Jeremia thil ngèn le Pathien donna
12
1 Aw LALPA, ka chungthuhai,I kuoma ka hung intlun changin,
Indik takin i thaw hlak.
Sienkhom ka vuivaina thu chu,
Ka hung hril tho ding a nih:
Ieng leia mi suolhai hi,
An hmuingil hlak am a na?
Ieng leia mi depdehai,
Inhoi taka an um hlak?
2 I phun a, zung an kei a,
Inthrangin an hung ra a,
An hmŭrah i hnai zing a,
An lungrilah i hla si.
3 Aw LALPA, i mi hriet a,
Nangin i mi hmu zing a,
Ka ngaituo zing che ti khom,
Enin i fie vong hlak kha.
That ding beram ang elin,
Anni rawi hi hnuk suok la,
Thata an um ni ding khom,
Nangma chun hung ruot ta rawh.
4 Ieng chen am ram hi trawlin,
Hnà tinreng an vuoi vong ding?
A chêngtuhai rìtlona leiin,
Ramsahai an ram zo a,
Vate khom an thi zo tah.
Chu baka chun mihaiin,
“Ei chungah ieng am a tlung,
Ti dâm chu en hlak a tim!”
An ti hiel ta chê a nih.
Pathien donna
5 Mi leh kea in intlansiek hmana,
An hnebàn chê a ni chun,
Sakor dàm leh lèm lèm chu,
Iengtin am in in-el ding?
Hmun hima dàm i tlu chun,
Jordan ramngawa lem chu,
Iengtin am i che ta ding?
6 I unau le sunghai chenin,
An lo inphatsan ta che a,
An dem luoi luoi che leiin,
Anni chu ring ta naw rawh.
7 Ka in chu suoksan ka ta,
Ka ro khom maksan ka tih;
Ka hmangai chu hmêlma kutah,
Ka pêk suok ta ding a nih.
8 Ka rochan ka tihai hlak,
Ram hnuoia keipui angin,
A lo inchang zo ta a,
A mi’n rûm khum dur dur a,
Ka theida zawng tak a nih.
9 Ka rochanhai chu vate ang,
Muin la dinga a vèl lai zing,
Vate dangin an ching hron,
An lo ni ta hiel naw maw?
Ramsa po po ko khawm la,
A fa dingin hung thruoi rawh.
10 Berampuhan ka grep huon,
Chîlin an suksiet zo a,
Ka lo thra tak el khom chu,
Ram trawl an inchangtir zo.
11 Rausan hmunah an siem a,
Trawlin a thring bor bor a,
Tu ngaisak a hlaw ta nawh.
12 Tlangram kol sen vunga chun,
Sukramtu invâk an ta,
A ram dung le khanga mihai,
LALPA kawlhnàmin lem a ta,
A him tu khom um naw nih.
13 Bu chi chu thè veng an ta,
Sienkhom hling chauh sîk an ta,
Chău hnêpin inrim sien khom,
Ieng hlawkpui nei naw ni hai.
LALPA lungsen inling leiin,
An sǐk sun khom inzăpui an tih.
14 Hi hi LALPA hril chu a nih: “Ka mi Israelhai kuoma ro hluo ding ka pek ram lo la hêktu an tuolbawm ram rilohai chu an rama inthokin pot dok ka ta, anni laia Juda sungkuo lo umhai khom chu la suok ka tih. 15 Ka lak suok hnung chun anni chu lunginsiet nawk ka ta, an rêngin an rochan ram sengah hung thruoi nawk ka tih. 16 Kha hmaa Baal hminga inkhâm dan ka mihai lo zirtirtuhai khom lo ni hai sien, ka mihai um dan anga khawsa ve a, ‘Hring zing LALPA hmingin kan tiem’ tia ka hminga an inkhăm ve pha chun, ka mihai lai indin tawl ka tih. 17 Sienkhom ka thu ngaithla nawtu hnam taphot chu pot suok ka ta, sukbo ka tih” ti hi LALPA thu suok a nih.