Babulon chungthu hrilna
50
1 Babulon chungthu, Kaldaihai ram chungthua Jeremia hmanga LALPA hrilhai chu:2 “Hnam tin lai hrilin puong rawh,
Puonzar khaiin puong suok rawh,
Iengkhom ip nei dêr naw rawh.
Hieng hin i hril ding a nih:
Babulon chu tlawm a ta,
Bela chu muolpho dèr a ta,
Tritnan Marduk sip a ta,
A hmêl chu inzak a ta,
A limhai thlaphâng an tih.
3 Hmar tienga hnam pakhatin,
Ama chu hung do a ta,
A ram suktlaran a ta,
Tu khom chêng ta naw ni a,
Mi le sa zâm hmang an tih.
4 “Chu hun le ni a tlung pha,
Israel le Judahai chu,
Hung insuikhawm ta’ng an ta,
LALPA an Pathien zongin,
Trap pumin hung pan an tih.
5 Zion lampui indonin,
Zion tieng ngha ta’ng an ta,
Hungin LALPA chel an ta,
An theinghil ta ngai lo ding,
Kumkhaw thuthlung thlung an tih.
6 Ka mihai chu beram angin,
An lo inhmang zo ta a,
Berampuhan thruoi suolin,
Tlânga hai an invàk hmang a.
Muol le tlâng dunghai hrawin,
An inchek dar ta vong a,
An huong khom an hriet ta nawh.
7 A hmú hmùn an lo fàk a,
‘Ieng poi khom kan tawk dèr nawh,
LALPA, an tlatna huongpui,
An thlatuhai beisei chu,
An suol hmangsan lei a nih’
Tiin an ràlhan an hril.
8 “Babulon chu tlànsanin,
Kaldai ram chu màksan ro,
Kèl ruol thruoitu kelchal ang,
Nangni khom hung ni ta ro.
9 Babulon hung bei dingin,
Hmar tienga hnam ropuihai,
Suikhâwmin chok tho ka ta,
Ama chu hung ep an ta,
Hmar tieng panga inthokin,
An hung làk ding a ni si.
Kut ruoka kîr ngai dèr lo,
Ral do thiemhai thal angin,
Hlawsama kir um naw nih.
10 Babulon chu rok an ta,
A roktuhai tlai an tih,”
Ti hi LALPA thu suok a nih.
Babulon siet ding thu
11 Nang ka rochanhai roktu,
Bu chîltu bawngla tuoi angin,
Bupawl lai invêl kuolin,
Sakorchal inhràm angin,
Hlima lawmin um la khom,
12 I nu la’n zak hlèng a ta,
A hringtu che hmaimawk a tih-
Hnamhai laia hnuoihnung tak,
Thlalĕr ram trawl le fil ang,
I la ni ding a ni si a.
13 LALPA lungsenna leiin,
Hluoin um ta naw ni a,
Rausan dèrin um a ta,
Babulon sir taphotin,
A hliemna zozai lei chun,
Pangzatin diriem an tih.
14 Thalngul chawituhai poin,
Babulon inhuol unla,
Kâp ro, in thal ren naw ro,
LALPA lakah a suol si a.
15 Sir tinah hawhaw’n nor ro:
Ama ngei a hung inpĕk,
A râlvêngbŭk a tlu ie!
A kul bang a chim dur dur.
LALPA thungrul ni a na,
Mi a thaw dăn ang charin,
A chungah phuba la ro.
16 Babulona inthokin,
Chi thètu le bu âttuhai,
An rêngin hnot hmang unla,
Hung nêktu kawlhnâm triin,
An mihai umna panin,
An ram tieng tlân seng raw se.
17 Sakeibaknei hnot dar angin,
Israelhai chu an tlàn dar a;
Asuria lalin a fak hmasa phot a,
A tawpa an rû chen kăwltu chu,
Babulon lal Nebukadnezzar a nih.
Israelhai suok ding thu
18 Chuleiin, Israelhai chungthua chun Iengkim LALPA, Israel Pathien chun hieng hin a tih:
“Asuria lal ka hrem ang khan,
Babulon lal le ram hrem ka tih.
19 Sienkhom Israel ruok chu,
A tlatnaah thruoi kîr ka ta,
Karmel tlang le Basan ramah,
Efraim le Gilead muolah,
Khop takin tla nâwk a tih.
20 Chu hun chu a tlung pha chun,
Israel bawsietnahai chu,
Zong suok tumin dap an ta,
Sienkhom ieng khom um naw nih.
Juda suolna hrim hrim khom,
Hmu ding um ta bok naw nih,
A dam sun, ka hlahai chu,
Ka ngaidam ding a ni si”
Ti hi LALPA thu suok a nih.
Babulon chunga LALPA rorel
21 Merathaim ram chu bei unla,
Pekod-a chênghai khom chu;
Hnotin, thatin, râwt ram unla,
Ka thupêk ang takin thaw ro”
Ti hi LALPA thu suok a nih.
22 A ramah indona rî a so a,
Sietna ri râpthlak tak chu.
23 Leihnuoi tubo lien tak el,
Babulon chu a koi dar a,
A va hang se nasa de aw!
Hnam tin lai Babulon chu,
A va hang ram nasa de!
24 Aw Babulon, ka châng kamah,
I’n ring hma’n i awk chieng de!
Hmu suok le man i ni tah,
LALPA chu i khing leiin.
25 LALPA chun a lungsenna
Hriemhreihai la suok dingin,
A ralthuom siena a hong a,
LALPA, Iengkim LALPA chun,
Kaldai ramah thaw ding a nei.
26 Kawl kil tina inthokin,
Ama chu hung bei unla,
A sum siekhawmna hongin,
Bu hûm angin deng vûm ro.
Iengkim sukse vong unla,
Hlà ieng khom nei dêr naw ro.
27 Ran thatna inah thruoiin,
A bawngchal tuoi that vong ro.
Hrema an um ni ding chu.
A hun a hung tlung ta si a,
An chung a va hang pik ngei!
28 A tempul suksetuhai laka,
LALPA ei Pathien phuba lak dan,
Babulona inthoka tlân suok,
Raltlân kirhan Zion tlanga,
An hril chu lo ngaithla ro.
29 Babulon beitu dingin,
Thal kap thiemhai ko khawm ro.
Tlân suok um dèr lo dingin,
A vêlin inhuol tlat ro.
A thilthaw thungrul unla,
A thaw angin thaw ve ro,
LALPA, Israel Mi Thienghlim,
Poisa loa a khing ngam leiin.
30 Chuleiin, a tlangvalhai,
Kotthlêra hai tlung an ta,
Ni khat thil thu ringotin,
A sipaihai chimit an tih”
Ti hi LALPA thu suok a nih.
31 Ngai rawh, aw nang mi chapo,
Khingin ka do ché a nih;
I ni ding chu a tlung tah,
Hremna i tuor hun ding chu,
Iengkim LALPA chun a tih.
32 Mi chapo inpal thlùng a ta,
Tu khomin kei tho naw nih;
A khuohai rawpêk ka ta,
A vêla umhai po po leh,
An rêngin kàng hlum a tih.
33 Iengkim LALPA chun a hril:
“Israelhai le Judahai chu,
Suknomnatin an um a,
Sala mantuhai po po chun,
Nghet takin an chel tlat a,
An insuo nuom hrim hrim nawh.
34 Sienkhom an Tlantu chu a hrât,
A hming chu Iengkim LALPA a nih.
Ama chun a kûl a tâia tranin,
An ramah muongna intlun a ta,
Babulona chênghai ruok chun,
Muongna hrim hmu naw ni hai.
35 “Babulona chêng Kaldaihai,
An mi lien le varhai chungah,
Kawlhnâm inlĕngtir ka tih”
Tiin LALPA Pathienin a hril.
36 A zawlnei derhai chungah,
Kawlhnâm inlĕngtir ka ta,
Mi invêt inchang an tih.
A pasalthrahai chungah,
Kawlhnâm inlĕngtir ka ta,
Thlabârnain sip an tih.
37 A sakor le tawlailirhai,
Hnam dang an sorhai chungah,
Kawlhnâm inlĕngtir ka ta,
An rêngin thaiduop an tih.
A ro sie khawlhai chungah,
Kawlhnâm inlĕngtir ka ta,
A rosumhai rok an tih.
38 A tuikhurhai chunga khom,
Kawlhnâm inlĕngtir ka ta,
A rêngin kang vong a tih,
Milim pangzatum tamna,
An invĕtchilna ram a nih.
39 Thlalĕra ram sakolhai le
Satene ruolin hluong an ta,
Chingpirinuhai chêng an ta,
Hluo ni ta ngai naw ni a,
Suon a’nthok suon dang chenin,
Tu khom chêng ta naw ni hai.
40 Sodom le Gomorra khuo le
An sè vela khuo po po,
Sukram a ni vong ang khan,
Tu khom um ta naw ni a,
Tu khom cheng ta bok naw nih”
Ti hi LALPA thu suok a nih.
41 En ta, hmar tienga inthokin,
Sipai ruol an hung a ni saw!
Hnuoi kil tawpa inthokin,
Hnam ropui le lal tam takhai,
An hung inthok a ni saw!
42 Phaw le feihai an chawi a,
An răwng a, ngil an nei nawh.
Tuipui so hum hum angin,
Sakor chungah an hung chuong;
Râl bei dinga insingsain,
Aw nang Babulon naunu,
An hung rŭn ding che a nih.
43 Babulon lalin a hriet chun,
A bân a zoi thla vong a,
Nuhmei nau hase angin,
Lungngainain a man dè.
44 Jordan ngawa sakeibakneiin,
Phŭla ran ruol tla thrawng thut a,
A hnot dar chum chum angin,
Kaldaihai chu hnot suok ka ta,
A chunga thuneitu ding,
Ka dit ang ang ruot ka tih.
Keima ang tu’m an um a?
Mi cho thei tu hrim am an um?
A tu berampu hrimin am,
An mi cho thei ding a na?
45 Babulon le Kaldai chunga,
LALPA thaw tum hi ngai ro:
Ran tèhai chu kei hmang a ta,
Ran tlatna hmun po po chu
Anni leiin sukram a tih.
46 Babulon tlawm riva chun,
Hnuoi nghor hning dur dur a ta,
A trap ri chu hnam tin lai,
A thangkhawk ding a ni si.