Sietna ni
16
1 LALPA thu chu ka kuomah a hung tlung a: 2 “Nuhmei i nei ding a ni naw a, hi hmuna hin nau le te i nei ding a ni bok nawh” tiin. 3 Hi hmuna pieng naunu le naupahai le anni hringtu nu le pahai chungthua chun LALPAN hieng ang hin a tih: 4 ‘Hripui leiin thîng an ta, tu khomin phûmin sun naw ni hai a, an ruong chu tuolah hmunhnok angin indar a tih. Kawlhnâm le trămpui tuorin thi bok an ta, an ruong chu chungleng vatehai le ramsahaiin tlân an tih.5 LALPA chun hieng hin a tih: “Khawsawt ina ruoi an siemnaah lut naw la, sûn dingin fe naw la, anni chu trà bok naw rawh, hieng mihai laka hin ka malsawmnahai, hmangainahai le lainatnahai ka lâk kìr ta si a,” ti hi LALPA thu suok a nih. 6 “Hi rama hin mi lien le mi chinhai thi’ng an ta, tu khomin phûmin sûn naw ni hai a, anni sûnnain lu vaw kol bok naw ni hai. 7 Mithi sûnhai rălna dingin tu khomin fak ding pe naw ni hai a, an nu amanih an pa amanih lei khomin, anni hnêmna dingin tu khomin dawn ding pe naw ni hai.
8 “Chun, ruoi thrèna hmuna hrim hrim anni lai thrunga kîl ve dingin i lût ding a ni nawh. 9 Iengkim LALPA, Israel Pathien chun hieng hin a hril: ‘Ngai ta, i mithmu le i dam sung ngei hin hlimna le lawmna ri le mo le moneitu rawlhai khom hi hmuna inthok hin sukrè vong ka tih’ tiin.
10 “Hieng thuhai po po hi mihai kuoma i hril pha chun annin, ‘Ieng leiin am hieng ang lawma sietna hi LALPAN kan chungah a thaw el am a na? Iem kan thaw suol a um? LALPA ei Pathien chungah ieng suol am kan thaw hrim hrim a?’ ting an tih. 11 Nangin, ‘In thlatuhaiin mi’n phatsan a, Pathien danghai hnot a, an rong bawl a, anni be a, mi fesan a, ka dan an zawm naw lei a nih. 12 Nangni hlak chun tuklul insuoa in lungrila ritlona chu zawm lemin, in thlatuhai nêka nasa lemin in thaw nawk pei si a. 13 Chuleiin, hi rama inthok hin nangni le in thlatuhai khoma an la hriet ngai lo rama chun ka hnot suok ding cheu a na, chu taka chun a sŭn a zănin pathien danghai rong bawl in ta, ka ditsakna hmu naw ti niu’ ti hi LALPA thu suok a nih.
Sal tang kir ding thu
14 LALPA thu suok chun hieng hin a hril: “Mihaiin, ‘Aiguptaa inthoka Israel nauhai thruoi suoktu, hring zing LALPA hmingin’ ti ta loa, 15 ‘Hmar tieng ram le a hnot darna rama inthoka Israelhai hung thruoi suoktu, hring zing LALPA hmingin’ tia in inkhâm hun a la hung tlung ding a nih. An thlatuhai kuoma ka pek rama chun ka thruoi kir tawl nawk ding a ni si a” tiin.
Hremna tlung ding
16 “Ngamantu tam tak ko ka ta, anni chun man tawl an tih. Sapêltu tam tak tir bok ka ta, anni chu muol le tlang tin le lungpui kak kara mihai khom chu hung pèl suok an tih. 17 An um dan po po ka hmu vong a, ka lakah thup a um naw a, an suolnahai khom ka mita inthoka thup a um bok nawh. 18 Hringna nei lo milim tirdakuma a ram an sukporchè lei le ka rochung ram chu an pathien lim tirdakuma an suksip leiin, an rîtlona le suolna chungah a lêt hniin thungrul ka tih” ti hi LALPA thu suok chu a nih.
LALPA kuta innghat
19 Aw LALPA,
Ka hràtna le ka kulpui,
Lungzîng nia ka bèlbul,
Kawlkawdonga inthokin,
Hnam tin i kuomah hung an ta,
“Kan thlatuhai nei sun chu,
Hmangna bo dĕr pathien lim,
Milim siem fawm el an nih.
20 Miin mani pathien ding,
A siem fawm thei am a ni?
Chuonga milim siem fawm chu,
Pathien an ni thei si nawh”
Tiin la hung hril an tih.
21 Chuleiin, tu trum khom hin,
Ka hrâtna le thilthawtheina,
Hang inhriettir nawk ka tih.
Ka hming hi LALPA a nizie,
Chu chun hung hre tang an tih.