Jerusalem tungding nawkna ding
33
1 Lal in vengtuhai inkulna huong sunga Jeremia an intangtir lai chun LALPA thu voi hnina chu a kuomah a hung tlung a. 2 “Hnuoi indintu, duong suoktu le suknghettu LALPA, a hming LALPA chun hieng hin a tih: 3 ‘Mi hung ko la, don ka ti che a, thil ropui le i zong suok phak ngai lo dinghai chu hril ka ti che. 4 LALPA, Israel Pathien chun hieng hin a hril: Babulona mihaiin an inhuolna cheu laka thrang khawna ding le kul suknghetna dingin in inhai le lal in chen thriek hiel inla khom, 5 Babulon mihai chu hung lût tho an ta, ka lung inling leia ka sukhlumhai ruong chun hi khawpui hi sip a tih, an rîtlona leiin hi khawpui laka hin ka hmêl ka thup ding a ni si a.6 “Amiruokchu, damna le hrilselna hung intlungtir nawk ka tih. Ka mihai chu sukdam ka ta, muongna le himna hnienghnâr takin tlàn an tih. 7 Juda le Israel chu an saltangnaa inthokin hung thruoi kîr ka ta, a hmaa an nina ang bokin suknghet nawk ka tih. 8 Ka laka an suolna chu tlêng fai ka ta, ka laka an helna po po chu ngaidam ka tih. 9 Hi khawpui chunga hin thrat insuo a, hmuingilna le muongna hnienghnâr taka ka vùrzie hmutu hnuoia hnamhai chu maktiin, anni triin inthin an ta, chuonghai hmaa chun hi khawpui hi kei mi sukhlimtu, suklawmtu le chawimawitu hung ni tang a tih.
10 ‘LALPA chun hieng hin a hril: ‘Hi hi hmun rausan le ram tah hnung, sa le mihriem an chĕng ta nawna hmun a nizie in hril hlak. Sienkhom, rausan hnung Judai rama khuohai le Jerusalem kotthlêr hai, mi le sa an chĕng ta nawna hmuna ngei hin, 11 hlimna le lawmna ri le mo le moneitu rawl ri hai, LALPA tempulah,
LALPA kuomah lawmthu hril ro,
LALPA chu a thra si a,
A ngilneinan kumtluong a dai
tia hlanbiekna thilhlân an hung inhlàn rihai la hung hre nawk in tih. A ram vangneina chu a hmaa ang bokin ka tungding nawk ding a ni si a’ ti hi LALPA thu suok a nih.
12 “Iengkim LALPA chun hieng hin a tih: Mi le sa an chĕng ta nawna hmun rausan le khawpui ram hnung hmun tina chun ran tlatna hmun hring hung um nawk a ta, chuong hmuna hai chun berampuhan an beramhai intlattir an tih. 13 Tlâng ram khuoa hai, phai ram khuoa hai, sim tieng khawpuia hai, Benjamin rama hai, Jerusalem le a se vela hai le Judai ram khawpuia hai berampuhaiin an beramhai la hung tiem nawk mol mol an tih’ ti hi LALPA thu suok a nih.
14 “‘Ngai ta, Israel sungkuo le Juda sungkuo laka ka thu tiem inzaum tak chu ka hlen suok ni ding a hung tlung mĕk a nih’ ti hi LALPA thu suok a nih.
15 ‘Chu ni le chu huna chun,
Davida zungzăma inthokin,
Felna Zâr inder suoktir ka ta,
Ama chun fel tak le indik takin,
A ramah ro hung rêl a tih.
16 Chuong nia chun Juda chu,
Sanhimin um tang a ta,
Jerusalem khawpui khom,
Him takin um tang a tih.
‘LALPA, Kan Felna chu’
Ti hi a hming ning a tih.’
17 “LALPA chun hieng hin a tih: ‘Davida chun Israel sungkuohai lai lalthrungphaa inthrung ding mi invâi ngai naw nih; 18 thiempuhai, Levi chia mihai khomin ka hmaah pumraw thilhlânhai le bu le bâl thilhlânhai inhlàn zingtu ding mi invâi bok naw ni hai’ ti hi” a ta.
19 LALPA thu chu Jeremia kuomah a hung tlung a: 20 “LALPA chun hieng hin a tih: ‘Sŭn le zăn ta dinga thuthlung ka ruothai ve ve hi sukdanglam a, an hung tlung hun ding taka tlung lo dinga sŭn le zăn in siem thei a ni chun, 21 ka rongbawltu Davida kuoma a lalthrungpha hluotu ding mi a nei zing dingzie thu ka thlung khom sukdanglam thei ni chau a tih; chuong ang bokin ka rongbawltu Levi chihai le thiempuhai kuoma ka thuthlung khom thriek thei ni chauh a tih. 22 Ka rongbawltu Davida thlahai le ka hmaa rongbawltu Levi thlahai khom vana arasi tiem seng lo ang le tuipui kama trieu tiem seng lo anga tamin sukpung ka tih.”
23 LALPA thu chu Jeremia kuomah a hung tlung a: 24 “‘LALPA thlang sungkuo hnihai ram chu a suksiet tah’ tia mihai hril hi i lo hriet ve hlak am? Chuong ang chun ka mihai chu hmusitin hnama khom an tiem sa ve ta naw a nih. 25 LALPA chun hieng hin a tih: Sŭn le zăn kuoma thuthlungtu ni lo a, hnuoi le van um dan dinghai ruottu ka ni naw a ni chauin, 26 Jakob thlahai le ka rongbawltu Davida thlahai chu pei hmang ka ta, Abraham hai, Isak hai, Jakob hai thlahai chunga rorêltuah a thlahai chu inumtir naw ning. An vangneina chu tungdingin, ka lunginsiet tawl ding a ni si a” tiin.