Jerusalem tlawm ding thu
21
1 Chun, Malkija naupa Pasur le Maseia naupa thiempu Zefania hai chu Lal Zedekian Jeremia kuomah a tir a. 2 Ama chun an kuomah, “Hi, Babulon lal Nebukadnezzar chun a mi do ta si a. LALPAN kha hmaa thil mak a thaw hlak ang bok khan a mi thawpek chun, a’n kirtir el thei a. Chu thu chu Jeremia-in LALPA kuomah mi lo indonpek raw se” a ta.3 Jeremia chun an kuomah, “Zedekia kuomah hieng ang hin va hril ro. 4 Israelhai Pathien, LALPA chun hieng hin a tih: Ngai ta, Babulon lal le Kaldai mi, kul puo tienga inhuoltuhai che i dona hriemhrei chu nangma tieng inlettir ka ta, khawpui sunga hin hmêlmahai chu thruoi lut ka tih. 5 Keima ngei hin lungsen tak le intûr takin, keima kut hrât ngei inletin, intǐmna nei dêr loin ka bei ding cheu a nih. 6 Hi khuoa chêng mihriem le ranhai chu nghaisang ka ta, hripui râpthlak takin thi’ng an tih. 7 Chu hnunga chun Zedekia le a thoktuhai le mi dang, hi khuoa chêng, kawlhnâm le trăma thi lohai chu Babulon lal Nebukadnezzar le hmêlmahai kuta le anni that tumtuhai kuta chun peng ka tih. Kawlhnâm ngeiin that an ta, lunginsiet naw ni hai a, hlà bok naw ni hai a, lainat bok naw ni hai ti hi LALPA thu suok a nih.
8 “Chu bakah, mipuihai kuomah hieng hin hril rawh: ‘Ngai ro, in hmaah hringna lampui le thina lampui ka sie ding a nih. 9 Hi khawpuia um taphot chu kawlhnâm amanih, trăm amanih, hripui amania sukhlum ning an tih. Tu khom tlân suok a, inhuoltu cheu Kaldaihai kuoma inpehai chu dam an ta, an hringna humin um a tih. 10 Hi khawpui thratna ding neka a sietna ding thaw ka tum leiin, Babulon lal kutah pek ning a ta, meiin raw hmang a tih’ ti hi LALPA thu suok a nih.
Juda lalhai chunga rorêlna
11 “Juda lal sungkuohai chungthua LALPA thu hi ngaithla ro.
12 Aw Davida sungkuohai, LALPA chun hieng hin a tih:
‘Tûk tinin ro rêlpêk unla,
Sukdùdàtu kuta inthokin,
Roka um chu san suok ro;
Chuong naw chun ka lungsennan,
In thil thra naw thaw leiin,
Meichok angin kăng a ta,
Threl ngaina hrim um naw nih.
13 Nang, tlâng sîp zawla chêng,
Lungpui zawl chungah chuong a,
‘Tu’n am an mi bei thei ding?
Tu’m mi hlù khum ngam ding chu?’
Tituhai, ka khing chêu a nih,
Ti hi LALPA thu suok a nih.
14 “I thilthaw phù ang peiin,
Ka hrem vè ding chè a nih;
I ramngaw kăng ral dingin,
Mei insuopêk ka ti che a,
A sè vêl leh kăng vong a tih,”
Ti hi LALPA thu suok a nih.