Jerusalem suolnahai
22
1 LALPA thu chu ka kuomah a hung tlung a. 2 “Mihriem naupa, thisen insuo hmang khawpui chungthu hi i hril naw ding am a ni? A tirdakumna po po chu hmaisanah hril rawh. 3 A kuomah, ‘Lalpa PATHIEN chun hieng hin a tih: Aw khawpui, mani chunga sietna intlun dinga mani sunga thisen insuotu le milimhai siema insukporchètu, 4 thisen insuoa thiemnaw i phur lei le milimhai siema i’n sukporche leiin, i tawpna hun ding i kei hnai a, i tawpna kum a tlung mèk a, hnam danghai chèksol le ram danghai nuizatbûrah ka siem ding che a nih. 5 Aw, hming inpawi le buoinaa sip khawpui, i sè vèla umhai le ram hlaa umhaiin nuisaw’ng an ti che. 6 “Ngai ta, Israel mi lien tinin i sûnga thisen insuo dinga an thuneina seng an hang chelek dan êm êm hi! 7 I sûnga hin miin nu le pa an hmusit a; i sûngah ram dang mihai an suknomna a, fahrahai le hmeithaihai an nĕksawr a. 8 Ka hmun thienghlim an suknomna a, ka chawlnihai in bawsiet a, 9 sukhlum dingin mi an hĕk a, tlanga bawlhmunah inthawina ruoi fain an dawn a, hurna thilhai an thaw a. 10 I sûngah mani pahai khum sukporchètu le nuhmei thla pal laia pawl lui hlak an um a. 11 I sûngah mani tuolbawm nuhmei sukporchètu dam, mani mo inzakumthlak taka sukporchètu dam le mani farhai ngei suol lui dam an um a. 12 I sûngah mihaiin thisen insuo dingin thamna an làk a; a pung tam tak hnotin thil an inpŭktir a, tuolbawmhai thil tam tak an lakpek lui a, kei ngei khom in mi lo theinghil tah ti hi Lalpa PATHIEN thu suok a nih. 13 “Indik lo taka i hlĕprŭkna thua le nangma sunga thisen i’n suona thuah kut ben khum ka ti che. 14 Nang ka bei ni che chun, i huoisenna khan mi ngamin i kut hratna khan a mi tuor zo dinga i ngai am a ni? Kei LALPA hin ka hril ta chêu a, ka hril ang takin thaw bok ka tih. 15 Hnam tin lai sukdar ka ti chêu a, ram tinah indar in ta, in tirdakumna chu sukbo ka tih. 16 Hnamhai mithmua tirdakumah ka siem pha cheu chun LALPA chu ka nih ti hung hre tang in tih’ tiin hril rawh,” a ta. 17 LALPA thu chu ka kuomah a hung tlung nawk a. 18 “Mihriem naupa, ka ta ding chun Israel sungkuo chu thîr ĕk, rawtuina hmuna dâr hai, trîn hai, thîr hai le suonkàng êk ang chauh an ni tah. Tangkaraw tui êk ang char an nih. 19 Chuleiin, Lalpa PATHIEN chun hieng hin a tih: Thîr êk ang chauh in ni vong tah leiin, Jerusalemah dêng khâwm ka ti cheu. 20 Rawtuina mei sa taka raw tui dinga miin dâr hai, trîn hai, thîr hai le suon hai a lak khawm angin, kei khomin ka lungsen inlingin khawpui sungah la khâwm ka ti cheu a, raw tui ka ti cheu. 21 A nih, la khawm ka ti cheu a, in chungah ka lungsenna mei sem ka ta, chu taka chun intui ral in tih. 22 Rawtuina meia tangkaruo an raw tui anga raw tui in ni pha chun, kei LALPA hin ka lungsenna in chungah ka bun thlăk a nih ti hung hre ta’ng in tih’ tiin.Israel thruoituhai suolna
23 LALPA thu chu ka kuomah a hung tlung nawk a. 24 “Mihriem naupa, a ram chungthu hieng ang hin hril rawh: ‘Lungsen nia ruotui um nawna le ruo a sŭr ngai nawna ram chu i nih. 25 Sakeibaknei inrŭmin sa sĕ ding a vĕ lai ang elin anni laia mihai ngeiin an zawlneihai suksiet dan ding thu an phier a, mi hringna an dol a, an thil hlu le rosumhai an lakpèk a, nuhmei tam tak hmeithaiin an siem a. 26 An thiempuhaiin ka dàn an bawsiet a, ka hmun thienghlim an sukporche a, thil thienghlim le thil naran an thlei naw a, mi inthieng le mi inthieng naw danglamna a um nawh tiin an inchuktir a, ka chawlnihai an bawsiet a, anni lai tu khomin an mi’n zà nawh. 27 Anni laia hotuhai chun satene virkawngin a sa sè a kei chen ang topin, indik lo taka an hlèp ruk theina dingin thisen an insuo a, mi an that a. 28 An thilthawhai chu an zawlneihai chun inlàrna tehlèm hmuin le khêla âi sânin an tlip nàm a, ‘Hi hi Lalpa PATHIEN hril a nih’ an ta, LALPA hlak chun a biek tawl dĕr bok si nawh. 29 A ram mihai chun mi thil la luiin an rok a, mi pasehai le tlasamhai an nĕksăwr a, ram dang mihai chungthu indik naw taka rêlpĕkin an suknomna a. 30 Ram chu ka suksiet nawna dinga anni laia dai lo saktu ding le kan inkàra kut lo phartu ding mi ka zong a, ka hmu si nawh. 31 Chuleiin, an thilthaw phû angin an lu chungah ka lungsenna chu bun thla’ng ka ta, ka lungsen inlingin anni chu kàng hmang a tih ti hi Lalpa PATHIEN thu suok a nih,’ ti rawh” a ta.