4 “Hi hi Iengkim LALPA, Israel Pathienin Jerusalema inthoka Babulona sala an thruoihai kuoma a hril chu a nih: 5 ‘Inhai bawlin umhmun khuor unla, thlaihai chingin a tharsuok fa ro. 6 Nuhmei pasal inneiin, naupa le naunuhai nei unla, in naupahai nuhmei ding zongpek unla, in naunuhai pasal ding zongpek bok ro, nangni anga thla an hung nei theina dingin. Chu taka chun hung pung unla, kiem tieng pan naw ro. 7 Sala ka tirna cheu khawpui ta dinga thratna chu zongin LALPA kuomah hni ro; a hmuingil chun a zar in zo ve ding a ni si a. 8 A nih, hi hi Iengkim LALPA, Israel Pathien hril chu a nih: ‘Nangni laia zawlneihai le aisan thiemhai hlĕmin um naw ro. An mang hmu an hril cheu chu ngaithla naw ro. 9 Ka hmingin khêl thu an hril cheu a ni kha. Anni chu ka mi tirhai an ni nawh’ ti hi LALPA thu suok a nih.

10 “Hi hi LALPA hril chu a nih: ‘Kum sawmsari a tlingtla pha leh Babulon ramah hung kan ka ti cheu a, in kuoma ka thu tiem nghet tak chu hlen ka ta, hi hmuna hin ka thruoi kir nawk ding cheu a nih. 11 In hmuingilna ding dam, thil thra lo in chunga a tlung nawna ding dam, beiseina neia hma tieng in thlir theina ding dama in ta dinga ka remruot chu keimain ka hriet’ ti hi LALPA thu suok a nih. 12 Ka hming lamin, ka kuomah hung trongtrai in ta, lo ngaithlang ka ti cheu. 13 Mi zong in ta, in lungril po poa in mi zong huna chun mi hmung in tih. 14 Nangni hmu theiin um tang ka ta, hnam tin lai le ram tina ka hnot darna cheu hmuna inthok chun thruoi khawm nawkin, in saltangnaa inthokin thruoi kîr ka ti cheu’ ti hi LALPA thu suok a nih.

15 “LALPA chun Babulon rama khom kan ta dingin zawlnei a mi’n dinpek” in ti khom a ni el thei. 16 Davida lalthrungphaa inthrunghai le Jerusalema la chambang, Babulon tienga sala thruoi sa ve lo in unauhai chungchang thu LALPAN a hril chu hieng ang hi a nih. 17 A nih, Iengkim LALPA chun hieng ang hin a tih: ‘An chungah kawlhnâm le tràm le hripui inlĕngtir ka ta, theichang hrŭt, fak tlâk dĕr lo angin siem ka tih. 18 Kawlhnâm le tràm le hripuiin hnot zui ka ta, hnuoia lalram po po intentir ka ta, mi trongsie le pangzat phur an ta, ka sukdarna hmuna hnam po po hmusit le hal kawng ning an tih. 19 An kuomah ka thu hriltu ding ka siehlaw zawlneihai ka tir ka tir khoma an lo ngaithlak nuom si nawh. Nangni saltanghai khomin in ngaithlak chuong bik nawh’ ti hi LALPA thu suok a nih.

20 “Chuleiin, Jerusalema inthoka Babulona ka thon hmang, nangni saltang po pohai, LALPA thu hi ngaithla ro. 21 Ka hming sâla in kuoma khêl thu hril hlaktu Kolai naupa Ahab le Maseia naupa Zedekia chungthua Israel Pathien, Iengkim LALPA hril chu hi hi a nih: ‘Babulon lal Nebukadnezzar kutah peng ka ta, in mithmu ngeiah anni chu sukhlum a tih. 22 Anni lei chun Judai rama mi Babulona saltang po po chun, ‘Babulon lalin meia a raw hlum Zedekia le Ahab angin LALPAN i chungah thaw ve raw se’ ti hi trongsie inphurna tronglamkeiah hung hmang pha hiel an tih. 23 Israel ramah thil invêt thlak tak an thaw a, an tuolbawmhai nuhmei an uiretpui a, ka hming sâlin, ka thupek ni si loin, khêl thu an hril a. Chu chu kei a hmutu le hretu ka nih’ ti hi LALPA thu suok a nih” tiin.

24 Nehelam mi Semaia kuomah hi thu hi hril rawh. 25 “Israel Pathien, Iengkim LALPA chun hieng hin a tih: Nangma thuin thiempu Maseia naupa Zefania kuomah lekha i thon a, thiempu dang po pohai le Jerusalema mipuihai kuomah a kawpi i thon tawl a. Zefania kuoma chun, 26 ‘LALPA tempul enkoltu dingin LALPAN Jehoiada aiin thiempuah a ruot che a, mi invêt, zawlnei inti taphothai chu thir kol i’n buntir ding a nih. 27 Ieng dinga Anathot khaw mi Jeremia, in kuoma zawlnei anga hung insàl kha i zil naw am a na? 28 Babulona dam lekha a hung thon a, ‘In sal intang sung ding hi a sawt leiin in bawlin umhmun khuor unla, huonhai siemin a tharsuok chu fa ro’ dam a hung ti a nih” tiin.

29 Semaia lekhathon thiempu Zefania-in a hmu chun Jeremia kuomah a chawi a, a tiem a. 30 Chu phing leh LALPA thu chu Jeremia kuomah a hung tlung a: 31 “Hi thucha hi saltanghai kuomah thon rawh: Nehelam mi Semaia chungthua LALPA thu suok chu hi hi a nih: Semaia kha ka tir ni si loin thu dam a hril lawk a, khêl thû a’n ringtir chêu a. 32 Chuleiin, LALPA chun hieng hin a tih: Nehelam mi Semaia le a thlahai chu hrem ngèi ngéi ka tih. Ka laka hel thu a puong leiin hieng a mihai lai hin tu khom dam khawsuok um naw ni hai a, ka mihai ta dinga thil thra ka thaw dinghai khom hmu phak bok naw nih’ ti hi LALPA thu suok a nih,” tiin.