Hrèn puon
13
1 LALPA chun ka kuomah, “Fe la, hrĕnpereng inchaw la, chu chun i kawngah inhrên la, sienkhom tui intawktir dĕr naw rawh” a ta. 2 Chuongchun, LALPA thu angin hrĕnpereng chu ka’n chawk a, ka kawngah ka hrĕn a.3 LALPA thu ka kuomah a hung tlung nawk a, 4 “I hrĕnpereng inchawk, i kawnga i hrĕn kha sût la, Eufretisa vadungpui pan la, chu taka chun lungpui kak karah thup rawh” tiin a mi hril a. 5 Chuongchun ka fe a, LALPA mi hril ang chun Eufretis-a lungpui kak kara chun ka thup a. 6 Ni iemani zat hnung chun LALPAN, “Fe la, Eufretis vadung pan la, hrĕnpereng i thup kha la suok rawh” a mi ta. 7 Eufretis vadung tieng chun ka fe a, ka siena hmuna inthok chun ka pur dok a, sienkhom a lo hmon vong ta a, ienga ding khomin a tlâktlài ta nawh.
8 LALPA thu chu ka kuomah a hung tlung a: 9 “Hieng ang bok hin Judahai chapopui le Jerusalemhai suongtawlol chu ka suksiet ding a nih. 10 Hi hnam rilo, ka thu ngaithla nuom lo a, anni tuklulna lungril zuia pathien danghai rong bawl le be lemtuhai hi, hi hrênpereng, ienga ding khoma hmang tlakna nei ta lo ang bok hi an nih. 11 Hrènpereng chu kawngah a kop zing ang hin Israel sungkuo pumpui le Juda sungkuo pumpui hi ka mihai, ka hmingthangna, mawina le ropuina ni dinga ka kuoma kop zing dinga ka siem an ni a, sienkhom ka thu an ngai si nawh.
Uoiin pèng
12 “An kuomah hieng hin hril rawh: ‘Hi hi LALPA, Israel Pathienin a hril a nih: Uoiin pèng po po chu uoiin thun sip ro’ ti hi. Tu khomin, ‘Uoiin peng tin suksip ding chu ka hriet nawa i ngai a ni?’ an ti chun, 13 nangin hieng hin hril tawl rawh: ‘LALPA chun hieng hin a tih: Hi rama chêng po po, Davida lalthrungphaa inthrung lalhai dam, thiempuhai dam, zawlneihai dam le Jerusalema chênghai po po chu inruinain suksip tawl ka tih. 14 Anni le anni invaw hmâttir ka ta, pahai le nauhai insuol an tih. Anni chu hlà loa ka sukbohmang theina dingin lunginsietna, zangaina le lainatna insuo naw ning.
Chapo lo dingin Jerusalem a hril
15 Na dawin ngaithla unla,
Tu khom chapo naw ro,
Chu chu LALPA thu suok a nih.
16 LALPA Pathien chawimawi ro:
Inthimna a hung tir hma,
Tlang thimah insui thlu a
In ke pèn a’n phet hma hin;
Var in beisei lai zingin,
Thim sa inchangtir a tih,
Beidongna thimpui zǐngin.
17 In ngaithlak naw a ni chun,
In chaponahai leiin,
A rûkin trăng ka ti cheu;
LALPA beram dit ruolhai,
Sala thruoi an ni ding chu,
Lung na takin trăng ka ta,
Mitthliin mi’n sil a tih.
18 Lal le a nu kuoma chun,
‘In lalthrungphaa inthok khan,
Khai leh, hung trum thla ta ro;
In lallukhum khumhai kha,
Hlǐp thlâk ding a ni ta si”
Tiin an kuomah hril rawh.
19 Sim tieng khuohai po po chu,
Khar a ni vong ding a na,
Hongtu ding um naw ni hai.
Juda mihai po po chu,
Sala thruoiin um an ta,
An rêngin intâng an tih.
20 Hmar tieng son mit inlĕn la,
A hunghai saw hei thlir rawh.
I beram ruol enkolhai,
I uongpui êm êm hlak kha,
Khaw lai am an um ta a?
21 Ruol bîka i siem kha LALPAN,
Nangma rûntuah a sie pha chun,
Nuhmei nau hase angin,
Nâ i ti hle naw ding maw?
22 ‘Ieng leiin am hieng thil hi,
Ka chungah a tlung a na?’
Ti-a i’n don a ni chun,
I suolnahai lei a nih:
I puonbil an hlǐmpek che a,
Saruokin an soisak che khah!
23 Ethiopia mi, mi hăngin,
A rong a thlak theia maw?
Keite khomin a ze triel,
A thup thei hrim hrima maw?
Chu ang suol thaw chìng mihan,
Thil thra an thaw thei ngai nawh.
24 “Thlalèr thliin a lèn hmang,
Bu si vuong dar ang elin,
Ka sukdar ding cheu a nih.
25 Nangin kei mi theinghil a,
Pathien dang i biek leiin,
Chu chu i chan dinga tlû,
Keiman ka ruot chu a nih,
Ti hi LALPA thu suok a nih.
26 “Kei ngeiin i puonbil chu,
I hmai inkhum phâk hielin,
Ka hlǐmpek ding chè a na,
I zamaw inlang a tih.
27 Tlâng tin le phŭl hmuna hai,
Uirea hur kawdăk a,
Zakmaw taka inzor a,
Tirdakum i thawhai kha,
Ka phâwk suok vong ta si che.
Aw Jerusalem, i chung a pik!
Ieng chen am i porchĕ ding?