14
1 Khawthrâl, trăm le kawlhnâm
Khaw inthràl ding chungthua,
LALPA hril chu hi hi a nih:
2 “Juda chun lû a sŭn a,
Khawpuihai a ngûi ruoi a,
A ram chu an tră khum a,
Jerusalema inthokin,
Trap ri a so mum mum a.
3 Mi lienhan an siehlawhai,
Tui chawi dingin an tir a,
Tuikul tieng an pan tawl a,
Sienkhom tui hrim an hmu nawh.
An tuibel leh hrilhaiin,
Beidong takin an kǐr a,
An lu puon an inkhum a.
4 Ruo a sûr dêr naw leiin,
Hnuoi chu a hung kak tuor a,
Lo neituhan hrilhaiin,
An lu puon an khup khum a.
5 Phŭla sazukpui khomin,
Pet ding a nei naw leiin,
A tê chu a maksan a.
6 Ram sabengtunghai khom chu,
Tlâng sâng filah an ngǐr a,
Sihal inthuok ang topin,
An inthuok ve hlop hlop a,
Ram hring an thlirna lamah,
An mithai a chău zo tah.
7 Kan suolnan mi hêk sien khom,
I hming leiin Aw LALPA,
Mi hung thrangpui lul raw khai.
Kan hnungtolna a tam a,
I lakah kan suol a nih.
8 Aw, Israelhai Tlumte thlîr,
Beidong huna Sandamtu,
Hi rama hin mikhuol anga,
Zan khat chauh riek ding anga,
Ieng dinga um am i na?
9 I chî-ài ve am an ta?
Ieng leia mi san thei lo,
Pasalthra anga i um?
Sienkhom nang chu aw LALPA,
Keini lai i um zing a,
I hming puttu kan ni a,
Mi maksan tawl naw hràm rawh!
10 Hi mihai chungchanga hin,
LALPA chun hieng hin a hril:
“Invak hmang inhoi an ta,
An ke an thunun ngai nawh.
Chu lei tak chun anni hi,
LALPAN a pom tawl naw a,
An rîtlo a hriet zing a,
An suol leiin hrem a tih.”
11 LALPA chun ka kuomah, “Hieng mihai thratna ding hin hnipêk naw rawh. 12 Bu nghei hai sien khom an rawl lo ngaithla naw ning; pumraw thilhlân le bu le bâl thilhlân an hung inhlànhai khom lo pom bok naw ning. Chuong nèk hmanin, kawlhnâm le tràmpui le hripuiin ka sukbohmang tawl ding a nih” a ta.
13 Kei chun, “E khai, LALPA Pathien, i zawlneihai po poin, ‘Kawlhnâm tuok naw ti niu a, trăm khom tuor bok naw ti niu. Hi hmuna hin muongna hlun ka pêk lem ding cheu a nih’ tiin i thu an lo hril rop hlak si a” ka ta. 14 LALPA chun, “Zawlneihaiin ka hmingin khêl an hril hlak a ni chu. Anni chu ka tir naw a, ka ruot naw a, ka biek tawl bok nawh. An thil hmu khom ni lo, hmangna bo thrumvawra an thil dong le an lungril suongtuona mei mei an hrilpek cheu a ni chu” a ta. 15 Chuleiin, LALPA chun hieng hin a hril: Ka tir khom ni hlei lo, ka hming sâla, ‘Hi rama hin kawlhnâm le trăm tlung naw nih’ tia hriltu cheu zawlneihai chu kawlhnâm le trămin bohmang an tih. 16 Chun, an chungthu an hril mihai chu trăm le kawlhnâm inleng lei chun Jerusalem kotthlêrah pei suokin um an ta, anni le an nuhmeihai, an naunuhai le naupahai chun phûmtu hrim nei naw ni hai. An phù ang hrimin an chungah sietna ka bur khum ding a ni si a.
17 “Hi hi an kuomah hril rawh:
‘Ka mitthli hi sŭn le zănin,
Chawl loin far kuong kuong sien,
Ka mi, ka naunu thienglâm chun,
Siet dêrna khop kutthlak tuokin,
Hliempui a lo tuor ta si a.
18 Ramhnuoiah ka va suok leh,
Kawlhnâma an thathai ruong,
Zâl thlek thluk chu ka hmu a;
Khawpui sungah ka lut leh,
Trămpui mitsìm hràngzie ka hmuh.
Zawlneihai le thiempuhai chu,
Hriet lo ramah an vakvai zo’ tiin.”
19 Juda chu i hnâwl dĕr el an ta?
Zion chu i tirdak am an ta?
Sukdam thei naw hiel khop a,
Ieng dinga i mi’n tuortir am?
Muongna hun kan beisei a,
Thil thra ieng khom a tlung naw a,
Damna hun kan beisei a,
Thlaphângna chauh a tlung si.
20 Kan suolzie hi aw LALPA,
I hmaah kan inphat nawh,
Kan thlatuhai suolna khom;
Kan lo suol takzet si a.
21 I hming leiin mi thǐm naw la,
I lalthrungpha ropui tak chu,
A muolpho phal lul naw rawh.
Kan kuoma i thuthlunghai kha,
Hre zingin bawse naw hràm rawh.
22 Hnam dang pathienhai lai hin,
Ruo hung tir thei tu’m an um?
Vanin a’n sùrtir am a ni?
Ni lo e, nangma i nih,
Aw kan LALPA kan Pathien.
Kan beisei nang chauh i nih:
Hieng thil po po thawtu chu,
Nangma chauh i ni si a.