Belhemtu inah Jeremia a fe
18
1 LALPA thu chu Jeremia kuomah a hung tlung a: 2 “Tho la, bêlhemtu inah zu fe la, chu taka chun ka thuhai inhriettir ka ti che” a ta. 3 Bêlhemtu inah chun ka zu fe a, a bêl siemna khawla chun sin a lo thaw a. 4 Pilpoka bêl a siem lai chu a kuta a tawk siet pal pha leh a pilpok bok chu hmangin thra a ti dan ang takin bêl dangin a siem nawk pei hlak a.5 LALPA thu chu ka kuomah a hung tlung nawk a: 6 “Aw Israel sungkuohai, bêlhemtu thaw dan ang hin ka thaw thei ve naw cheu am a ni?” ti hi LALPA thu suok a nih. “Aw Israel sungkuohai, bêlhemtu kuta pilpok ang el hin ka kuta um in nih. 7 Ieng huna khom ram le hnam pot suok a, thriek a, suksiet ka tum thu puong lang khom, 8 chu hnam chun a chungthu ka hril leia thil thra naw a chǐng chu a nghatsan chun, a chunga thil thra naw thaw ka tum chu inkei kir ka tih. 9 Ieng tika khom ram le hnam ka siem ding thu le indin ding thu lo hril khom ni lang, 10 ka thu hril ngaithla lo a, ka mithmuah thil thra lo a thaw chun, a ta dinga thil thra thaw ka tum chu sût nawk ka tih.
11 “Chuleiin, Juda mihai le Jerusalema chênghai kuoma chun, ‘Ngai ta u, in lakah thil thra naw thaw ka tum a, sietna ka hung intlungtir ding a nih. Mi tinin in thil suol thawhai chu sim unla, in um dan thra naw le thil thra naw in thawhai chu nghatsan ro’ tia hril tawl dingin LALPAN a mi tir a nih. 12 Nisienlakhom, anni ruok chun, “A trûl nawh. Kan nuom ang angin um kan ta, kan nuom leh lulul insuoin suol zom pei kan tih” ting an tih.
Mihaiin LALPA an hnawl
13 LALPA chun hieng hin a tih:
“Hieng ang hi an um hlak am?
Tiin hnam danghai indon ta u!
Israel nunghak thienglâm chun,
Thil pangzatum tak a thaw a nih.
14 Lebanon tlàng sìpa vûr chun,
A tlâng an kiengsan hlak am?
Hla taka inthoka hung luong,
A tui dei chu a kang hlak am?
15 Sienkhom ka mihai ruok chun,
Kei hi an mi theinghil a,
Hmangna bo dĕr milim bein,
An hmaah rimtui an inhlàn a,
Chu chun a’n sui thluktir a,
Tiena inthoka an hraw hlak,
Lampui hlun chu petsanin,
Tuk lo lam an hraw ta si.
16 A ram tlaran vong a ta,
Mi hmusit inchang a ta,
Mi invâk vèl taphotin,
Pangzatin lû thin an tih.
17 Khawsak thlipui ang elin,
Hmêlma hmaah phìn dar ka ta,
Sietna an tuok ni pha chun,
Ka hmêl inhmutir loin,
Tukkhum innghat lem ka tih.”
18 Anni chun, ‘Thaw ro, Jeremia hi phierruk ei tiu; thiempuhaiin dan thu an inchuktir hi rè chuong naw ni a, mi var rawn ding bo naw ni hai a, zawlneiin thu an hril tawp chuong bok naw nih. Thaw ro, soisel hron mur mur ei ta, a hril hrim hrim ngaisak nawng ei tiu” an tih.
19 Mi ngaisak rawh, Aw LALPA,
Mi hektuhai hril hi lo ngai rawh.
20 Thra hi maw suolin an rul hlak?
Ka tlàkna ding tlâkkhur an cho.
An laka i lungsen la kieng dinga,
Ka hnipek tawl kha hre zing rawh.
21 An nauhai trămpui intuoktir la,
Kawlhnâm ngei inhmatontir rawh.
An nuhmeihai nau boin hmeithai sien,
An pasalhai sukhlumin um hai sien,
An tlangvalhai khom indonaah,
Kawlhnâmin sat hlum vong raw se.
22 Mi man tuma, tlâkkhur cho a,
Ka kea an mi phì awkna ding,
Arûka châng an kam leiin,
Rûntuhan nang thut hai sien la,
An inah khêk rong rong raw se.
23 Mi that tuma an phierruk dan,
LALPA, nang chun i hriet vong.
An suol thaw hi ngaidam naw la,
I mithmuah thai bo naw rawh.
I hmaah thè thal vong tawl la,
I lungsen ni’n soisak tawl rawh.