Kâu indik
23
1 “Ka ran tlatna hmuna beramhai suksetu le sukdartu berampu chu a chung a va hang pik ngei” ti hi LALPA thu suok a nih. 2 Chuleiin, LALPA, Israelhai Pathien chun ka mihai enkoltu berampuhai kuomah hieng thu hi a hril: “Ka ran ruolhai sukdar a, hnot hmang a, in enkol thra naw leiin, in thilthaw indik naw leiin ka hrem ding cheu a nih,” ti hi LALPA thu suok a nih. 3 “Ka ran ruol, hlaa la um sunhai chu ka hnot darna hmuna inthokin thruoi khawm nawk ka ta, an huongah tla nawk an ta, chu taka chun nasa takin hung pung an tih. 4 Anni enkoltu ding berampu sieng ka ta, triin an thla phang ta naw ni a, tu khom inhmang um ta nawng an tih” ti hi LALPA thu suok a nih.5 “Ngai ta, Davida ta dinga felna kau zâr ka hung insuopek hun ding chu a hung tlung ding a nih” ti hi LALPA thu suok a nih. Ama chu lalah inthrung a ta, var taka ro rêlin, a ram pumah indik tak le fel takin thil hung thawng a tih. 6 Ama inlal sung chun Juda chu sanhimin um a ta, Israel chu muong takin um a tih. A hmingah EI FELNA LALPA tiin ko an tih.
7 “Chuongchun, chu hun chu a hung tlung ding a ni tah” ti hi LALPA thu suok a nih. “Chu pha chun, ‘Aigupta rama inthoka Israelhai thruoi suoktu hring zing LALPA hmingin’ ti ta loin, 8 ‘Hmar tieng ram le a hnot darna ram po poa inthoka Israel thlahai hung thruoi khawm nawktu hring zing LALPA hmingin’ tiin thu inkhâm lem tang an tih. Chu pha chun anni rama ngei um tang an tih” tiin.
Zawlnei khêlhliphai chungthu
9 Zawlneihai chungthua chun:
Ka lung hi a koi dar a,
Ka ruhai an inthin a.
Zu rui ang el ka ni ie,
Zuin a chie zor ang el.
Chu chu LALPA thaw a na,
A thu thienghlim lei a nih.
10 Ram chu uiretnan sipin,
Trongse phur a ni leiin,
A ram phêkin a trâwl a,
Thlalèra hmun hringhai khom,
A hung trăwl zo ta vong a,
Zawlneihan lam suol hrawin,
An thilthawtheina kol chu,
Fel naw takin an hmang si.
11 “Zawlneihai le thiempuhan,
Pathien an poisa naw a,
Ka tempul sunga chen khom,
Rîtlona thil ka hmu si”
Tiin LALPA chun a hril.
12 “Chuleiin an lampui khom,
Hung innâl deu deu a ta,
Thimah hnot lut ning an ta,
Chu chun intol thlung an tih.
Ka hrem hun a tlung pha chun,
Sietnain vur tawl ka tih”
Tiin LALPA chun a hril.
13 “Samaria zawlneihai lai,
Thil tirdakum tak ka hmu a,
Baal hmingin thu an puong a,
Israelhai an thruoi hmang.
14 Jerusalema zawlnei lai,
Thil râpthlak tak ka hmu a,
Uirea khêl hringpuiin,
Thil suol thawtuhai kut chu,
Sukhrâttuah an thrang a,
Tu khomin an rǐtlona,
Băn an tum naw phà a nih.
Ka ta din Jerusalem mihai hi,
Sodom le Gomorra mi ang an nih.
15 Chuleiin, zawlneihai chungchang thua Iengkim LALPA thu suok chu hi hi a nih:
“Bu khá in faktir tawl ka ta,
Tûr tui indawntir tawl ka tih,
Jerusalema zawlneihai leiin,
Pathien ngaisak nawna lungril,
A ram pumah a’n leng si.”
16 Iengkim LALPA chun a hril:
“Zawlneihai hril hi awi naw ro,
Beiseina tehlĕm an văi cheu a,
LALPA baua an dong ni lo,
An lungrila an suongtuo thil,
In kuomah an hril hlak si a.
17 Kei mi ngaineptuhai kuomah,
Ka hril anga hril sawngin,
‘Muongna hmung in tih’
Tiin an hrilpêk rop hlak a;
An lungril nuomzawng hnota,
Lulul insuo hlakhai kuomah,
‘Sietna i chungah tlung naw nih’
Tiin an hrilpêk rop bok hlak.
18 LALPA remruotna hmunah,
A tu am thrang ve hlakin,
Ama hmu le a thu hrein,
An ngaithlak hlak hrim hrim a?
19 LALPA lungsenna thlipui,
En rawh, a hrâng ding a nih,
Thrawngaleivir a hung thla,
Mi suolhai lu nuoi dingin.
20 A lungrila a thil tum,
A hlen kim zo hmâ khat chun,
LALPA lungsen kîr naw nih.
A ni a hung tlung pha chun,
Iengkim la hre chieng in tih.
21 Hieng zawlneihai hi ka tir nawh,
Anni thu a nih an invirpui;
An kuomah thu ka hril nawh,
Anni thu a nih an hril.
22 Ka remruotnaa thrang ve,
An lo ni chu ni sienla,
Ka mihai kuomah ka thu,
An puong dar ta ding a na,
Thil thra naw an thaw lakah,
Inlamlĕttir ta’ng an tih.
23 “Hla taka um Pathien ni loin, hnaitea um Pathien ka ni lem” ti hi LALPA thu suok a nih. 24 “Ka hmu thei lona dinga inbiru thei tu am an um ding a na?” ti hi LALPA thu suok a nih. “Kei hi hnuoi le van hluo siptu ka nih” ti hi LALPA thu suok a nih. 25 ‘Mangah ka mang, mangah ka mang’ tia ka hminga khêl hril hlaktu zawlneihai thu hril chu ka hriet. 26 Zawlnei khêlhlip, mani suongtuona thu hril hlakhaiin hieng ang lungril hi ieng chen am an put ding a na? 27 Anni le anni mang inhril tuoin, an thlatuhaiin Baal an biek leia ka hming an theinghil ang khan, ka mihai chu ka hming intheinghiltir an tum a nih. 28 Mang neitu zawlnei chun a mang chu hril sien la, ka thu hretu zawlnei ruok chun ka thuhai chu ringum takin puong raw se. Bu tak le bupawlin ieng am inangna an nei a?” ti hi LALPA thu suok a nih. 29 “Ka thu hi mei ang le lung vuok nawina tubo ang a ni naw am a ni?” ti hi LALPA thu suok a nih.
30 “Chuleiin, ngai rawh, ka thu ni awm taka an ruolhai thu hril sawng hlak zawlneihai hi ka do a nih” ti hi LALPA thu suok a nih. 31 “Ngai ta u, mani phuokfawm hril hlak zawlnei, ‘LALPAN a tih’ ti hlaktuhai hi ka do a nih” ti hi LALPA thu suok a nih. 32 “A nih, ka tir le ruot khom ni lo, mang tehlèm mei mei hrila ka mihai khêl muhluma thruoi hmang chîng hlak zawlneihai hi ka do takzet a nih. Ka mihaiin trangkaipuina hlek khom an nei nawh” ti hi LALPA thu suok a nih.
LALPA ta dinga nghokum
33 “Hieng mipuihai laia mi tuin amanih, zawlnei tuin amanih, thiempu tuin amanih ‘LALPA thucha chu ieng am a na?’ tia an indon cheu chun, ‘Nangni hi a thuchaa chu in na, ka pei hmang ding cheu a nih’ ti hi LALPA thu suok a nih, tiin in don ding a nih. 34 Zawlnei amanih, thiempu amanih le tu el khomin, ‘Hi hi LALPA thucha chu a nih’ a ti chun ama le a sunghai hrem ka tih. 35 Nangni laia in chîng tak chu, ‘LALPAN iengtin am a don? LALPAN iengtin am a hril?’ tia in ruolhai amanih in sunghai amanih indon kuol hi a nih. 36 Amiruokchu, ‘LALPA thucha’ ti ruok chu hril ta naw ro; mi tinin in hril chu nangni thucha a ni leiin, Iengkim LALPA, ei Pathien, Pathien hring thucha chu in keilet mei mei a nih. 37 Zawlnei kuoma chun, ‘LALPAN iengtin am a don che? LALPAN iengtin am a hril a?’ tiin indon ro. 38 ‘LALPA thucha chu’ in ti vai chun, LALPA chun hieng hin a tih: ‘LALPA thucha chu in ti ding a ni nawh’ ka ti sain ‘LALPA thucha chu’ in ti leiin, 39 ngai ro, ka pot suok ngei ding cheu a na, ka bul hnaia inthokin pei hmang ka ti cheu, nangni le in pahai kuoma ka lo pèk tah hi khawpui le hin. 40 Chun, kumkhaw muolphona le inzakna theinghil thei ruol lo chu in chungah hung intlungtir ka tih.