4 Chun, LALPAN in kuomah rongbawltu zawlneihai a hung tir rop hlaka chu an thu in ngaithlak naw a, an hrilhai in poisa bok nawh. 5 Anni chun, “‘Mi tinin in um dan suol le thil thra naw thaw in ching kha bansan un la, nangni kuoma le in thlatuhai kuoma tiena tlanga inthoka kumkhuoa dinga LALPAN a pèk chêu rama chun chêng thei in tih. 6 Pathien danghai be ding le an rong bawl dingin zui naw unla, in kuta siem milimhaiin mi cho lungsen naw unla, chuongchun sukna nawng ka ti cheu’ tia LALPA hril chu an kuomah an puong hlak a ni kha. 7 Nisienlakhom, in mi ngaithlak naw a, in kuta siem thilhaiin in mi cho phawk a, nangni le nangni chungah thil thra lo in intlun a ni kha” ti hi LALPA thu suok a nih.

8 Chuleiin, Iengkim LALPA chun hieng hin a hril: “Ka thu in ngaithlak si naw leiin, 9 hmar tienga hnamhai po po chu incha’ng ka ta, ka sie hlaw Babulon lal Nebukadnezzar ko ka ta, hi ram le a sunga umhai le a kawl vela hnam chênghai po po chu hung bei an tih. Sukbohmang vong tawl ka ta, mi pangzat le endong ning an ta, kumkhuoin tlu ram an tih. 10 Hlimna le lawmna ri hai, mo le moneitu rawl ri hai, bu rawt ri hai le khawnvar êng hai po po suktawp vong ka tih. 11 Hi ram pumpui hi rausan ramah inchangtir ka ta, Babulon lal rong kum sawmsari sung bawl an tih.

12 ‘Kum sawmsari a’n voi pha leh Babulon lal le a hnam, Kaldai mihai chu an suolna leiin hrem ka ta, kumkhuoin sukram ka tih” ti hi LALPA thu suok a nih. 13 “Ka hril tah po pohai, hi lekhabua ziek po pohai le hnamhai chungthua Jeremia hril lawk tah po pohai chu, chu ram chunga chun hung intlungtir ka tih. 14 Hnam tum tum le lal ropui tak tak hai chun anni chu salah thruoi ve thung an ta, an thilthaw ang pei le an kut sinthaw ang phû peiin ka thungrul ding a nih” tiin.

15 LALPA, Israelhai Pathien chun ka kuomah hieng hin a tih: “Hi ka lungsenna uoiin no hi ka kuta inthokin la la, ka tirna ding che hnamhai chu indawntir rawh. 16 Dawn an ta, pêm tliei tliei an ta, anni laia kawlhnâm ka’n lengtir ding lei chun invêt zo an tih” tiin.

17 LALPA kuta no chu ka lâk a, a mi tirna hnamhai po po chu ka’n dawntir a. 18 Jerusalem le Judai ram khuoa hai fein, an lalhai le hotuhai chu chu noa inthok chun ka’n dawntir a, chu taka inthoka voisun chen hin rausan hmun, mi pangzat, nuisaw le trongsephur an hung ni ta pei a nih. 19 Chun, Aigupta ramah fein, Faraw le a mi lienhai, thoktuhai le mipuihai chu kan biekpui a, chu no triuma mi chu an dawn bok a, 20 anni bakah a rama chêng ram dang mihai khomin an dawn a. Uz rama lalhai dam; Palestina rama lal po po, Askelon le Gaza le Ekron khuoa lalhai le Asdod khuoa maksana la umhai dam; 21 Edom le Moab le Amon thlahai dam; 22 Tura le Sidona lalhai le tuipui kam rama lalhai dam; 23 Dedan hai, Tema hai, Buz hai le ram hlaa chenghai dam; 24 Arabia rama lalhai po po le thlalera ram dang mi chênghai po po dam; 25 Zimri hai, Elam hai le Media hai lalhai dam; 26 hmar tieng lalhai, hmun hla le hnaia mihai le hnuoia lalram po poin an dawn a. An dawn seng hnung chun Sesak lal^b khomin dawn veng a tih.

27 Iengkim LALPA, Israelhai Pathien chun hieng hin hril rawh a mi tih: Dawn unla, inrui unla, inluok unla, tlu unla, tho ta naw ro, nangni lai kawlhnâm ka hung tir ding a ni si a. 28 Sienkhom, i kuta inthoka no chu la nuom loa an dawn nuom bok naw chun, an kuomah hieng hin hril rawh: ‘In dawn ngei ding a nih’ ti hi Iengkim LALPA thu suok a nih. 29 ‘En ta u, ka hminga ko khawpui chunga hman sietna ka’n tlungtir tran a na, nangni lem chun hremna pumpel thei in inring hrim hrim am a ni? Hremna pumpel naw top in tih, hnuoia chênghai po po chungah kawlhnâm ka’n let ding a ni si a’ ti hi Iengkim LALPA thu suok a nih. 30 “Chuleiin an kuomah hieng thuhai hi puong la, hieng hin hril rawh:

33 Chu nia chun LALPA thathai chun hnuoi tawpa inthoka hnuoi tawp chen dâp an ta, sûn lo le lak khawm lo le phûm loin um an ta, hnuoi chungah hmunhnok angin pei dar an tih.