2 “LALPA, Israel Pathien chun hieng ang hin a tih: ‘Juda lal Zedekia kuomah fe la, a kuomah hieng hin hril rawh: ‘Hi hi LALPA thu chu a nih. Hi khawpui hi Babulon lal kutah ka pek trêp ta a, ama chun meiin raw’ng a ta, 3 a kuta inthokin intâl suok naw top i tih. Man an ti che a, a kutah peng an ti che a, bau ngeiin inbepui i ta, Babulon ramah i fe dinga nih. 4 Amiruokchu, aw Juda lal Zedekia, LALPA thutiem hi ngaithla pei rawh. I chungchang thua chun LALPAN hieng hin a tih: kawlhnâma sukhlum ni nawng i ta, thlamuong takin chawl i ta, 5 i hmaa lal lo thi tah i pi le puhai ang bokin nang khom an sŭnna le inzănain rimtui rawng an ta, ‘Aw Pu’ tiin sûn an ti che’ ti hi keima ngeiin ka tiem a nih’ ti hi LALPA thu suok a nih” tiin.

6 Zawlnei Jeremia chun chuong thuhai po po chu Jerusalema Juda lal Zedekia chu a hril a. 7 Babulon lal sipai ruolin Jerusalem an inhuol lai chun Judai rama kul nei khuo dang an la lak naw chu Akis le Azeka hai chauh a ni tah.

8 Hebrai mi bawipa amanih bawinu amanih nei po poin an bawihai insuo vong dinga Lal Zedekia-in Jerusalema um mipuihai chu thu a thlungpui hnungin Jeremia kuomah LALPA thu a hung tlung a. 9 Chu dungzui chun, mi tinin Hebrai mi bawi an neihai chu a nuhmei a pasalin an insuo ding a na, tu khomin mani Juda chanpuihai hrim hrim bawiah an sie ding a ni ta nawh. 10 Chuong ang chun hotuhai le mipuihai chun an bawi kol senghai chu insuo zalen an remti a, an insuo a. 11 Amiruokchu, iemani chen hnungah an lungril an thlak a, an bawi insuohai chu la kirin bawiah an siem nawk a.

12 Chuongchun, LALPA thu chu Jeremia kuomah a hung tlung a. 13 Ama chun “Hi hi LALPA, Israel Pathien hril chu a nih: In pi le puhai Aigupta bawia inthoka ka hung thruoi suok lai khan thu ka thlungpui a. 14 An kuomah, ‘Tu khomin in unaupa Hebrai mi, in kuomah an hung zora in inchawk chun, kum ruk in rong a bawl pha, a kum sarinaah in insuo zalen ding a nih’ tiin ka hril a. In thlatuhai chun ka thu an ngaithlak naw a, an mi uksak bok nawh. 15 Tu lai hnai el khan inlamletin ka mithmuah thil indik in thaw a, mi tinin in unau chanpuihai chu in insuo zalen a. Ka hming put tempula chun ka hmaah thuthlung in siem a. 16 Amiruokchu, in lungril in thlak a, in nuom dan ang taka in insuo in bawinu le bawipahai chu in thruoi kir a, ka hming in suksiet a, in bawia sie nawk dingin in lak lui tawl nawk tah hi.

17 “Chuleiin, LALPA chun hieng hin a tih: Ka thu in zawm naw a, in unau chanpuihai chu zalenna in pek nuom nawh. Tu hin kawlhnâm le tràmpui le hripuiin zalen taka a nuoi ding cheuin zalenna ka puong a, hi hnuoia lalramhai po po pangzat kai in tih. 18 Ka thuthlung bawsetuhai po po le ka hmaa an thutlung zawm si lohai chu bawng tuoi tan bong, a bong kara fe thleng ang charin siem veng ka tih. 19 Judai ram le Jerusalema hotuhai, rorêltuhai, thiempuhai le a rama chenghai po po, bawng tuoi tan bong kara fe thlenga thu an thlung hlen lotuhai chu, 20 that tuma zongtu an hmèlmahai kutah peng ka ta, an ruonghai chu chungleng vate le hnuoia ramsahai tlàn ding chauh ning a tih.

21 “Juda lal Zedekia le a rawihai chu that tuma zongtu an hmêlmahai le Babulon lal sipai ruol, anni trìnsantuhai kuta chun peng ka tih. 22 Hi khawpuia hung kir nawk ding hin thu peng ka ta, hung bei nawk an ta, lâng an ta, raw ram vong an tih. Judai ram khawpuihai chu hluotu um loin sukram ka tih” ti hi LALPA thu suok a nih.