Jeremia lekhabu an raw
36
1 Juda lal Josia naupa Jehoiakim inlala inthoka kum linaa chun Jeremia kuomah LALPA thu a hung tlung a: 2 “Lekhabu ziel la la, chu taka chun i kuoma ka thu hril tah po po, Israel chungthu dam, Juda chungthu dam, hnam po po chungthu dam, Josia hun laia i kuoma ka hrila inthoka voisun chena thil tlunghai po po chu ziek thla rawh, 3 an chunga sietna ka’n tlungtir tum po po chu Juda sungkuoin an ngaithlak a, mi tinin an um dan suol an nghatsan a, an ritlona le suolna ka ngaidam thei takduoiin” a ta.4 Jeremia chun Neria naupa Baruk chu a ko a, a kuoma LALPA thu hril po po chu Jeremia chun a hril a, savun lekhaah Baruk chun a lo ziek thlak pei a. 5 Jeremia chun Baruk kuomah, “LALPA tempula fe thei lo dinga khuokhir ka ni si a. 6 Chuleiin, nang fe la, ka baua inthoka LALPA thu ka hril, lekhabu ziela i ziek kha chawi la, bu nghei niah LALPA tempula um mipuihai hriet ngeiah tiem suok rawh; Juda mi, an khuoa inthoka hunghai po po hrieta khom tiem suok bok rawh. 7 Mihaiin an um dan suolhai inlamlet a, LALPA hmaah ngaidam an inhni takduoiin ka ti a nih. LALPA thu puong, a mihai laka a lungsen inling dan hi a rapthlâk êm si a” a ta. 8 Neria naupa Baruk chun zawlnei Jeremia hril angin lekhabua LALPA thuhai chu LALPA tempula chun a tiem suok ta a.
9 Juda lal Josia naupa Jehoiakim inlala inthoka kum ngana thla kuonaaa chun Jerusalema mi po po le Judai ram khawpui hrang hranga inthoka Jerusalema hung po po chun LALPA hmaa bu nghei thu an puong a. 10 Baruk chun LALPA tempul lutna Kotkhar Thar chuonchunga ziektu Safan naupa Gemaria pindana inthokin Jeremia thu dong lekhabua um chu mi po po hrietah a tiem a.
11 Safan naupa Gemaria naupa Mikaia’n lekhabua mi LALPA thuhai po po a hriet chun, 12 lal inah a fe thla a, ziektu pindana chun a lut a, chu taka chun ziektu Elisama hai, Semaia naupa Delaia hai, Akbor naupa Elnathan hai, Safan naupa Gemaria hai, Hanania naupa Zedekia hai le hotu danghai chu an lo inthrung a. 13 Mikaia chun mihai hrieta Barukin lekhabua mi a tiem thuhai chu a hriet ang angin a hril tawl a. 14 Hotuhai po po chun Kusi naupa Selemia naupa Nethania naupa Jehudi chu Baruk kuomah an tir a, “Mihai hrieta i tiem lekhabu chu chawiin hung rawh” tia hril dingin thu an incha a. Chuongchun, Neria naupa Baruk chu lekhabu ziel chawiin a hung a. 15 Anni chun, “Inthrung la, kan hriet ngeiah tiem ve raw khai” an ta, Baruk chun a tiem tran a. 16 Chuong thuhai an hang hriet chun triin an inen a. Baruk kuoma chun, “Hieng thu po po hi lal kan hril ngèi ngéi ding a nih. 17 Hieng thu po po hi iengtinam i ziek thlak a na? Jeremia-in a hril che a ni? tiin an indon a. 18 Baruk chun, “Ni e, aman a hril a, keiin savun lekhaah lekhatuiin ka lo ziek thlak a nih” a ta. 19 Hotuhai chun Baruk kuomah, “Fe la, Jeremia leh inbi hmang ro; tu khomin in umna hre naw raw hai se” an ta.
Lalin lekhabu ziel a raw
20 Ziektu Elisama pindanah lekhabu ziel chu an sie hnungin lal tuolzawla chun lal kuomah an fe a, an thu hriet po po chu an hril a. 21 Lal chun lekhaziel chu la dingin Jehudi a tir a, ziektu Elisama pindana inthok chun a hung lak a, lal le a bula ngir hotuhai hrieta chun a tiem a. 22 Thla kuona a ni ta a, lal chu a thlasik ina chun a hmaa thuka mei chu awiin a thrung a. 23 Jehudiin thlep thum amanih thlep li amanih a tiem zo chun lal chun a chemtein lekhabu ziel chu a ât bong a, thuka chun a hmatiemin a rênga a raw hmang vong chenin a dĕng lût pei a.
24 Lal le a thoktuhai, hieng thu po po ngaithlatuhai chun trit hmêl an put naw a, silfen kei thlêr khom an um bok nawh. 25 Elanathan hai, Delaia hai le Gemaria hai chun lekhabu ziel chu raw hmang lo dingin lal kuomah an ngên raka chu a thrahnem chuong nawh. 26 Chuong nêk hmanin, lal chun a naupa Jeramel le Azriel naupa Seraia le Abdel naupa Selemia hai chu ziektu Baruk le zawlnei Jeremia chu man dingin a tir a. Sienkhom, anni pahni chu LALPAN a thuprŭk a.
Jeremian an ziektir nawk
27 Jeremia thu hril sawng Barukin a lo ziek thlak po po lalin a raw hmang hnung chun LALPA thu chu Jeremia kuomah a hung tlung a: 28 “Lekhabu ziel dang la la, lekhabu ziel hmasaa thu po po, Juda lal Jehoiakimin a raw hmang tahai chu ziek thla nawk vong rawh. 29 Juda lal Jehoiakim chungchang thua chun hieng hin hril rawh: LALPA chun hieng hin a tih: ‘Babulon lal chu hung ngei a ta, hi ram hi hung suksein, hi taka um a mi le sahai hi sukbohmang vong a tih’ tia inziekna lekhabu chu nangin, ‘Ieng dinga chuong thil chu i ziek am a na?’ tiin lekhabu ziel chu i lo raw hmang a. 30 Chuleiin, Juda lal Jehoiakim chungthua chun LALPAN hieng ang hin a tih: Davida lalthrungphaa inthrung ding mi nei naw ni a, a ruong khom sŭna nisa lum em chăr ding le zăna vûr del dingin pei suok an tih. 31 A rìtlona leiin ama le a thlahai le a rongbawltuhai chu hrem ka ta; anni le Jerusalema chênghai le Juda mihai chunga sietna hung tlung ding ka puong tahai, an ngaithlak nuom lo po po chu hung intlungtir ka tih” tiin.
32 Jeremia chun lekhabu ziel dang a lak a, ziektu Baruk, Neria naupa chu a pêk a, ama chun Jeremia baua inthoka thu, a hmaa lekhabua a ziek thlak tah po po, Jehoiakimin meia a raw hmanghai chu a ziek suok nawk vong a, chuong thu le inkungkei thu iemani zat a bel sa bok a.