Bêl intlok inentirna
24
1 Babulon sala lal Jehoiachin intanga inthoka kum kuona, thla sawmna le ni sawmna,a chun LALPA thu chu ka kuomah a hung tlung nawk a. 2 “Mihriem naupa, voisun ni, voisun ni ngei hi inchik rawh, Babulon lalin Jerusalem a’n huol ni ngei chu a ni si a. 3 Hi hel hmang sungkuo kuoma hin tekhin thu hril la, “Lalpa PATHIEN chun hieng hin a tih‘” tiin hril tawl rawh:‘Bêl inchuon rawh, thlai suongna bêl,
A sûnga chun tui bur rawh.
4 Sâ chan sahai kha thlâk la,
An hnikna lai, a ke le a darhai leh,
A ru thrá thrà khom thlâk sa rawh.
5 Ran ruol laia a thrá thrà thlang la,
Thukah thingher rol treuh la,
Soin intlok but but sien la,
A ru khom hmin vong raw se.
6 Lalpa PATHIEN chun,
Hieng ang hin a hril a nih:
Thisen insuo hmang khawpui,
Sa bêl anga kăng dum tah,
A khir rè thei lo ang chu,
A chung a va hang pik ngei!
A sâ kha luok treuh loin,
A mal malin thur dok ro.
7 “‘A thisen insuohai chu,
Amaa chun a kâi zing a;
Pila vur hmang el theina,
Hnuoiah bun thla ta nĕkin,
Lung chungah a bun thlak a.
8 Phuba ka lak theina dinga,
Lungsenna chok thotu dingin,
Tu khom vur khum lo dingin
Lung chungah ka buok ve a nih.
9 “‘Lalpa PATHIEN chun,
Hieng ang hin a tih:
Thisen insuona khawpui chu,
A chung a va hang pik ngei!
Thing tam tak buk khum ka tih.
10 Thing her buk khum treu unla,
Meiin raw hlut hlut unla,
Sa chu hmin taka suongin,
A bawlhlohai thlâk unla,
A ru trâwl rak khopin ur ro.
11 Bêl ruok chu meiling chungah,
Suon loin inchuon zing ro,
Bêl chu hung inling vong a,
A panga kophai zop thla a,
A khir a kâng vong chenin.
12 Sienkhom a khirkhawn chu,
Nghok khopin thaw inla khom,
A kàng hmang thei dĕr nawh.
13 “I hur porchènahai hi,
Tlĕng fai ngiel ka tum che a,
Sienkhom i fai thei naw a;
I chunga ka lungsenna hi,
Hrǐkthlâk vong a ni hmâ chu,
Tlĕng faiin um naw ti nih.
14 “Kei LALPA hin ka hril ta a. Ka chèt hun a hung tlung ta a, ka kut kei ta nawng ka ta, lunginsiet ta nawng ka ta, inhnuk kir ta bok naw ning. I nungchang le thilthaw angin i chungthu chu rêl ka tih’ ti hi Lalpa PATHIEN thu suok a nih” tiin.
Ezekiel nuhmei thi thu
15 LALPA thu chu ka kuomah a hung tlung nawk a. 16 “Mihriem naupa, i dit lai ngawi ngawi ka lakpek thut ding che a nih. Sienkhom, i sûn ding a ni naw a, i trap ding a ni bok nawh. 17 A rûkin inrûm la, sienkhom sûn naw rawh. I lukawm kha kawm zing la, i pheikhok bun zing bok rawh. I hmùr hup naw la, ruokngha sa khom kîl bok naw rawh” tiin a mi hril a .
18 Zing tieng chun mipuihai kuomah thu ka hril a, zan tieng chun ka nuhmei chu a thi el ta a. A zinga chun hrila ka um ang charin ka thaw a. 19 Mipui chun, “Hieng thil i thawhai hin kan ta dingin inentir iem an nei a?” tiin an mi’n don a.
20 An kuomah hieng hin ka hril a. “LALPA thu ka kuomah a hung tlung a. 21 Lalpa PATHIEN chun hieng hin a tih: ‘Ka Hmun Thienghlim, in thlamuongpui le suong êm êm, in en nghok ngai lo le ngainat tawp ngai lo chu ka sukporchè ding a nih. Judai rama in maksan in naunu le naupahai chu kawlhnâmin sâm an tih. 22 Ka thaw ang char hin in thaw ve ding a nih. In hmùr tuom naw unla, ruokngha sa fa bok naw ro. 23 Lukawm kawm zing unla, pheikhok bun zing bok ro. Sùn naw unla, mitthli intlaktir bok naw ro. Amiruokchu, in suolna lei le in lusunna leiin zûr hmang in tih. 24 Chuong ang chun Ezekiel hi in ta dinga entirna ning a ta, a thaw dan ang peiin in thaw ve ding a nih. Hi hun hi a hung tlung pha chun kei hi Lalpa PATHIEN chu ka nih ti hung hre tang an tih’ tiin.
25 “Chun, nang, mihriem naupa, an kulpui nghet, an hlimpui le suong, an lungdumtu le en nghok ngailo chu lakpek ka ta, an naupa le naunuhai khom la hmang bok ka tih. 26 Chu ni ngei chun Jerusalema inthoka tlan suok um sun chu Babulon-ah hung a ta, thil tlung chanchin hung hril a ti che. 27 Chu pha chun i bau hung inhong a ta, ama chu inbiekpui i ta, to zing ta nawng i tih. Chuong ang chun an ta dingin entirna ning i ta, LALPA chu ka nizie hung hre tang an tih” a ta.