Theichang bawm hni
24
1 Babulon lal Nebukadnezzarin Judahai lal Jehoiakim naupa Jehoiachin le Juda hotuhai, mi themthiemhai le thirsuhai leh Jerusalema inthoka Babulon tieng sala a thruoi hnung khan LALPA tempul hmaa theichang bawm hni inthrut chu LALPAN a mi’n entir a. 2 Bawm pakhata chun theichang hmin thra tak tak, a ra hmasa chi ang chu a um a, bawm danga chun theichang thra lo, fak tlak lo khopa sie a lo um a. 3 LALPA chun ka kuomah, “Jeremia, ieng am i hmu a?” a ta. Kei chun “Theichang ka hmuh. A thren chu a thra hle a, a thren chu fak tlak loa sie a nih” ka ta.4 LALPA thu chu ka kuomah a hung tlung a. 5 “LALPA, Israelhai Pathien chun hieng hin a tih: Juda lal saltanghai, Kaldaihai rama an thratna dinga ka tir suokhai chu, hieng theichang ra thra ang hin ka en tawl ding a nih. 6 An thratna dingin an chungah mit inlèn zing ka ta, hi rama hin thruoi kir nawk ka ta, anni chu thriek hmang loin tungding ka ta, phawi hmang loin phun lem ka tih. 7 Kei hi LALPA ka nizie an mi hriet theina ding lungril peng ka tih. Ka mihai ning an ta, kei an Pathien ning ka ta, an lungril po po leh keima tieng an hung ngha kir nawk ding a ni si a.
8 “Theichang thra lo, fak thei lo khopa sie ang hin Judahai lal Zedekia le a thoktuhai le Jerusalema la chambang, hi rama la umhai le Aigupta rama chênghai chu nghatsan tawl ka tih. 9 Ka hnot hmangna khawlai rama khom mihai tirdak le theida dingin siem tawl ka ta, mi vîn le hal kawng, mi nuizat le trongsie phurin um an tih. 10 Anni le an thlatuhai kuoma ram ka peka inthoka sukbohmang anni hmâ khat chu anni lai kawlhnam le tràm le hripui inlengtir ka tih” tiin.