Pathien biek le milim biek
10
1 Aw, nangni Israel sungkuohai,LALPA hril hi lo ngaithla ro,
2 LALPA chun hieng hin a tih:
“Hnam danghai chǐng dan taphot,
Thaw ve di’n inchûk naw ro;
Vana inchiknahai chu,
Hnam dangha’n an trǐ angin,
Nangni chun trǐ ve naw ro.
3 Hnam danghai chǐng po po hi,
Hmangna bo thil vong a nih:
Rama thing an va lăk a,
Kut themthiemha’n hrei hmangin,
Milim an hung ker suok a.
4 Tangkaruo le rangkachakin,
Milim chu an cheimawi a,
A tlûk el nawna dingin,
Tubo le thirkil hmangin,
Nghet takin an kil khawm a.
5 Leipuia vate trì ding,
Trǐkhai an sie ang a nih:
Milim chu a trong thei nawh;
Kè a nei ve naw leiin,
A puta put son a ngai.
An milimhai chu trǐ naw ro,
Ieng poi an tawk thei naw a,
Thil thra an thaw thei bok nawh.”
6 Aw LALPA nangma ang hrim,
Mi tu khom an um dèr nawh;
I hrât a, thil i thaw thei a,
I hming khom a ropui bok.
7 Aw, nang hnam tinhai Laltak,
Tu’m inza lo an um ding che?
Inza i phû hrim a nih,
Hnam tina mivarhai le
An lalram sung po poah,
Nangma ang an um dĕr nawh.
8 An rêngin mi chawlol le
Hmangna bo an ni vong a,
Hmangna bo thing milim chu,
An zirtirtu a ni si.
9 Tangkaruo an sut phĕk chu,
Tarsis a’nthokin an lăk a,
Upaz-a inthokin rangkachak.
Rangkachak ser thiemhaiin,
Milim an hung siem suok a,
Puon dumpawl le sendukin,
Chuonghai chu an inthuom a,
Sienkhom kuta siem an ni tlat si.
10 LALPA ruok chu Pathien tak,
Pathien hring, chatuon Lal a nih.
A lungsen pha hnuoi a’n hnǐng a,
A lungsenna so inling chu,
Hnamhaiin an tuor zo nawh.
11 “An kuomah hieng hin hril rawh: ‘Hieng pathienhai, hnuoi le vanhai siemtu khom ni ve lohai hi chu hnuoia inthokin la bohmang an ta, vankhup hnuoia inthokin bohmang vong an tih’ tiin.
Pathien inpâkna hla
12 Sienkhom a thilthawtheinan,
Pathienin hnuoi a siem a,
A varnaa khawvel indinin,
A hriet thiemnan van a zăr phar.
13 A rawl a hang insuo pha,
Van tui a’n ri hum hum a;
Kawl bulah sûm hung suokin,
Ruo sûrin kawl a’n leptir a,
A thli bawma inthokin,
Thli a hung inthrè suok hlak.
Milim le a siemtu chan
14 Mi tin an chawlol zo a,
Hrietna hrim an nei naw a,
Rangkachak sertu phot chu,
A milimhan sukzak an tih,
Inhlèmna thil vong a na,
Maniin thuok an nei nawh.
15 An rêngin hmangna bo le
Nuizatbûr an ni vong a,
An chungthu rèl a ni pha,
An rêngin bohmang an tih.
Jakob Chanpuol
16 Jakob Chanpuol LALPA chu,
Anni ang a ni ve nawh;
Thil iengkim Siemtu a na,
Israel chu a ro hluotu a na,
A hming Iengkim LALPA a nih.
Sala an intăng ding thu
17 An inhuol mĕk ta chêu leiin,
Puonthuo zielin tlân suok ro.
18 LALPA chun hieng hin a tih:
“Tuta a rama chênghai hi,
Ka thrâm suok tawl ding a nih.
An man khawm vong theina di’n,
Buoinan hung tlak buok a tih.”
19 Ka hliem chu ka vangduoi ngei!
Sukdam ruol ka ni si nawh!
“Ka natna a ni tlat leiin,
Keiman ka tuor el ma naw’n!”
Tiin kei ka’n hnèm fawm a.
20 Ka puon in a chim ta a,
A thlungna a chat vong tah.
Ka nauhai an thruoi hmang a,
Puon in mi zarpektu ding,
Tu khom an um ta si nawh.
21 Beram vengtuhai hlak chun,
An hmuingil theina dinga,
LALPA hang rawn nachang hrim,
An hriet teu teu bok si nawh.
Chuleiin, an beram ruol,
An inchek dar vong a nih.
22 Ngai ta u, ri a hung tlung chu,
Hmar tieng panga inthoka
Buoina ri râpthlak tak chu;
Judai khawpuihai sukramin,
Sihal ruol chĕngna hmunah,
An inchangtir ding a nih.
Jeremia trongtraina
23 Mihriem nun hi aw LALPA,
Ama thua nung a ni naw a,
Mihriem chun ama le ama,
A’n thruoi thei nawh ti ka hriet.
24 Aw LALPA, mi thunun la,
Sienkhom lungsenin ni loin,
Zaidam takin mi thunun rawh,
Chuong naw chun thi el ka tih.
25 Nangma pom ve nuom nawtu,
I hming lam ve nuom nawtu,
Hnam dang mihai chunga chun,
I lungsenna bun thla lem rawh.
Jakob sungkuohai fa zoin,
An ram an suktlaran a,
An fak ram rǐt an ta hi.