Thuthlung bawsiet
11
1 Hi hi Jeremia kuoma LALPA thu hung tlung chu a nih: 2 Hi thuthlungin a bitukhai hi ngaithla la, Judai ram le Jerusalema chenghai kuomah hril rawh. 3 LALPA, Israel Pathien chun hieng hin a hril: “Hi thuthlunga thu bitukhai ngaithla nawtu chu trongsie phurin um raw se. 4 Chuong thuthlunghai chu Aigupta ram, rawtuina meia inthoka in thlatuhai ka hung thruoi suok laia an zawm dinga thu ka pekhai chu a nih. An kuomah, ‘Ka thu awiin ka hril taphothai hi zawm unla, ka mihai ning in ta, kei khom in Pathien ning ka tih. 5 Chuongchun, nenetui le khuoizu luongna ram, in thlatuhai kuoma inkhâm meua pek ka lo tiem chu hlen suok ka tih’ ka ta, chu chu voisuna in hluo ram hi a nih” tiin. Kei chun, “Amen, Aw LALPA” tiin ka don a.6 LALPA chun ka kuomah, “Judai ram khuoa hai le Jerusalem kotthlêra hai hieng thu po po hi puong rawh: “Hi thuthlunga thu bitukhai hi zawm ro. 7 Aigupta rama inthoka in thlatuhai ka hung thruoi suok nia inthoka voisun chen hin, ‘Ka thu zawm ro’ tiin ka hril zing tawl a. 8 Sienkhom, an awi nuom naw a, an ngaisak bok nawh; chuong nêk hmanin lulul takin an lungrila rîtlona chu an zawm lem hlak. Zawm dinga ka pek thuthlung thuhai chu an zawm naw leiin chuong thil po poa trongsie chu an chungah a hung tlung tah a nih” tiin.
9 LALPA chun ka kuomah, “Juda mihai le Jerusalema chênghai hin thil phierruk an nei a. 10 An thlatuhai, ka thu ngaithla nuom nawtuhai suolna tieng chun an kir nawk a, pathien danghai chu zuiin an rong an bawl a, Israel sungkuo le Juda sungkuohai chun an thlatuhai kuoma ka thuthlung chu an bawsiet tah a nih. 11 Chuleiin, LALPA chun hieng hin a tih: Ngai ta u, an pumpel thei lo ding sietna chu an chungah ka hung intlungtir ding a nih. Mi ko khêk hai sien khom, don tawl naw ning. 12 Sietnan a hung tlak buok pha chun, Judai rama khuohai le Jerusalema chênghai chun rimtui rawa an biek hlak pathienhai chu ko khêk an ta, chuonghai chun sietna lakah hung thrangpui naw ni hai. 13 Aw Juda, khuo i nei zât hiela tam pathien i nei a, thil inzakumthlak tak el, Baal hmaa rimtui i rawna ding maicham khom Jerusalem kotthlèr zât hiel i nei bok hi. 14 Chuleiin, hieng mihai hi trongtraipek naw la, an ta dingin ka kuomah dawvan hung kai naw rawh, an beidong huna khom an mi kona chu ka don naw ding a ni si a” tiin.
15 “Mi tam tak suolpui hlak siin,
Ka hmangai chun ka Tempulah,
Iem a thaw rêng rêng hlak a na?
Sa ser i hung inhlàn leiin,
Hremna pumpel i’n ringa maw?
Rîtlona i thaw phâ phà leh,
Inhoi i ti chauh hlak khah.
16 ‘Oliv thing mawi le ra nuom’
Tiin LALPAN a ko hlak che a,
Sienkhom thlipui anga nasa,
Meipui inrûm hum huma chun,
A raw hmang ding che a na,
I kâuhai kăng hmang a tih.
17 Israel sungkuohai le Juda sungkuohaiin suol thaw a, Baal kuomah rimtui inhlăn a, nangni phuntu cheu, Iengkim LALPA chu lungsen dinga in cho phăwk leiin, nangni ngeiin in chungah sietna in intlun thu chu a hung puong a nih.
Jeremia an phierruk
18 That tuma an mi phierrukna chu LALPAN a mi’n hriettir leiin ka hriet a, chuong lai chun an thilthaw po po chu a mi’n hmutir a. 19 Kei chu that dinga an thruoi beramte nunnem tak ang ka ni leiin hieng anga an mi lo phierruk thu khom hi ka lo hriet dĕr si nawh:
“Thing chu a ra leh phûr ei ta,
Hringmi khawvela inthok hin,
Ama chu sât thlang ei ta,
Tu khom hriet ta lo dingin,
A hming khom sukbo ei tih.”
20 Sienkhom aw Iengkim LALPA,
Rorêlna fel kengkawtu,
Sungril le lungril fietu,
Iengkimthawthei i ni leiin,
Anni rawi chunga phuba,
I làk phâ mi’n hmutir rawh,
Ka chungthu hi i kuomah,
Iengkim ka’n koltir si a.
21 Chuleiin, Iengkim LALPA chun, “I hringna la tumtu Anathot mihai, ‘Kan kuta i thi nawna dingin LALPA hmingin thu hril ta naw rawh’ tituhai kuoma chun hieng hin a tih: 22 ‘Anni chu hrem tawl ka ta, tlangvalhai chu kawlhnâmin sukhlum an ta, an naunuhai le naupahai chu tràmin thi’ng an tih. 23 Anathot mihai ka hrem hun a tlung pha chun an chungah sietna ka hung intlungtir ding a ni leiin a thi mahla tu khom um naw ni hai’ tiin” a ta.