Thiempu Pashur le Jeremia inbeina
20
1 LALPA Tempula hotu tak, Imer naupa thiempu Pasur-in Jeremia thu hrilhai chu a lo hriet a. 2 Thiempu Pasur chun zawlnei Jeremia chu mi a’n vuoktir a, LALPA Tempula Benjamin Kotkhar Chuonchunga chun kol inbuntirin ripah a hrĕn a. 3 A zinga Pasur-in Jeremia kol bun a sût lai chun Jeremian, “Pasur, LALPAN i hming hi a thlak ta a, Magor-Misabib tia ko ni lem tang i tih. 4 LALPA chun hieng hin a tih: Ngai ta, nangma le i ruolhai po po ta dingin mi tribaiumah siem ka ti che a, hmêlmahai kawlhnàma i ruolhai an sàm thluk lai chu i mit ngeiin hmung i tih. Judahai po po Babulon lal kutah pe vong ka ta, ama chun Babulon tieng salah a thruoi naw leh kawlhnâmin that a tih. 5 Chu bakah, khawpui hausakna po po hai, a thaw suok le tharsuok po po hai, a ro hlu po po hai le Juda lalhai rosum po po hai chu hmêlmahai kutah pe’ng ka ta, anni chun rok an ta, la’ng an ta, Babulon tieng hawn vong an tih. 6 Nang Pasur chu, i ina chêng po pohai leh, salah intâng i ta, Babulon tieng thruoi an ti che a, chu taka chun thi’ng i ta, khêl thu i lo inbà hlak i ruolhai po po leh chu taka chun phûm an ti che” a ta.LALPA kuoma Jeremia vuivaina
7 Aw LALPA, nangin i mi hlèm a,
Hlèmin ka um let dĕr a ni hi.
Nangin i mi thahne a,
Ka dol zor dĕr a ni hi.
Sunnithlâka mi chêksolin,
Mi tinin an mi nuisaw hi.
8 Ka khêk suok zàt hlak chun,
Inpâwngnêkna thuhai le
Sietna thu ngot ka puong si.
LALPA thu ka puonghai chun,
Nuizatbûr mi’n changtirin,
Mi hal kăwng a mi’n hlawtir.
9 “Ama sâm sâ ta naw ningah,
A hmingin hril ta naw ning”
Tia ka hang hril hlak chun,
Ru sûnga mei thun angin,
A thu chun ka lungrilah,
Mei angin a mi hlieu a,
Ka pai trok trok thei naw a,
Ka topui thei hlol si nawh!
10 Sir tinah mi dêusawin,
‘Tritna ringot hril hlakpa,
I hril hril ripawt kan tih’
Tiin an mi biekruk a,
Ka hril suol an inchăn a,
Chu chun kei chu mi khita,
Phuba lâk an tum a nih.
11 Sienkhom mi hrât le huoisen,
LALPAN a mi umpui leiin,
Mi sukdudatuhai chu,
Mi hne loin tlûng an ta,
An tum hlawsam dêr an ta,
Kumkhuoin muolpho an ta,
An inpawi hmingsietna chu,
Theinghil ni ta ngai naw nih.
12 Aw Iengkim LALPA,
Mi indik chu bi chieng a,
Lungril le ngaituonahai,
Thlîthlăia en fie hlaktu,
An chunga i phuba làk chu,
Mit ngeiin mi’n hmutir rawh,
Ka chungthu hi i kutah,
Ka’n koltir vong ta si a.
13 LALPA kuomah hla sak ro!
LALPA inpâkin chawimawi ro!
Mi suolhai kuta inthokin,
Thrangpui ngaihai hringna chu,
San suokin a hum si a.
14 Ka hung pieng thlakna ni chu,
Trongse phurin um raw se!
Ka nu’n a mi nei ni chu,
Malsawmin um naw raw se!
15 “Nau pasal i nei!” ti a,
Ka pa kuomah hung hril a,
A lungril suklawmtu chu,
Trongse phurin um raw se.
16 Lungsietna nei dêr lo a,
LALPA sukram khuo angin,
Chu mi khom chu um sien la,
Zîngkâr trap ri ngaithla sien,
Sŭn chang pha leh indo ri.
17 Sŭlah mi lo sukhlum sien,
Sŭl chu ka thlăn ning a ta,
A mi von song el ding bah!
18 Buoi le lungngaina tuor a,
Ka nihai inzak taka,
Hmang zo nawk el ding chauin,
Ieng leia sŭla inthokin
Ka pieng rêng rĕng am a na?