Jeremia that an tum
26
1 Juda lal Josia naupa Jehoiakim inlal tran tìr lai LALPA thu chu Jeremia kuomah a hung tlung a. 2 LALPA chun hieng hin a hril a: LALPA tempul tuol sungah ngir la, Judai ram hmun hrang hranga inthoka LALPA tempula chawibiek dinga hunghai kuomah hi thu hi hril rawh: Thu ka pekhai po po che kha hmai nei dêr loin hril vong rawh. 3 Ngaithla a, an um dan suol maksan khom an um miel el thei a nih. Chuong a ni chun, an suolna leia an chunga sietna intlungtir ka tum chu intlungtir loin ka thû sût ka tih. 4 Nangin an kuomah, ‘Hi hi LALPAN a hril: Mi ngaithla lo a, in hmaa zawm dinga ka sie ka danhai zawm lo a, 5 in ngaithlak naw sa khoma ka hung tir rop hlak ka siehlaw zawlneihai thu in ngaithlak nuom naw zing chun, 6 hi in hi Siloa ang hin siem ka ta, hnuoi chunga hnam po po trongsephurin um a tih’ tiin hril tawl rawh” tiin.7 Thiempu hai, zawlnei hai le mipui hai chun LALPA tempula Jeremia thu hril chu an ngaithlak a. 8 Mipuihai kuoma hril dinga LALPAN thu a pek po po a hril zo chun thiempu hai, zawlnei hai le mipui hai chun an man a, “I thi ngei ding a nih. 9 Ieng dinga LALPA hming sâla, ‘Hi tempul hi Silo ang la ning a ta, hi khawpui hi hluotu um loin la rausan an tih’ tia i hril am a na?” an ta. LALPA tempula chun mipuiin Jeremia chu an bawr huoi huoi a.
10 Hieng thu hi lal ina Juda hotuhaiin an hriet chun tempulah an hang fe a, LALPA tempul lŭtna Kotkhar Thara chun an inthrung a. 11 Thiempuhai le zawlneihai chun hotuhai le mipuihai kuomah, “Hi khawpui siet ding thu hi a hril lawk leiin hi pa hi thi tlâk a nih. In nâ ngeiin a hril khom in hriet kha!” an ta.
12 Jeremia chun hotuhai le mipuihai kuomah, “In thu ngaithlak tah po po ang khan, hi tempul le hi khawpui siet ding thu hi hril dingin LALPAN a mi tir a nih. 13 Chuleiin, tuhin in um dan le chet dan insiem thra unla, LALPA in Pathien thu chu awi ro, chuongchun LALPAN in chunga sietna hung tlung ding a puong tah chu sût nawk a tih. 14 Kei ruok chu in kuta um ka ni hi; indik le thra in ti dan ang angin mi thaw ro. 15 In mi sukhlum chun nangni le hi khawpui le a sunga chênghai chungah poi tawk lo thisen maw chu tlâng a tih ti hre ro; LALPA chun in hriet ngeia hieng thuhai hi indik taka hril dingin a mi tir si a” a ta.
16 Hotuhai le mipuihai chun thiempuhai le zawlneihai kuomah, “Hi mi hi thi ding a ni nawh! LALPA ei Pathien hmingin ei kuoma thu a hung hril a ni hih” an ta. 17 A ram mi upa iemani zat an hung ngir suok a, mipui pungkhawm hmaa chun, 18 “Juda lal Hezekia hun lai khom khan Moreset mi Mika khomin Juda mi po po kuomah, “Iengkim LALPA chun hieng hin a hril:
‘Zion chu lo anga inlet ning a ta,
Jerusalem tlu se rum a ta,
Tempul muol chimbukin bawm a tih”
tiin a lo hril lawk a ni kha.
19 Juda lal Hezekia le Judahai khan ama chu an sukhlum am a nih? LALPA triin, LALPA ditsakna an ngèn a, LALPAN an chunga sietna intlungtir dinga a puong ta chu a sût nawk a ni naw am a ni? Sietna rapthlak tak chu eini ngeiin ei tong buok trĕp lem a ni hi! 20 Mi dang, Kiriat Jearim mi, Semaia naupa Uria khomin LALPA hmingin hi khawpui siet ding thu hi Jeremia ang bok hin a hril lawk ve kha. 21 Lal Jehoiakim le a mi lienhai po po le hotuhaiin an hriet chun Uria chu lalin sukhlum a tum a, sienkhom Uria-in a lo hriet a, triin a tlan hmang a, Aigupta ramah a fe a. 22 Lal Jehoiakim chun Aigupta ramah Akbor naupa Elnathan le mi iemani zat a tir a. 23 Uria chu Aigupta rama inthokin an hung thruoi kir a, lal Jehoiakim hmaah an thruoi a, kawlhnâmin a sât hlum a, mi naran phŭmnaah a ruong an pei lŭt a ni kha” an ta.
24 Chu bakah, Safan naupa Ahikam chun Jeremia chu a tran tlat leiin, that dingin mipui kuomah an pek lut ta naw a nih.