3 Chuongchun, Habazinia naupa Jeremia naupa Jazania le a unauhai le an naupahai po po le Rekab sungkuo po po kuoma chun ka fe a. 4 An rêngin LALPA tempula Pathien mi Igdalia naupa Hanan naupahai pindana chun ka hung thruoi a, chu pindan chu tempul hotuhai pindan bul, kotkhar vengtu Salum naupa Maseia pindan chunga um a nih. 5 Rekab sungkuohai hmaa chun berbu le no iemani zat, uoiin sung sip chu ka sie a, “Uoiin hi dawn ro khai” ka ti a.

6 Nisienlakhom, anni chun, “Uoiin chu kan dawn ngai nawh. Kan thlatu Rekab naupa Jonadab chun, ‘Nangni le in thlahai tu khomin kumkhuoin uoiin in dawn ding a ni nawh; 7 in bawlin, thlai chîngin, grep huon in siem ding a ni bok naw a, in umna rama hin in dam sawt theina dingin in dam sung puon inah in cheng ding a nih,’ tiin thu a mi pek a. 8 Kan thlatu Rekab naupa Jonadab-in trongbaua thu a mi’n cha po pohai- kan dam sunga keini le kan nuhmeihai le kan naupahai le naunuhaiin uoiin dawn lo ding dam, 9 kan chengna ding in bawl lo ding dam, grep huon siem lo ding dam, thlai ching lo ding- tihai dam chu kan zawm a, 10 puon inah kan um lem a, kan thlatu Jonadab thupek po po chu awiin kan zawm vong a nih. 11 Babulon lal Nebukadnezzarin ram a hung bei lai khan, ‘Thaw ro, Kaldai sipai ruol le Aram sipai ruolhai laka ei him theina dingin Jerusalemah tlàn ei tiu’ kan ta, kan hung a, kan chĕng ve el tah a nih” an ta.

12 LALPA thu chu Jeremia kuomah a hung tlung nawk a. 13 “Israel Pathien, Iengkim LALPA chun hieng hin a tih: Judai rama mihai le Jerusalema mihai kuomah fe la, an kuomah, LALPA chun, ‘Ka thuhaia inthoka thil thra inchûkin in zawm naw ding am a nih?’ a ti a nih. 14 ‘Rekab naupa Jonadab chun a nauhai kuomah uoiin dawn lo dingin thu a pêk a, an thlatu thupek chu inza ĕm êma zawmin voisun chen hin an dawn naw a nih. Kei chun voi tam ka hril non ka hril non ta cheu a, sienkhom ka thu hrim in zawm nawh. 15 Ka rongbawltu zawlneihai chu in kuomah ka hung tir rop hlak a. In kuomah, “Mi tinin in um dan suol maksan unla, in thil chìnghai thlâkin insiem thar unla, pathien danghai rong bawl dingin zui naw ro. Chuongchun, nangni le in thlahai kuoma ka pek rama hin chêng in tih” tiin an hril hlak cheu a, sienkhom in bengkhon naw a, in mi ngaithlak nuom bok nawh. 16 Rekab naupa Jonadab thlahai ruok chun an thlatu thupĕk an zăwm a, hi mihai ruok hin chu ka thupêk an ngaithlâk si nawh. 17 Chuleiin, Iengkim LALPA, Israel Pathien chun hieng hin a tih: Ngai ro, Judai ram le Jerusalema chênghai po po chungah sietna hung intlun dinga ka lo hril tahai po po kha ka hung intlungtir ding a nih. An kuomah thu ka hril a, an mi ngaithlak nuom si naw a, anni ka ko leh an mi don bok si nawh” tiin.

18 Jeremia chun Rekab thlahai kuomah, “Iengkim LALPA, Israel Pathien chun hieng ang hin a tih: ‘In thlatu Jonadab thupĕk in zăwm a, a thu suok po po in zui a, a ti dan ang taka in thaw leiin, 19 Rekab naupa Jonadab chun kumkhuoin ka hmaa rongbawla ngîr ding mi invâi ngai naw nih’ ti hi Iengkim LALPA, Israelhai Pathien thu suok a nih” tiin a hril tawl a.