Jeremia rîngkol băt umzie
27
1 Juda lal Josia naupa Zedekia inlal tran hlimin LALPA kuoma inthokin hi thu hi a hung tlung a. 2 LALPA chun, “Rîngkol tuk la, a hrui inbûk la, i rîngah bât rawh. 3 Edom lal hai, Moab lal hai, Amon lal hai, Tura lal hai le Sidon lal hai kuoma chun Jerusalema Juda lal Zedekia kuoma an palai hung tirhai hmangin thu thon rawh. 4 Hieng thu hi an puhai kuoma hril dingin thon rawh: Israel Pathien, Iengkim LALPA chun hieng hin a tih: 5 ‘Ka thilthawtheina ropui tak le ka bân pharin hnuoi chunga mihriemhai le ramsahai hi ka siem a, ka pĕk nuom nuom kuomah ka pêk a. 6 Tu khom hin ka rongbawltu Babulon lal Nebukadnezzar kutah hi ram po po hi ka pêk tah a, ramsahai khom ama rong bawl dingin ka pêk ta bok a nih. 7 A tlăkran hun a tlung hma chun hnam po poin ama le a nauhai le a tuhai rong bawl an ta, chu hnung chun a siet hun hung tlung a ta, hnam hrang hrang le lal tum tumin an thu hnuoiah sie ve thung tang an tih.8 “Amiruokchu, hnam amanih ram amanih tu khom Babulon lal Nebukadnezzar rîngkol bât nuom lo le a rong bawl nuom lo an um chun chuonghai chu amain a tukdol hmain kawlhnâm le tràm le hripuiin keiman hrem tawl ka tih. 9 In zawlnei hai, aisanthiem hai, mang hril fie thiem hai, rau ko thiem hai le dawithiem haiin in kuomah, ‘Babulon lal rong bawl naw ti niu’ an ti chun an thu ngaithla naw ro. 10 Keiin in rama inthoka hla takah ka hnot suok pha theina ding cheu le in bohmang theina dingin in kuomah khêl thu an hril hlak a nih” ti hi LALPA thu suok a nih. 11 Amiruokchu, Babulon lal rîngkol bât a, a rong bawl nuomtu hnam chu an ram ngaiah inumtir ka ta, a hnuoi inlet an ta, chu taka chun chêng zing an tih” ti hi LALPA thu suok a nih.
12 Juda lal Zedekia kuomah chu thu char chu hieng hin ka hril a: “Babulon lal rîngkol bât unla, ama le a mihai rong bawl unla, chuongchun him in tih. 13 Babulon lal rong bawl nuom lo hnam chungthu LALPAN a hril tah ang khan, ieng leiin am kawlhnâm le tràm le hripui leiin nang le i mihai chu in thi ding a na? 14 Zawlnei tu khomin, “Babulon lal rong bawl naw ro” an hung ti chun ngaithla naw ro, khêl thu an hril mei mei a ni lem. 15 Anni chu ka tir an ni naw a, ka hming sâlin khêl thu an hril hlak a, nangni le in kuoma thu hung hriltuhai chu hnot suok a, ka sukbo theina ding cheua an hung hril a nih” ti hi LALPA thu suok a nih.
16 Chun, thiempuhai le mipuihai kuoma khom ka hril bok a. LALPA chun hieng hin a tih: In kuoma zawlnei tu khomin, ‘Ngai ro, Babulona inthokin LALPA tempula bûr le bĕlhai chu an hung chawi kir nawk vak ding a nih’ an ti chun awi naw ro, khêl thu an hril chêu a nih. 17 Anni chu ngaithla naw ro. Babulon lal rong bawl unla, hring in tih. Ieng leiin am hi khawpui hi sukrama a um ding? 18 Zawlnei an ni a, LALPA thu an kuomah a um a ni chun, LALPA tempul le Juda lal in le Jerusalema bûr le bel la umhai chu Babulon tienga tol a ni nawna dingin Iengkim LALPA kuomah ngen lem raw hai se. 19 Chuong ang chun Iengkim LALPA-in dâr ban hai, dâr tuizĕm hai, thilthruta hmang tawlailir hai le bûr le bĕl, khawpuia an maksanhai chungchang thu a hril a ni kha. 20 Babulon lal Nebukadnezzar-in Juda lal Jehoiakim naupa Jehoiachina le Judai ram le Jerusalema mi thra po po Babulon tienga sala a thruoi khan chuonghai chu a lâk sa naw hrim a nih. 21 A nih, LALPA tempul le Juda lal in le Jerusalema thil maksana la umhai thu kha Iengkim LALPA, Israel Pathien chun a hril a nih. 22 “Chuonghai chu Babulon tieng lakin um an ta, anni ka hung kan hmâ po chu chutaka chun um zing a ta, keiin la kîr nawk ka ta, hi hmuna hin sie kîr nawk ka tih” ti hi LALPA thu suok a nih.