Judai ram mihai tuor ding
15
1 LALPA chun ka kuomah, “Mosie le Samuel khom ka hmaah hung hai sien, ka lungrilin hi mihai tieng hi ngha chuong naw nih. Ka hmu phàk loah hnot suok la, fe hmang dai raw hai se.2 ‘Khaw lam kan fe ding?’ tia an indon che chun, an kuomah hieng ang hin hril rawh:
Hieng ang hin LALPAN a tih:
Thi dinga ruothai chu thinaah,
Kawlhnâm tuor ding chu kawlhnâmah,
Trămpui tuor ding chu trămpuiah,
Saltăng ding chu saltăngnaah.
3 “LALPA chun hieng hin a tih: ‘Suksetu dingin thil chi li tir ka tih- sukhlumtu ding kawlhnâm, an ruong fen hmangtu dingin ui, fa zo le sukraltu dingin chungleng vatehai le hnuoia ramsa kolhai. 4 Jerusalema Juda lal Hezekia naupa Manase thilthaw leiin hnuoia lalhai po po tirdakah siem tawl ka tih.
5 “Aw nang Jerusalem,
Tuin am a lunginsiet ding che?
Tuin am a trà ta ding che,
I chanchin indon dingin,
Tu hrim am chawl tang an ta?
6 Nangin i mi hnawl thlak a,
I hnungtol deu deu pei si.
Chuleiin, sukse ding chein,
I chungah kut thlâk ka ta,
Zâi daw zozai ta naw ning”
Ti hi LALPA thu suok a nih.
7 Khaw tin kul kot bula chun,
Cheiruongin hol fai ka ta,
Sietna le lusunnain,
Ka mihai tlak buok a tih,
An nun dan an thlak si nawh.
8 Tuipui trieu nêka tamin,
Hmeithai pung deu deu an tih.
Sŭn chang lai takin rûntu,
Thralai nuhai lai tir ka ta,
Beidongna le thlaphangnan,
Hung nangchîng thut tawl a tih.
9 Sal sari hringtu nu chu,
Thidangin tlu hlum a ta,
Sŭn lai a ni tla’ng a ta,
Hming sein muolpho a ta,
A thi bâng la um po chu,
Kawlhnâma sukhlum dingin,
Hmêlma kutah pe’ng ka tih”
Ti hi LALPA thu suok a nih.
Jeremia lung ninawna
10 Ram pum do le khing dinga,
Aw nu, i mi lo nei kher hi chu,
Ka chung a va hang pik de aw!
Tu khom thil inpûktir loin,
Tu ta bat naw ni lang khom,
Trongsie an mi’n phur vong si.
11 LALPA chun hieng hin a tih:
“A san thra tak a um chun,
San him ngei ka ti chêu a,
Siet ni le lungzing niah,
Hmêlmahai chu in hmaah,
Hung inkûntir ngei ka tih.a
12 “Hmar tienga kapathîr amanih,
Dar thîr chu miin suktliek thei a ti?
13 Ka mihai suolna leiin,
An rohlu le sum po po chu,
Râllâk sumah pe’ng ka tih.
14 Hriet ngai lo hmêlma ramah,
Salah thruoi an ti chêu a,
Ka lungsen chok zing a ta,
Chu chun hlieu zing a ti cheu.”
15 “Aw LALPA, nang chun i hriet,
Mi hre zingin, mi kan la,
Mi sukdùdàtuhai chungah,
Ka phubâ mi lapêk hrăm rawh.
Nang chu i dawthei leiin,
Mi la hmang sa ve naw la,
Nangma leia ka tuorzie kha,
Mi hrepêk zing lem hlak rawh.
16 I thuhai ka dong pha leh,
Kei chun ka fak miel miel a,
Ka ta dinga lawmna le
Lungril sukhlimtu a nih.
Aw Lalpa, Iengkim Pathien,
I hming puttu ka ni si a.
17 Inhoina chèntuhai lai,
Ka thrung ve ngai dèr naw a,
Hlimhlop ka chèn ve ngai nawh;
Kut i mi’n nghat khum leiin,
Makhat chauin ka’n thrung a,
Lunghnûrnan i mi sung sip.
18 Ieng leia ka nat tuor hi,
A rè thei dêr naw’m a na?
Ieng leia ka hliem tuor hi,
Dam thei loa a um zing?
Ka laka hin vadungte,
Bèl tlak lo le kang el hlak,
I’n chang el ding a ni maw?
19 LALPA chun hieng hin a tih:
“I sim chun tungding ka che,
Ka rong i bawl theina di’n;
Hmangna bo thu hril lo a,
Thu tak hriltu i ni chun,
Ka thu hriltu ning i tih.
Nangin mihai pan loin,
Annin pan lem raw se che.
20 Hienghai laka hin kul bang,
Dâr bangah siem ka ti che.
Hung bei hlak an ti che a,
Sienkhom hne nawng an ti che,
San suok le hum ding chein,
I kuomah ka um zing a nih.
21 Mi rilohai kuta inthokin,
Keiman san suok ka ti che a,
Nunrawnghai kuta inthokin,
Keiman hum him ka ti che”
Ti hi LALPA thu suok a nih.