Jeremia le zawlnei tehlêm Hanania
28
1 Juda lal Zedekia inlala inthoka a kum lina, thla nganaa chun Azur naupa zawlnei Hanania, Gibeon mi chun thiempuhai le mipui po po hmaah LALPA tempula chun a mi biek a, ka kuomah,” 2 Iengkim LALPA, Israel Pathien chun hieng hin a tih: Babulon lal rîngkol chu suktliek ka tih. 3 Babulon lal Nebukadnezzarin LALPA tempula inthoka bûr le bèl a lak po po chu kum hni sungin hi hmuna ngei hin hung inthaktir nawk vong ka tih. 4 Hi hmuna hin Juda lal Jehoiakim naupa Jehoiachin le Babulona fe Juda mi sala intânghai po po khom hung thruoi kir nawk vong ka ta, Babulon lal rîngkol chu ka suktliek ding a nih’ ti hi LALPA thu suok a nih” tiin a hril a.5 Chu phing leh zawlnei Jeremia chun LALPA tempula ngir thiempuhai le mipuihai hmaa chun zawlnei Hanania chu a don a. 6 “Amen, chuong ang tak chun LALPAN thaw sien ni ding maw! LALPA tempula bûr le bèlhai le saltanghai chu i hril ang chun LALPAN thawin hi hmuna hin hung intlungtir nawk vong raw se. 7 Amiruokchu, nangma le mipuihai hriet phâk ngeia ka hril hi lo ngaithla rawh. 8 Kha hma daia inthok tah khan, nang le kei ei inlang hma khan zawlneihai chun ram tam tak le lalram tam tak chunga indona dam, sietna dam le hripui dam hung tlung ding thu an lo hril lawk hlak a. 9 Muongna hun hung tlung ding thu hril lawktu zawlnei hrilhai chu a hung tlung pha leh chu zawlnei chu LALPA tir a ni le ni naw chieng el a tih” a ta.
10 Zawlnei Hanania chun zawlnei Jeremia ringkol bat lai chu a lak thlak a, a suktliek a. 11 Mipui po po hmaa chun Hanania-in, “Hieng hin LALPA chun a tih: Hieng ang bok hin Babulon lal Nebukadnezzar ringkol chu kum hni sung ngeiin hnamhai po po ringa inthokin suktliek ka tih’ a ti a nih” a ta. Chu phing leh zawlnei Jeremia chun a maksan ta a.
12 Zawlnei Hanania-in zawlnei Jeremia ringkol bat a suktliek hnung chun LALPA thu chu a hung tlung a, 13 “Fe la, Hanania kuomah hieng ang hin va hril rawh: Thing ringkol chu i suktlieka chu a aiah thîr ringkol i siempek lem a ni hi. 14 Hieng ang hin Israel Pathien, Iengkim LALPA chun a hril: Babulon lal Nebukadnezzar rong an bawl theina dingin hieng hnam po po hi thîr ringkol i’n battir a nih; ama rong bawl an ta; ram hnuoia ramsahai chen khom ama ka pek bok a nih, tiin. 15 Zawlnei Jeremia chun zawlnei Hanania kuomah, “Ngai rawh, Hanani, LALPAN a tir awzawng naw che! Hieng mihai hi khêl thu inringtir i tum mei mei a ni lem hi. 16 Ngai ta, hnuoi chunga inthok hin ka sukbohmang dai ding che a nih ti hi LALPA thu suok a nih. LALPA laka helna thu i tlâng insampui leiin tu kum ngei hin thing i tih” a ta. 17 Chu kum thla sarinaa chun zawlnei Hanania chu a thi ta a.