LALPA kawlhnâm
21
1 Chun, LALPA thu chu ka kuomah a hung tlung a. 2 “Mihriem naupa, Jerusalem hmason la, an hmun thienghlimhai kal zawngin thu hril la, Israel ram chungthu ding hril lawk rawh. 3 Hieng hin hril rawh: ‘LALPA chun hieng hin a tih: Ka do ché a nih. Ka kawlhnâm chu a pâia inthokin phawi ka ta, mi fel le mi rilohai inang rongin râwt ka tih. 4 Sim le hmar inkara um mi fel le mi rilohai ka râwt ding a ni leiin ka kawlhnâm chu phawi zing ka tih. 5 Chu pha chun mi po poin, kei LALPA hin ka kawlhnâm chu ka phawi a nih ti hung hre tang an ta, a pâiah lut nawk ta naw nih.6 “Chuleiin, mihriem naupa, inrûm rawh! An hmaah lung na tak le beidong takin inrûm ngàwi ngáwi rawh. 7 ‘Ieng leia inrûm am i na?’ an ti che chun, ‘Chanchin pangzatum hung tlung ding leia inrûm ka nih. Lungril tin intui zop a ta, bân po po zoi thla’ng a ta, ngaituona po po chau tlep a ta, khûp po po tui angin zop thlang a tih’ ti rawh. Ngai rawh, a hung tlung mèk ie! Tlung ngei a tih, ti hi Lalpa PATHIEN thu suok a nih, ti rawh” tiin.
8 Chun, LALPA thu chu ka kuomah a hung tlung a. 9 “Mihriem naupa, hril lawk la, hieng hin ti rawh: ‘LALPA chun hieng hin a tih:
‘Kawlhnâm chu, kawlhnâm chu,
Tàt ngei le nàwt tler a ni tah:
10 Mi sàtna dinga tàt ngei,
Tle lep dinga nawt tlêt chu!
Ka naupa Juda lal hmol ringin,
Ei la hlim zing ding am a ni?
Kawlhnâm chun ieng ang hmol khom,
Tham naw hrim a nei dĕr nawh.
11 Kawlhnâm chu vai vêl dinga,
An innawt tlèttir a na,
Thattu kuta vilik dinga,
An intàt ngeitir a ni si a.
12 Mihriem naupa, inrûm la,
Inring takin khêk suok rawh,
Ka mihai tuor ding a ni si a;
Israel mi lien po pohai khom.
Ka mihai leh a ruolin,
Kawlhnâm kuomah an pèk suok;
Chuleiin, âwm inchum rawh.
13 Fiena hung tlung ngei a tih.
Kawlhnâmin ienga a ngai naw,
Juda lal hmol chu lo tawp ta sien,
Iengtin am ni ta’ng a ta?
Lalpa PATHIEN chun a tih.
14 “Chuleiin, mihriem naupa,
Kut benin thu hril lawk rawh.
Kawlhnâm chun voi hni sât sien,
Voi thum khom sât non raw se;
Mi thatna kawlhnâm a na,
Tam tak thatna ding a na,
Sîr tinah inlêng raw se.
15 An lungril zopna ding le,
Mi tam tak vai thlukna di’n,
Kotkhar bul tina hai chun,
Kawlhnâm ka sie vong a nih.
Kawlphê ang inlep zok zokin,
Thina chemsen chu an vilik.
16 Aw kawlhnâm, chang tieng sât la,
Voi tieng khom sât zot zot rawh,
I be nghatna tieng tieng chu.
17 Kei khomin kut ben ka ta,
Ka lungsen re ta’ng a tih,
Tiin LALPA chun a hril’
tiin hril tawl rawh” a ta.
Babulon lal kawlhnàm
18 LALPA thu chu ka kuomah a hung tlung nawk a. 19 “Mihriem naupa, Babulon lal kawlhnàm chu a hung tlung theina dingin lampui pahni sât la, chu lampuihai chu ram pakhata inthoka hung suok a ni ding a nih. Khawpui lutna kotsuo, lam pahnihai pèngnaa chun lam kăwkhmuna kăwkbàr siem rawh. 20 Kăwkbàr pakhat chun kawlhnâm lutna ding Amon mihai khuo Raba chu inkawktir la, kăwkbàr dang chun kawlhnâm lutna ding Judai ram le Jerusalem kul tieng chu inkawktir bok rawh. 21 Babulon lal chu lam thruoma chun chawl a ta, a thal bawma thalhai chu vawrin ai sân a ta, a milimhai râwn a ta, inthawinaa ran an inhlanhai thin le lung chu en bok a tih. 22 A aisanna thal vawr, Jerusalem tienga tlu po chu a kut chang tiengin lang a tih. Kul sut hongna dinghai siem a ta, mihai chu suom dingin thu pe’ng a ta, hawhawa kul kotkhar chu sut hong dingin hril a ta, kul inhuolna dingin a vêlin muol dêng pawngin, thramte daw kuol a tih. 23 Jerusalem mipuihai chun Babulon lal chu thu an thlungpui tah sa a ni leiin a aisan chu thil thlâwn elah ngai an ta, sienkhom a laka an suolnahai inhriettir dingin anni chu bei a ta, man tawl a tih.
24 Chuleiin, Lalpa PATHIEN chun hieng hin a tih: ‘In tuol helna chun in lungril suolzie le in thilthaw taphotah in suolzie in suklang leiin, chu thil in thaw lei chun sala thruoiin um in tih ti hi Lalpa PATHIEN thu suok a nih. 25 Aw nang Israel hotu, mi tirdakum le rilopa, i suolna leia hremna tawpkhawk i hmuna ni ding chu a hung tlung tah ie! 26 Lalpa PATHIEN chun hieng hin a tih: I lukawm kha hlîp la, i lallukhum kha la thla rawh. A hma ang kha ni ta naw nih: mi hnuoihnunghai chawi sang nîng an ta, mi lienhai suktlawm nîng an tih. 27 Sietna maw! Sietna maw! Ni e, sietna chu intlungtir mol ka tih! A neitu indik tak a hung hma chun indin thar ni ta naw nih; ama kuta chun pe’ng ka tih.
Amonhai chunga kawlhnâm
28 “Chun, nang mihriem naupa, Amon mihai chungthu le an mi hril sietna thua chun hieng ang hin hril rawh: ‘Lalpa PATHIEN chun hieng hin a tih: Nangma thatna dingin ka kawlhnâm chu phawi saa um a ni ta a, mi thatna ding le sukbohmangna dinga kawlphe anga nawt tlĕt a nih. 29 I zawlnei der le aisan thiemhaiin inlàrna der an hmupĕk che a, khêlin ai an sànpĕk bok che a. Mi rilo le mi suol i ni leiin, i ta dinga hremna tawpkhawk hung tlung ding chu a hung tlung mĕk a, i rîngah kawlhnâm inbûr a tih.
30 “Kawlhnâm chu a pâiah khum nawk el rawh. I pi le pu chengna ram, i pieng le murna ram ngeiah i chungthu chu rêl ka tih. 31 I chungah ka lungsenna mei buok ka ta, ka lungsen chokin hlieu ka ti che a, mi suksiet thiema chemkal mi tawrothai kutah pe suok ka ti che. 32 Meiah tǐng an ti che a, i ram ngêiah i thisen luong a ta, tu khomin hre zui ta naw ni hai che’ ti hi LALPA thu suok chu a nih, ti rawh” a ta.