Ezekiel a kona
2
1 Chun, ka kuomah, “Mihriem naupa, ngîr suok la, thu ka hril ding chè a nih” a ta. 2 Ka kuoma thu a hril lai chun thlarau chu keimaah a hung lut a, a mi’n ngirtir a, a thu hril chu ka ngaithlak a.3 Ama chun, “Mihriem naupa, Israel nauhai, hnam hel hmang tak le ka chunga hel zing zing hlakhai kuomah ka tir ding chè a nih; anni le an thlatuhai chu voisun chen hin ka lakah an la hel zing a nih. 4 Ka tirna che mihai hi hnam lulul le timaw tak an nih. An kuomah, ‘Lalpa PATHIEN chun hieng hin a tih’ i ti ding a nih. 5 Sungkuo hel hmang an ni leiin, i hril chu an awi ta’m, an awi naw ta’m, anni lai zawlnei a um ti an hriet ve hrim hrim ding a nih. 6 Nang mihriem naupa, anni chu trì naw la, an vauh che khomin zâm bok naw rawh. Thrŭl le hling kârah, ainuvĕt ruol laia um ni la khom, tri dêr naw rawh. Hel hmang sungkuo an nia chu an vaupŭm le inthrìnahai chun sukzâm naw raw se che. 7 Hel hmang hnam an na, an ngaithlak ta’m, an ngaithlak naw ta’m, an kuomah ka thu i hril ding a nih. 8 Mihriem naupa, nang ruok chun ka hril hi ngaithla la, anni hel hmang sungkuo ang hin hel ve naw rawh. I bau ka la, ka pék pèk ché chu fa rawh” a ti a.