5 “Ohola chu ka nuhmei a ni lai zingin a hur hmang a, mi râlhrât Asuria-hai chu huorin a hnot a. 6 Anni chu zakaw dumpawla inthuom, mi lien le mi lal, tlangval hmêl thra thlang khawm, sakor chungchuong mi vong an nih. 7 Chuong mi lienhai lai chun inphalraiin, a hurpui milim biek chu be vê peiin a’n sukporche a. 8 A tleirawl lai Aiguptaah inzor a, mihan zàlpui a, a tleirawl trâng vûm chûl a, an chàkna an hrǐkthlăk hlak lai nun kha a bansan ngai nawh. 9 Chuleiin, a ngaizawng le a hurpui Asuriahai kutah ka pêk tah a nih. 10 Anni chun kawlhnâmin an that a, saruokin an maksan a, a naupahai le naunuhai an lakpek a. A thil tuor chu nuhmeihai lai inthrǐna takin an hung hmang ta hiel a nih.

11 A sangnu Oholiba chun chu chu a hmu vong a, hur tieng le inzor a chakna chu a unu nêk daiin a zuolkai lem a. 12 Tlangval châkum tak tak vong Asuria mihai, a thren ram optu dam, kawmandar dam, raldo mi thuom famkima inthuom dam le sakor chungchuong mihai chu a hnot a. 13 Ama khom chu a’n sukporche ve a, an pahni chun lampui thuhmun an hraw a. 14 A hurna chu a hung zuol tul tul a. Kaldai ruol lim, sen vûta ziek, banga intâr chu a hmu a. 15 Chuonghai chun kawngchŭn an chŭn a, lukawm mawi tak an kâwm bŭr a, hang en ringot khoma hotu ni âwm hlie hlie an ni a, Kaldai rama Babulon mi sakor tawlailir khaltuhai lim a nih. 16 Anni a hang hmu chun a châk huom huom a, Kaldai ram chenin palai bawngte a tir a. 17 Babulon mihai chu an hung a, an hung zàlpui a, an sukporche a. Dit tawka an sukporchè hnung chun anni chu nghokin a zamsan a. 18 Chuonga uolâu taka inzor le inhlìm a thaw lei chun a unu ka nghatsan ang bokin beidongin ka nghatsan a. 19 Sienkhom, a tleirawl laia Aigupta rama a’n zor kha hre zingin a’n phalrài deu deu si. 20 Chuong laia a hurpuihai chu sabengtung ser ang ser nei, sakor chè zât zet chè suok thei an nih. 21 Chuong chu a ni leiin, i tleirawl hur vanglai, Aigupta mihaiin i nene tlăi a, i tleirawl trâng vûm an chûl hrep lai hun kha i ngai vong vong hlak a nih.

22 “Chuleiin, aw Oholiba, hieng hin LALPAN a tih: Ngai rawh, ngaizawng i lo umpui tah le hnàm êm êma i thrè tahai po po kha nangma khingtu dingin kil tina inthokin ka hung tir tawl ding a nih. 23 Babulon mihai le Kaldai mihai po po, Pekod mihai, Soa mihai, Koa mihai, Assuria mi po po, tlangval hmel thra tak tak, a thren ram optu dam, kawmandar dam, sakor tawlailir neitu dam, mi hmingthang dam, an renga sakor chungchuong mi vong chu hung an tih. 24 Anni chun hriemhrei chawiin, indona tawlailir hai, thil phurtu tawlailir hai le mipui tam tak thruoiin hung bei an ti che a, phaw chîn le phaw lien chawiin, dâr lukhum khumin sir tinah hung inhuol an ti che. An nuom dan ang anga i chungthu rêl le hrem ding chein an kutah ka pek suok ta chê a nih. 25 Ka thîkthu lungsen inling chu i chungah tlâng a ta, lungsen takin bei an ti che a, i hnâr le i nakawr ât thlang an ta, a la dam sunhai chu kawlhnâmin that an tih. I naunu le naupahai chu man an ta, an man bâng po chu meiin raw hlum an tih. 26 I silfen hlîppek vong an ti che a, i belmawi thra tak takhai khom lăkpêk an ti che. 27 Chuong ang chun Aiguptaa inthoka i chǐng tran hurna le nawchizorna chu suktawp ka ta, chuong tieng pang chu ngaiin mit inlèn ta naw ti ni a, Aigupta khom hre fu zing ta naw ti nih.

28 “Lalpa PATHIEN chun hieng hin a tih: ‘Ngai rawh, i theida, ngei ĕm êma i nghatsanhai kuta khan ka’n hlàn ding che a nih. 29 Theida takin soisak an ti che a, inrim taka i thaw rahai po po lakpek vong an ti che. I saruok inkhumna ding nei loin maksan an ti che a, i nawchizorna chu muolpho taka tar langin um a tih. 30 Hnam danghai hnota an milimhaia i’n sukporche leiin, i zauthauna le inphalraina chun hieng thil hi i chungah a hung intlun a nih. 31 I unu anga i khawsak vé pei leiin, tuorna no chu i kutah indomtir veng ka ti che.

35 “Chuleiin, Lalpa PATHIEN chun hieng hin a tih: Mi theinghil a, i mi hnungson tah leiin, i hurna le nawchizorna maw chu nangin phur i tih” tiin.

36 LALPA chun ka kuomah hieng hin a hril nawk a. “Mihriem naupa, Ohola le Oholiba chungthu chu i rêl naw ding am a ni? An thil chǐng tirdakum leh hmason rawh. 37 Anni chun nawchi an zor a, an kutah thisen a kai a nih. An milimhai hmaah an inzor a, ka ta dinga an mi hringpek, an nauhai chen khom an milimhai kuomah kàng hmang dingin meiah an inhlàn a. 38 Hi thil chauh hi ka chungah an thaw le! Ka hmun thienghlim an sukporche a, ka chawlnihai an bawsiet. 39 Milim hmaa an nauhai an inhlàn ni lá là, chu ni ngei chun ka Hmun Thienghlimah an lŭt a, ka in an hung sukporche hlak.

40 “Chuong naw khom chu, hla taka inthokin pasal an incha a, mi an tir a, an hung tlung chun anni epna dingin an insil fai a, an mit an nâl a, belmawi thrá thrà an inbel a. 41 Khum innêmah lo inthrungin, an hmaa dawkan lien tak chunga chun ka rimtui le ka hriekhai chu an lo zar a. 42 An bula chun nuomtawl inhawr khawm ri a so a. Chuonghai chu thlalera inthoka hung, mi hur le zu rui ruol an nih. Nuhmei le a sangnu chu bânbun an inbuntir a, lukawm mawi tak an inkawmtir a. 43 ‘Hieng anga tar ta hnung nawchizor dam an la zălpui nuom phot leh, zalpui ta raw hai se chu’ ka ta. 44 Chu char chu an thaw hrim a, nawchizor Ohola le Oholiba chu an zălpui a. 45 Nisienlakhom, mi felhai ruok chun uire le thisen insuo chìngah ngai an ta, thiem naw inchangtir ngei an tih; uire hmang an ni hrim a, an kutah thisen a kai rawn si a.

46 ‘Lalpa PATHIEN chun hieng hin a tih: Nangni beitu dingin mipui hung ko khawm ka ta, in roktir ka ti cheu a, soisak hrep an ti cheu. 47 Mipuiin lungin dêng an ti chêu a, kawlhnâmin sât bong an ti cheu a, in naunuhai le naupahai khom that an ta, in in pumin raw hmang an tih. 48 Chuong ang chun hurherna chu a rama inthokin sukbo ka tih, nuhmei po poin entona hmang tlak in ni nawzie an hriet theina dingin. 49 Nangni unau hin in inphalraina maw chu tuor in ta, milim in biekna leia in suolna maw khom chu phur in tih. Chu pha chun Lalpa PATHIEN chu ka nih ti hung hre tang in tih’ tiin” a ta.