1 LALPA chun ka kuomah, “Fe la, bêlhemtu pil bêl va’n chaw la, khawtlâng upahai le thiempuhai thruoi la, 2 bêlhemtuhai lutna kotkhar bula Ben Hinom ruoma chun fe thla la, chu taka chun i kuoma thu ka hril ding che hi puong rawh. 3 Hieng ang hin hril rawh: ‘Juda lalhai le Jerusalema chênghai, LALPA thu hi lo hre ro. Israelhai Pathien, Iengkim LALPA chun hieng hin a tih: Ngai ta u, hi hmuna hin sietna ka hung intlungtir ding a na, a hre taphot nà nghor a tih. 4 Hieng mihai hin an mi zamsan a, hi hmun hi an sukporchè a, anni le an pahai le an lalhai khomin an la hriet ngai lo hnam dang pathienhai an lak lut a, an kuomah an inthawi a, hi hmun hi poi tawk lo thisenin an suksip a. 5 Chun, thaw dinga thu ka pek le hril khom ni lo, ka ngaituonaa khom la lût ngai lo thil thawin, Baal ta dinga an nauhai pumraw thilhlana an inhlàn theina dingin bawlhmun, hmunsang an indin bok a. 6 Chuleiin, ngai ta, hi hmun hi Tofet amanih Ben Hinom Ruom amanih ti ta loa Insàmna Ruom an la ti lem ni ding chu a hung tlung ding a nih. 7 “‘Hi hmuna hin Judai ram le Jerusalema mihai thil tum chu suktlol vong ka ta, that tuma zongtu an hmèlmahai kawlhnâmin sât hlum an ta, an ruonghai chu chungleng vatehai le hnuoia ramsahai fak dingin peng ka tih. 8 Hi khawpui hi nuoi hmât vong ka ta, mi nuizatbŭrah siem ka ta, a fe pĕl taphotin a hliem tuor lei chun maktiin inchek khum an tih. 9 An naupahai le naunuhai sa infaktir ka ta, an hringna la tumtu hmêlmahaiin an inhuol tom beidong lai chun anni le anni sa infa ton an tih.