
8 “Lalpa PATHIEN chun hieng hin a tih: ‘Moab le Seir chun, “En ta u, Juda sungkuo chu hnam dang ang char an nih” an ti leiin, 9 Moab ramria a ram huoltu khawpui Bet Jesimot hai, Baal Meon hai le Kiriathaim hai, a ram sukropuitu khuohai khom thrang vongin, 10 Moab ram le Amon thlahai ram chu khaw sak rama umhai ta dingin peng ka ta, Amon thlahai chu hnamhai laia hriet zing ni ta naw ni hai. 11 Moab ram chungah hremna intlungtir bok ka tih. Chu pha chun LALPA chu ka nih ti hre tang an tih.
Edom chungthu hril lawkna
12 “Lalpa PATHIEN chun hieng hin a tih: ‘Edom chun Juda sungkuo chungah phubâ a lâk leiin nasa takin a suksuol a nih. 13 Chuleiin, Lalpa PATHIEN chun hieng hin a tih: Edom chungah kut inlet ka ta, a mi le sahai that ka ta, a ram chu suktlaran ka ta, Temana inthoka Dedan chenin kawlhnâmin sâm tawl ka tih. 14 Ka mi Israelhai hmangin Edom lakah phubâ lang ka ta, ka lungsen inling dàn ang peiin soisak an ta, phuba ka lâk a nih ti hre tang an tih ti hi Lalpa PATHIEN thu suok a nih.
Filistinhai chungthu hril lawkna
15 “Lalpa PATHIEN chun hieng hin a tih: ‘Filistinhai chun tiena tlanga inthoka an lo hmĕlmăkna chu pâi zinga suksiet nuomna lungril neia Juda chungah phubâ an làk leiin, 16 Lalpa PATHIEN chun hieng hin a tih: Ngai rawh, Filistinhai chungah kut ka’n let trĕp a, Keret khaw mihai chu rawt ram vong ka ta, tuipui kama chênghai khom sukbohmang vong ka tih. 17 An chungah na takin phuba lang ka ta, lungsenin hrem ka tih. An chunga phuba ka lak pha chun, LALPA chu ka nih ti hre tang an tih,” a ta.