9
1 Ka thlunglu si siktui hnărah,Ka singmit hi mitthli hnârah,
Inchang thei sien la chu aw!
Ka mi an thathai sûnin,
Sŭn le zăn ka tră ding bah!
2 Thlalĕrah khuolbûk nei lang,
Ka mihai hi maksan daiin,
Intom bo ka va nuom ngei!
Uire hmang vong an ni si!
Depde fuon khawm ruol an nih.
3 An leiin khêl kâp suok din,
Thal ngul angin a’n pei zing.
A ram sûngah thudikin,
Hnĕna a chang thei ta nawh.
Suol pakhata inthokin,
Suol dangah an pakai a,
Kei an mi hriet fŭk ta nawh”
Tiin LALPA chun a hril.
4 “Ruolhai lakah fimkhur ro,
In unauhai ring naw ro.
Unauhai chu hlĕmhmang an na,
Ruolhai chu mi demhmang a nih.
5 Ruolin ruol dang a hlĕm a,
Thudik hril an um ta nawh.
An lei chu khêl hril dingin,
An inchuktir ngat ngat a,
Anni rawi săwlpui tak chu,
Thil suol thaw ngat ngat a nih.
6 Hlĕmhmang laia chêng i na,
Inhlèma an buoi leiin,
Kei an mi hriet fuk ta nawh”
Ti hi LALPA thu a nih.
7 Chuleiin, Iengkim LALPA chun
Hieng ang hin a hril a nih:
“Ngai ta u, ka mihai suol leiin,
Raw tuina meiah rawin,
Anni chu ka fie ding a nih.
Chuong baka thaw dan ding chu,
Ieng am a um chuong bik a?
8 An lei chun thalhlawn angin,
Khêl a phu suok zung zung a;
An tuolbawm seng bau thrain,
An biek liem liem tawl hlak a,
Sienkhom lungril tak ruok chun,
Châng an inkam khum hlak si.
9 Hieng thil lei hin anni chu,
Ka hrem naw ding am a ni?
Chuong ang hnamhai chunga chun,
Phuba ka lak naw ding maw?”
10 Tlânghai sûnin trap ka ta,
Inring takin khêk ka ta,
Thlalĕr phŭl khom sûn ka tih;
Rausan hmun inchang zoin,
Tu khom an fe ta naw a,
Bawng inbù ri a rè ta a,
Chungleng vahai an trìn hmang a,
Ran ruol tla an um ta nawh.
11 “Jerusalem chu hmun se ram,
Sihal chèngna hmun ning a ta,
Judai rama khawpuihai chu,
Hluotu tu khom um loin,
Rausan hmunah inchang a tih.”
12 Chuong thil chu hre thiem ding tawk mi var an um naw a ni maw? Tu am a na LALPA thu lo dongtu le puongtu ding chu? Tu khom hraw ngai lona thlaler ang topa ieng leia ram chu a se hmât zo am an ta a? 13 LALPA chun, “An kuoma dàn ka pekhai chu an hnăwl a, ka rawl an ngaithlak nuom naw a, ka thu an zawm nuom bok nawh. 14 Zawm nêk hmanin lulul an insuo a, an thlatuhaiin an lo inchuktir ang khan, Baal an biek ta lem a. 15 Chuleiin, Iengkim LALPA, Israelhai Pathien chun, “Ngai ta u, hieng mihai hi bu khâ infaktir ka ta, an dawn dingin tui khà peng ka tih. 16 Anni le an thlatuhai khomin an la hriet ngai lo hnamhai lai chun sukdar ka ta, ka sukbohmang vong hmâ khat chu kawlhnâm leh hnot ka tih” a ta.
Jerusalema trapna
17 Hi hi Iengkim LALPA chun a hril:
“Tuhin in ngaituo ro khai,
Nuhmei trap thiem ruolhai chu,
Trap dingin ruoi tawl unla,
Trap thiem thiem hung raw hai se.
18 Inhmaw takin hung hai sien,
Kan mitthli far zoi zoi a,
Tui anga a luong chenin,
Mi hung trap khum raw hai se.
19 Zion-a inthok khomin,
Trap ri chu an hriet phak a,
‘Ei va hang se ta ngei maw!
Ei va hang muolpho de aw!
Ei inhai a ram zo tah,
Ei ram suoksan el ei tiu’
Ti chu an trap hla a nih.
20 Aw nangni nuhmei ruolhai,
LALPA thu hi ngaithla ro;
A thu chu in naah lût sien,
In naunuhai chu trap hla,
Insam dan zirtir unla,
Mani tuolbawmhai seng chu,
Lusûn hla inchûktir ro.
21 Thǐna chu ei tukverah,
A hung invăk lŭt ta a,
Ei kul sŭngah a lût tah;
Kotthlêrah naupang tuolchai,
Hmu ding an um ta naw a,
Tuolzawlah tlangval um khawm,
Hmu ding hrim an um ta nawh.
22 “Miruong chu hnawmhnok angin,
Tuol lai indar phung a ta,
Buphal lak hmai ang elin,
Tu khomin inkhawm naw nih”
Tiin LALPA chun a hril.
23 LALPA chun hieng hin a tih: “Mi varin a varna uongpui naw sien la, mi hrât khomin a hràtna uongpui naw sien, mi hausa chun a sum le pai uongpui bok naw raw se. 24 A uongpui taphot chun, kei LALPA hi hnuoi chunga zangaina le indikna hmanga fel taka rorêl hlaktu le chuong ang thil lawm hlaktu ka nizie a hriet thiemna le a hrietna chu uongpui lem raw se,” tiin. Chu chu LALPA thu suok a nih. 25 LALPA chun, “Ngai ta u, taksa chaua sertanhai ka hremna ding nihai chu a hung tlung mĕk a nih. 26 Aigupta mi hai, Juda hai, Edom mi hai, Amon mi hai, Moab mi hai le thlalĕr ram hla taka um, baksam ziet kăwnghai po po khom chu hrem ka tih. Chuonghai chu sertan lo hnam vong an na, Israel sungkuohai ngei khom lungril tienga sertan lo an nih” tiin.