4 Ka hei en a, hmar tienga inthoka thlipui hung inthok ka hmu a, sumpui sa mupa inthok chun kawl a hung inphe zor zor a, a vêl chu a el var phût a. Kawl inphètnaa mei chu thir inling ang a nih. 5 Chu meilinga chun thilhring pali ni awm tak, mihriem ruongàm put ni si hi, ka hmu a. 6 Thilhring tin chun hmai pali le thla pali an nei seng a. 7 An ke chu an inthluong ngìl a, an ke bawr chu bawng ke ang a na, dâr nawt tle angin a tle phût a. 8 Hmai pali le thla pali bâkah an thla hnuoia chun mihriem kut ang an nei seng a. 9 An thlahai chu an intawk phak vong a. Chu thilhringhai chu khaw tieng tieng khom inhêm ngai loa an hma zawna vuong suok thei nghal an nih.

10 Thilhring palihai inlang dan chu an hma tieng mihriem hmêl, an chang tieng sakeibaknei hmèl, an voi tieng bawngchal hmêl, an hnung tieng mupui hmèl ang a nih. 11 Chu chu an hmèl put dan a nih. An thla pahni seng chu a hmawr intawk phakin an zâr seng a, an thla pahnihai chun an taksa an inkhum a. 12 Thilhring palihai chun khaw tieng khom inhèm kuol ngai loin thlarau fena tieng tieng chun an fe nghal thei a. 13 Thilhringhai hmèl chu meiling amanih meiser chok lai amanih ang a na, anni lai chun mei a lawn kuol a, a var hle a, chutaka inthok chun kawl a hung inlep a. 14 Thilhringhai chu kawlphê angin an invir ton zok zok a.

15 Thilhring palihai ka en zing lai chun, an sîr sengah tawlailir, hnung le hmaa sîr bik nei chuong lo, hnuoia innghat ka hmu bok a. 16 Tawlailirhai chu an inang vong a, lunghlu krisolit angin an var phăt seng a, tawlailir ke kuol sunga tawlailir ke dang um ang hi a nih. 17 Inher loin khaw tieng ngha khomin an inlir thei a. 18 Tawlailir ke kuol chu insang tak le râpum tak a na, a rei kuol tlang chu mit ngotin a sip a. 19 Thilhringhai chu an fe son pha leh tawlailirhai khom chun an zui a, an tho leh an tho ve pei a. 20 Thilhringhai chu thlarau fena tieng tieng an fe a, tawlailirhai khom chun an zui pei a, tawlailir kea chun thilhringhai thlarau chu a um si a. 21 Thilhringhai chu an fe pha tawlailirhai khom an fe a, an ngìr pha an ngîr ve a, hnuoia inthoka an inkàng pha an inkàng ve pei a, tawlailir kea chun thilhringhai thlarau chu a um si a.

22 Thilhringhai lu chunga chun boruok inkŭm ang zâu tak, râpum deu el, vûr anga tle sur el hi a’n zàr duoi a. 23 Chu inchung zâu tak hnuoia chun thilhringhai chun thla hmawr intawkin an thla pahni seng chu an zàr a, an thla pahni dang chun an taksa an inkhum a. 24 An vuong laia an thla zàp ri chu tuipui insok ri dam, sipai ruol hawhaw ri dam le Iengkim Pathien rawl ang a nih. An vuong naw pha leh an thlahai chu an inkhup a.

25 Vuong loa thla inkhupa an chung inkhumna zau tak hnuoia an um lai chun an lu chung tienga inthok chun rawl a hung suok a. 26 An lu chunga chun lalthrungpha ni awm tak, safir lunghlu ang ela inlang hi a um a, chu hmun insang tak chunga lalthrungphaa chun mihriem ni awm tak hi a’n thrung a. 27 A kâwnga inthoka chung tieng chu dâr tle sût angin ka hmu a, a kâwng hnuoi tieng chu mei chok angin ka hmu bok a, var ropui takin a tuom vèl a. 28 Raw sŭr zoa sumrisâng inzàm ang phŭtin a vêla chun a’n zàm a. Hi hi Pathien ropuina inlang dan chu a nih. Chu chu ka hmuin bokkhupin ka tlu a, thuhriltu rawl ka hriet a.