Juda lalhai ta dinga thucha
22
1 LALPA chun hieng hin a tih, “Juda lal inah zu fe la, hi thu hi zu hril rawh: 2 Aw, Juda lal, Davida lalthrungphaa inthrung, nangma le i thoktuhai le hi kotkhara hung lut i mihai leh, LALPA thu suok hi lo ngaithla ro. 3 LALPA chun hieng hin a tih: Indik tak le fel takin ro rêl unla; sukdudatu kuta inthokin rok tuokhai chu san suok unla; mikhuol hai, fahra hai le hmeithai hai nêksawr le an chunga indik lo taka thaw chîng naw unla; hi hmuna hin poi tawk lo thisen insuo bok naw ro. 4 Hi thu hi fimkhur taka in zawm chun, Davida lalthrungphaa inthrung lalhai chu tawlailir amanih le sakor amanih chunga hai chuongin, an thoktuhai le mipuiin zuiin, hi in kotkhara hin lût hlak an tih. 5 Amiruokchu, hieng thupêkhai hi in zawm naw chun hi lal in hi tlu ram vong a tih ti keima hming ngei sâlin ka hril a nih ti hi LALPA thu suok a nih’ tiin.”6 LALPA chun Juda lal sungkuo chungthu chu hieng hin a hril:
Ka ta dingin Gilead ang el le
Lebanon tlang sip ang ni la khom,
Thlalĕrin siem ka ti che,
Khawpui rausan hnung angin.
7 Suksetu ding hung tir ka ta,
Hreipui hung chawi seng an ta,
I sidar thrá thràhai phûr an ta,
Meipuiah tì hlut hlut an tih.
8 “Chun, hnam danghai, hi khawpui hung pal tlangtuhai chun, ‘Ieng dinga hieng ang lawma LALPAN hi khawpui chunga hin a thaw el am a na?’ tiin indon tuong an tih. 9 ‘An Pathien, LALPA thuthlung chu maksana hnam dang pathienhai be a, an rong an bawl lei a nih’ tiin don an tih.
Jehoahaz chungthu
10 Lal thi chu trà naw unla,
A um naw chu sûn naw ro;
Saltàng chu sûn rak lem ro,
A pieng le murna ramah,
Hung kir ta ngai naw ni a,
Hmu khom hmu ta bok naw nih.
11 Juda lal Josia naupa Salum,a a pa Josia hung thlaktu, hi hmuna inthoka thruoi hmanga um chu hung kir nawk ta ngai naw nih, ti hi LALPA thu suok a nih. 12 Sala an thruoina hmuna chun thîng a ta, hi hmun hi hung hmu nawk ta ngai naw nih’ tiin.
Jehoiakim chungthu
13 “Felnawnaa lal in bawl a,
Indik loa in sawng bawltu,
A ram mihai sor hrep a,
An hlaw pe si lotu chu,
A chung a va hang pik ngei!
14 ‘In ropui tak bawl ka ta,
Pindan chunghnung lien tak leh;
Tukver lien tak siem ka ta,
Sidar thing phek bel ka ta,
Rong senin nàl vong ka tih’
Titu chung ngei chu a pik.
15 ‘Sidar thing in i bawl leiin,
Inlal lemah i’n ngai a ni?
I pa khan fak le dawn ding,
A tlasam hlak am a ni?
Indik taka thil thawin,
A hmuingil an nawm a ni?
16 Mi pasie le tlasamhai,
Chungthu a rèl fel hlak a,
Iengkimah a tluong a ni kha.
Chuong ang chu nang ngei khomin,
I mi hriet dan ding an naw maw?’
Ti hi LALPA thu suok a nih.
17 Sienkhom hlèprûk dan ding le,
Poi tawk lo thisen insuoa,
Nêksawra laklui danhai,
Lungrilin i mel ràn si.
18 Chuleiin, Juda lal Josia naupa Jehoiakim chungthu chu LALPAN hieng ang hin a hril:
‘‘A poi ngei maw, unaupa!
A poi ngei maw, unaunu!’
Tiin sûn naw ni hai a;
‘I pam ngei maw, ka lalpa!
I ropuina a pâm ie!’
Tiin sûn bok naw ni hai.
19 Sabengtung phûm ang elin,
Jerusalem kul puo tieng,
A ruong chu kei phît an ta,
Tuola chun dehawn an tih.
Jerusalem mihai chungthu
20 Lebanon tlangah kaiin,
Chu tak a’nthok chun khêk la,
Basan chen thangkhawk raw se;
Abarim tlangah trap rawh,
I’n zompuihai po po kha,
An bohmang vong ta si a.
21 I ngai i sukmuong lai khan,
Fimkhur di’n ka’n fui che a,
‘Ngaithla naw ning’ i ti si.
I tleirawl lai a’nthok a,
Chu chu i um dàn a na,
Ka thu i ngaithlak nuom nawh.
22 I berampuhai po po kha,
Thliin lèn hmang vong a ta,
I’n zompuihai po po khom.
Salah intâng vong an tih.
I rîtlonahai leiin,
Chu pha chun muolpho taka,
Hmaimawkin la um i tih.
23 Lebanon Ngaw Runab chêng,
Sidar ina bu khuortu,
Nau hase ang topa nâ,
Natnan a bawm pha chea,
I nat tuor inrŭm ding chu,
Ieng ang top am ning a ta!
24 “Nang Jehoiachinc hi Juda lal Jehoiakim naupa, ka suoi namna kutsebi khom ni la, ka kuta inthokin ka phawi suok ding chè a nih. 25 That dinga zongtu che, Babulon lal Nebukadnezzar kuta le Kaldaihai kuta ngei chun pe suok ka ti che. 26 I piengna ni lo ram dangah nang le i nu, a hringtu che hi pei suok ka ta, chu taka chun thi’ng in tih. 27 Kir nawk in châk êm êm rama chun kir nawk ta naw ti niu” tiin.
28 Hi Jehoiachin hi bêl koi dar,
Mi hnawl hnung a ni naw maw?
Ama le a thlahai chu,
An hriet ngai lo rama chun,
Ieng leia an pei suok am?
29 Aw ram, aw ram, aw ram,
LALPA thu hi lo ngai rawh!
30 Hieng hin LALPA chun a hril:
Nau nei der naw ang elin,
Hi mipa hi inchik rawh:
Pa hmuingîl lo ding a na,
A thlahai laia mi tu khom,
A hmuingîl um naw ni a,
Davida lalthrungphaah,
Tu khom inthrung naw ni a,
Judai ram chungah tu khom,
Inlal ngai bok naw ni hai,”
Tiin LALPA chun a puong.