A mihai kuoma LALPA thu tiem
30
1 Jeremia kuoma LALPA thu hung tlung chu: 2 “Hi hi LALPA, Israel Pathien hril chu a nih: ‘Ka thu hril po po che hi lekhabuah ziek thla rawh. 3 Ngai ta, ka mi Israel le Juda saltanghai ka thruoi kir nawk hun le an thlatuhai rochung dinga ram ka pĕka ka tungding tawl nawk hun chu a hung tlung mĕk a nih’ ti hi LALPA thu suok a nih. 4 Israel le Juda chungthua LALPA thuhai chu hieng hi a nih: 5 LALPA chun hieng hin a tih:
“‘Thlaphâng trap rawl ka hriet,
Muongna ni lo, lungphâng ri.
6 Indonin hang en vĕl tu’m,
Pain nau hase a tuor hlak maw?
A ni si naw chun ieng lei a,
Nuhmei nau hase ang a,
Pasal tinin an tăi dom a,
An hmăi a dâng am a na?
7 Chu ni râpthlăk dingzie chu,
A tlukpui um thei naw nih.
Jakob beidong ni a na,
Sienkhom san suok ning a tih.
8 “Iengkim LALPA chun hieng hin a tih: ‘Chu ni chun an ringkol bàt chu suktliek ka ta, a hrui chu sukchat ka ta, ram dang mihaiin anni chu rongbawltuah hmang ta ngai naw ni hai. 9 LALPA an Pathien le an lal dinga ka tungding ding Davida rong chu bawl lem tang an tih.
10 Chuleiin, aw ka siehlaw Jakob,
Lungphâng hrim hrim naw la,
Aw Israel, zâm der naw raw khai,
Ti hi LALPA thu suok chu a nih.
Ram hla takah um la khom,
San suok ngei ka ti che a,
I saltangna rama inthokin,
I thlahai chu san suok ka tih.
Muongna le himna hmunah,
Jakob chu chêng nawk a ta,
Thlabârin um ta naw nih.
11 Umpuiin hum ka ti che,
Ti hi LALPA thu suok a nih.
Ka sukdarna cheu hnamhai,
An rêngin sukram lang khom,
Sukram vong nawng ka ti cheu.
A hun tawkin thunun ka cheu,
Hrem lo chun suok naw ti niu.”
12 LALPA chun hieng hin a tih:
“I hliemna sukdam ruol an nawh,
A bè sukdam thei a ni nawh.
13 I pânna sukdam dingin,
Enkoltu che an um naw a,
Damdawi hrim a um bok nawh.
14 I’n koppuihai po po khan,
An theinghil vong ta che a,
Ngaisak chê an um ta nawh.
Hmêlma angin ka vuok che a,
Mi tawrot angin ka hrem che,
I bawsietna a râpthlak a,
I suol dan a hluor nasa bok si.
15 Ieng dinga i hliem leia
I trap khek ringot am a na?
I natna sukdam ruol an nawh;
I bawsietna a râpthlăk a,
I suol a hluor nasa bok si.
Chuong thil lei chun i chungah,
Hieng hi ka’n tlungtir a nih.
16 Nangma fa ramtuhai chu,
Fak ramin um veng an ta,
In hmêlmahai po po chu,
Salah la’n tàng ve’ng an tih.
A hung roktuhai cheu chu,
Mihaiin rok ve’ng an ta,
Râl lâka latu che chu,
Râl lâkin la ve’ng an tih.
17 Sukhrisel nawk ka ti che a,
I hliemhai sukdam ka tih,
LALPA thu suok chun a tih,
‘Tu ngaisak lo le hnungson
Zion’ an ti che leiin.
18 LALPA chun hieng hin a tih:
Jakob puon ina chênghai,
Hung intuoi thar nawk ka ta,
Anni lunginsiet ka ta,
An muol le tlâng ngeia chun,
An khawpui tlu ram hnung chu,
Hung indin thar nawk ka tih.
19 Chu mihaia inthok chun,
Lawmthu hrilna hlahai le
Lawmna ri hung suok a ta,
Anni chu sukpung ka ta,
Tlawm tieng pan ngai naw ni hai.
Anni chu chawisang ka ta,
Endong ni ta nawng an tih.
20 Tuta hmaa ang bokin,
An nauhai hung pung an ta,
An khaw tlanga chênghai chu,
Ka hmaah phun nghet ka ta,
Anni nêksawrtu taphot,
Keiman hrem pei tawl ka tih.
21 Anni mi le sâ ngei chu,
An thruoitu hung ning a ta,
An rorèltuhai khom chu,
Anni mi bok ning an tih.
Ka bulah hung thruoi ka ta,
Aman mi hnai ta’ng a tih.
Keimain ka fiel naw chun,
Tu’n am mi hnai ngam a ta?
Ti hi LALPA thu suok a nih.
22 Chun, ka mihai ning in ta,
Kei in Pathien ning ka tih.
23 En ta u, LALPA lungsenna thlipui,
Thlipui intûr ngul el chu,
Mi rilohai nuoi dingin,
A hung hrăng thla ding a nih.
24 A thil tum a hlen hma chun,
A lamlĕt naw ding a nih.
Ni la hung tlung dinga chun,
Hi hi la hre thiem in tih.