8
1 “Chu phá chun Juda lalhai ru dam, hotuhai ru dam, thiempuhai ru dam, zawlneihai ru dam, Jerusalema chênghai ru dam chu an thlăna inthokin la suok an tih.2 Ngaina taka an rong an bawl, an zui, an rawn le biek hlak nisa le thla le vana arasihai hmua chun an ruhai chu phor suok an ta, la khawm an ta, phûm nawk ta naw ni hai a, hnuoia hmunhnok dĕng bŭm angin indar a tih.3 Hi hnam suol tak la um sun po po, ka hnot darna hmuna la chambânghai chun dam nêkin thi thlang lem an tih ti hi Iengkim LALPA thu suok a nih.
Suolna le hremna
4 Chuong naw khom chu an kuomah,
LALPA chun hieng hin a tih:
Mi an tlu pha, tho ta loin,
An um song hlak am a ni?
An pĕt hmang pha, kîr ta loin,
An liem song hlak am a ni?
5 Ieng leia hi mihai hi,
An pĕt hmang hlak am a na?
Ieng leia Jerusalem hi,
A pêt hmang hlak am a na?
Lam indik lo hraw tlatin,
Hung kir zai hrim an rĕl nawh.
6 Nâ sitin ka ngaithlàk a,
Thudik hril an um dĕr nawh.
“Iem ka thaw leh?” an ti a,
An suol an bànsan nuom nawh.
Indonaa sakor lǐm angin,
An lampui tieng seng an tlàn.
7 Chungleng tuivaarngo chun,
Hunbi inthlak a hriet a,
Vathru, vamûr le kanghlai ha’n,
An inpèm hun ding an hriet.
Keima mihai ruok hin chu,
LALPA thuruot an hriet nawh.
8 Iengtin am ‘Mi var kan nih,
LALPA dàn koltu kan nih’
In ti ngam hrim hrim a na?
In lekhaziektuhaiin,
An kawlom khêlhlip hmanga,
An hlĕm lei chêu a ni kha.
9 Mi varhai chu inzakin,
Chî-aiin man tuok an tih.
LALPA thu an hnawl si chun,
Ieng varna’m nei ta’ng an ta?
10 Chuleiin mi dang kuomah,
An nuhmeihai pe’ng ka ta,
An in le lohai chen khom,
Mi dangin chang ta’ng an tih.
A chîn tak le lien tak chenin,
Duàmna ringotin an sip a,
Zawlneihai le thiempuhai khom,
Mi hlèm ringot a nih an thaw.
11 Ka mihai hliempui tuor chu,
Rûndâlin an tuompèk a,
‘Dam a tih, dam a tih’ an ta,
A dam chuong teuh bok si nawh.
12 An um dàn luoksuokum chu,
An inzàpui dèr naw maw?
Inzapui teu teu lo e!
An hmai a trim naw hrim hrim.
Chuleiin, a lo tlu tahai lai chun,
Anni khom tlu ve’ng an ta,
Anni ka hrem huna chun,
Pei thlâkin um vong an tih’
Tiin LALPA chun a hril.
13 LALPA chun hieng hin a hril:
“Sǐk ding nei dêr naw ni hai,
Grep hrui ra naw ni a,
Theichang ra bok naw ni a,
A hnahai vuoi vong a tih.
An kuoma ka pêk po khom,
La kîrpek nawk vong ka tih”
Ti hi LALPA thu suok a nih.
14 ‘Ieng leia inhawr khawma,
Ei inthrung zing am a na?
Thaw ro, kul nei khuoa hai,
Thi dingin tlân khawm ei tiu!
LALPA ei Pathien hlak chun,
A lakah ei suol leiin,
Tûr tui a mi’n dawntir a,
Bohmang dinga a ruot sa,
Ei ni tawl vong tlat si a.
15 Muongna ei beisei hlak a,
Sienkhom thil thra a tlung nawh;
Dam hun ding ei beisei a,
Thlaphangna chauh ei dong si.
16 Hmêlma sakor hnàr hnăwt ri,
Dan-a’nthokin ei hriet a,
An sakor inhràm ri chun,
Ram pumpui a sukthin a.
A ram sunga um po po,
Khawpui le a mi chĕnghai,
Rawt ram dingin an hung ie.
17 Rûl tûr nei, khawi ngam thei lo,
Nangni lai hung tir ka ta,
Chuonghai chun chuk an ti cheu”
Ti hi LALPA thu suok a nih.
Jeremia’n Jerusalem a trà
18 Ka hlimna a hung chuoi a,
Lungngainan a mi tuom a,
Ka lung a na ngawi ngawi a.a
19 A ram dung le khanga chêng,
Ka mihai trap ri chu ngai ta:
‘Zion-ah LALPA a um naw maw?
A sûngah a Lal a um naw maw?”
Tia an trap khèk ri chu.
“An milim siem fawmhai le
Hnam dang pathienhai bein,
Ieng leia ka lungsenna,
An cho phâwk hrim am a na?
20 “Bu sîk hun a liem ta a,
Nipui khom a tawp ta a,
Sandam ei la ni si nawh.”
21 Ka mihai an hliem changin,
Kei khomin ka tuor ve a,
Hrilhaiin ka sŭnpui hlak.
22 Gilead-ah thing hnài damdawi,
A um hlol naw a ni maw?
Chu taka chun sukdamtu,
A um ve naw am a ni?
Ka mihai hliempui tuor hi,
Ieng leia a dam thei naw?