5 “In um dan le thilthaw dana hai in insiem thra takzet a, indik taka indawr tuo a, 6 hnam dang mihai, fahrahai le hmeithaihai poi tawk lo a, hi hmuna hin thisen in insuo naw a, in sietna ding pathien dang in zui naw phot chun, 7 hi ram, tiena tlanga inthoka in thlatuhai kuoma ka peka hin, kumkhuoin inchêngtir ka ti cheu. 8 Sienkhom en ta u, khêl thu, thu hmang lohai chu in ringsan lem si.

9 “Rŭk inruin, tuol thatin, uirein, pathien danghai hming sala inkhâmin, Baal hmaah rimtui rawin, in hriet ngai lo pathienhai chu zui zing siin, 10 tu hin hi tempul, keima hming ngei chawitua hin in hung a, ka hmaah ngirin, ‘Ei him tah ie!’ in ti hin, hieng thil tirdakum po po hi thaw thei dinga him taa inngai in ni? 11 Hi tempul, ka hming chawitu hi suomhmang pûka in ngai am a ni? Ka bithlâk zing cheu a nih” ti hi LALPA thu suok a nih.

12 “Ka hming chêngnaa ka hmang hmasak Siloa chun fe unla, ka mi Israelhai rìtlona leia ka thilthaw chu va en ro. 13 Hieng thil in thaw zing pum khomin, kei chun ka la biek trăwk trâwk cheu a, sienkhom in mi ngaithlàk naw a, ka ko cheu a, in mi don bok nawh, LALPA chun a tih. 14 Silo chunga ka thaw ang khan, hi tempul, ka hming chawitu, nangni le in thlahai kuoma ka hmun pĕk, in ringsan hlak chunga khom hin ka thaw ve ding a nih. 15 Efraim thla, in unauhai ka hnot suok vong ang khan, nangni khom ka kuoma inthokin hnot suok veng ka ti cheu, ti hi LALPA thu suok a nih.

16 “Chuleiin, hieng mihai hi hung trongtraipek naw la, an ta dingin ka kuomah dawvan hung kai naw la, hung hnipêk bok naw rawh, ka ngaithlak naw ding chè a ni leiin. 17 Judai ram khuoa hai le Jerusalem kotthlêra an thilthawhai hi i hmu naw am a ni? 18 Ka lungsen cho phâwk dingin, naupang ruolin thing an fom a, pahaiin mei an sĕm a, nuhaiin bei tlang an hmet a, van lalnu kuoma inhlàn dingin bei an siem a, pathien danghai kuomah dawn thilhlân uoiin an bun suok. 19 Kei hi a ní an cho phăwk chu? Anni sietna ding le muolphona ding an thaw lem an naw maw?” ti hi LALPA thu suok a nih. 20 Chuleiin, Iengkim LALPA chun hieng hin a tih: “Ngai ta u, hi hmun chunga dam, mihriem le sahai chunga dam, rama thing le hnuoia thei rahai chunga dam ka lungsenna le lung inlingna chu hrik thlàng ka ta, kàng a ta, mit naw nih” tiin.

21 Hi hi Iengkim LALPA, Israelhai Pathien chun a hril: “Fe unla, pumraw thilhlàn chu inthawina pangngaiah bel sa unla, a sa khom chu fa law law ro. 22 Aiguptaa inthoka in thlatuhai ka hung thruoi suok khan, pumraw thilhlan le hlanbiekna chungchangah in thlatuhai kha ieng khom ka phût nawh. 23 Hi thu hi a nih ka pek lem chu: ‘Ka thupek zawm unla, in Pathien ning ka ta, ka mihai ning in tih. Ka thupek ang taka in khawsa chun, in ta dingin thra’ng a tih,’ tiin. 24 Nisienlakhom, an ngaithlak naw a, an ûksak bok nawh; chuong nèk hmanin, an lungril thra naw tieng chu ăwnin tuklul an insuo a, hma tieng pan nêkin an hnungtol ta lem a. 25 In thlatuhaiin Aigupta an suoksana inthoka voisun chen hin ka rongbawltu zawlneihai chu in kuomah ka tir ni tin hlak a. 26 Nisienlakhom, an ngaithlak naw a, an bengkhon bok nawh. Lululin rîng an sukkhong a, an thlatuhai nêkin thil thra lo an thaw nasa lem.

27 “Chun, hieng thu po po hi an kuomah hril la khom ngaithla naw ni hai che a, ko la khom don chuong naw bok an ti che. 28 An kuomah hieng hin hril rawh: Hi hnam hin LALPA an Pathien thu an ngaithlàk naw a, a keithruoina an zâwm bok nawh. Thudik a bo ta a, an băua inthokin a suok ta nawh. 29 I sam tan la, peihawn rawh. Tlâng sâng kol vula chun lusûn angin um rawh. Hi suonhai chunga hin kei LALPA hi ka lungsen a, peithlain ka hnungson tawl ta si a.

30 “‘Judai rama chênghai chun ka mithmuah thil suol an thaw a. Ka hming chawitu ina chun an thil tirdakum milimhai siein ka in an sukporche a. 31 Meia an naupa le naunuhai inhlăna rawna dingin Hinom Ruomah Tofet bawlhmun sang an siem a, chuong chu ka thupek a ni naw a, ka ngaituonaa khom a lût ngai nawh. 32 Chuleiin, fimkhur ro, nihai chu a hung tlung ding a ni tah, LALPA chun a tih. Chu pha chun mihaiin ‘Tofet’ amanih ‘Hinom Ruom’ ti ta loin ‘Insămna Ruom’ ti ta lem an tih, a ruoma phŭm seng naw khop Tofeta chun mithi ruong zâl a tih. 33 Ruonghai chu chungleng vatehai le ram sahaiin tlăn an ta, tu khomin hnot zâm naw ni hai. 34 Judai ram khawpuihai le Jerusalem kotthlêra hai chun lawmna le hlimna ri hrim hrim, mo le moneitu rawlhai khom sukrè vong ka ta, rausan ram inchang tang a tih.