Juda suolna le hremna
17
1 “Juda suolna chu thir kawloma ziek, lunghlu hmor zum ngei taka an lungril pheka ker a na, an maicham kia khom ker a ni bok. 2 An nauhai chen khomin thing buk hnuoi le tlang sîp tina bawlhmun an siemna le an pathiennu Asera lem thing an phunna hmunhai chu an hung hriet karh vong a nih. 3 A ram dung le khanga i suolna leiin a rama ka tlanghai le i hausakna le rosum po po chu, i hmunsânga bawlhmunhai po po leh, râllâk sumah ka pek ding a nih. 4 I bawsietna leiin i chanpuol ka’n rochungtir che ram hi chân i tih. I lakah ka lungsenna chu mei anga a chok zing leiin, i hriet ngai lo ramah i hmêlmahai rong bawl i tih” tiin.5 LALPA chun hieng hin a tih:
“Mihriem ringsana neitu,
Mihriem hrâtnaa innghattu,
Lungrila LALPA nghatsantu chu,
Trongse phurin um raw se.
6 Thlalĕr hlo buk ang a na,
Vangneina a hung pha khom,
Dong ve phak ngai naw ni a,
Thlalĕr ram trawl, tu hluo lo,
Chi leilungah chêng a tih.
7 LALPA-a ringna innghattu,
Ama ringzotu ruok chu,
Mi hamthra a va ni ngei!
8 Tui luongna bula thing phun,
Vakama zung kei angin,
Thrâl tlung ding a trì naw a,
A hnàhai a hring zing hlak.
Khaw thrâl kum a poisa nawh,
Rà naw kum a nei bok nawh.
9 Lungril hi ieng po nĕka,
Mi hlèmhmang chungchuong a na,
Siem thrat thei ruol lo a na,
Tu’n am hre thiem thei a ta?
10 Kei hi lungril entu LALPA,
Ngaituonahai fie hlaktu,
Mi tin an nun dan ang le
An thilthaw ang phû peia,
Lawmman pe hlaktu ka nih.”
11 Kut tling loa hausa chu,
Mani tui ni lo op kêutu,
Varung ang chauh hi a nih.
A vanglaiin a hausaknan,
Ama chu trinsan a ta,
Mi invêt la hlawng a tih.
12 A tira inthoka chawi sang,
Lalthrungpha anga ropui chu,
Ei Tempul hmun hi a nih.
13 Aw LALPA, Israel beisei,
Nangma phatsantuhai chu,
Sukmuolphoin um an tih.
Nangma nghatsantuhai chu,
Pilvuta hming ziek angin,
An la bohmang ding a nih.
Hringna tuikhur LALPA chu,
An invăk hmangsan si a.
Jeremia thil hni
14 Aw LALPA, mi sukdam la,
Chuongchun dam ka ta,
Mi sanhim la,
Chuongchun him ka tih,
Ka’n păk hlak chu nang i nih.
15 “Khaw’m a na LALPA thu chu?
Tu’n hung hlen sien ni naw ni”
Ti-a an mi esel hi en ta!
16 I berampu ka nina hi,
Ka la’n phatsan ngai naw a,
Sietna hung tlung ding ruok chu,
Ka dit nawh ti i hriet chieng.
Ka baua thu suok hrim hrim,
Nangin i hriet vong a nih.
17 Mi sukthlabar naw hràm rawh,
Nang chu siet tuok nikhuo a,
Ka’n humhimna i ni si a.
18 Mi sukdudatuhai chu,
Nangman sukmuolpho tawl la,
Kei ruok chu mi sukmuolpho naw.
Anni chu sukthlabâr la,
Kei chu mi sukthlabâr naw.
An chungah sietna intlungtir la,
Sukbohmang letdĕr tawl rawh.
Sabat inser chungchang
19 LALPA chun hieng hin a mi hril: “Vantlâng lutna tieng kul kotkhar, Juda lalhai hung lutna le suokna le Jerusalem kul kotkhar po poa chun fe-in va ngir rawh. 20 An kuomah, ‘Nangni Juda lalhai, Juda mi po po le Jerusalema chêng, hieng kotkhara lut hlakhai, LALPA thu hi lo ngaithla ro. 21 LALPA chun hieng hin a tih: Chawlniin thil phur lo dingin fimkhur unla, Jerusalem kul kotkharah thil phurin lut bok naw ro. 22 Chawlniin in ina inthokin phur in phur suok ding a ni naw a, sin hrim hrim in thaw ding a ni bok nawh. In thlatuhai kuoma thu ka pek angin chawlni chu in inser thienghlim ding a nih. 23 Chuong sa khom chun an ngaithlak naw a, an uksak bok nawh; an insuklulul a, inthununna an ngai thei naw a, an donsak bok nawh.”
24 LALPA thu suok chun hieng hin a tih: “Amiruokchu, ka thu hril in poisa a, chawlniin ieng khom kul kotkhar sungah hung la lut lo a, sin ieng khom thaw loa in inser thienghlim chun, 25 hi khawpui kul kotkhara hin lalhai le hotuhai, Davida lalthrungphaa inthrunghai chu tawlailir le sakora chuonghai le an hnung zuitu mi lienhai, Judai rama mihai le Jerusalema chênghai chu hung lut an ta, hi khawpuia hin chêng song ta’ng an tih.
26 “Judai ram khawpuia inthok dam, Jerusalem sèvèla khuoa inthok dam, Benjamin rama inthok dam, thlang tieng tlâng thrut vèla inthok dam, tlangrama inthok dam, sim tienga inthok damin mihai chu pumraw thilhlân le bu le bâl thilhlân chawiin, hlànbiek dingin hung an ta, rimtui dam le lawmthu hrilna thilpêkhai chu LALPA inah hung inhlàn an tih. 27 Amiruokchu, Sabat inser thienghlim thu-ah, chawlnia Jerusalem kul kotkhara ieng khom phur lut lo dinga ka hril ang cheua in thaw naw vai chun, kul kotkharah threl mit ruol lo mei insuoktir ka ta, kul le a lal inhai po po kang hmang vong a tih” tiin.