Jerusalem an inhuol
6
1 “Nangni Benjamin thlahai,Himna zongin tlân hmang ro,
Jerusalem suoksan ro!
Tekoa khuoah tawtawrawt mûtin,
Beth-Hakeremah puong dar ro!
Hmar tieng panga inthokin,
Sietna a hung inthok ie,
Tlâksietna râpthlak tak chu.
2 Zion naunu hmel thra le
Inno chu suksieng ka tih.
3 Ama chu hung do dingin,
Berampuhai chu hung an ta,
An beram ruol hung thruoi an ta,
A vêlah puon in kei an ta,
An nuomna sengah um an tih.
4 “Do dingin inbuotsai ro khai!
Tho ro, sùnchangah bei ei tiu!
Sienkhom, a va hang poi ngei de!
Nisa a tla dier dier ta a,
Ni hlim khom a sei ta hle hi.
5 Thaw ro, zanah bei lem ei tiu,
A kulhai ei suksiet ding a nih.”
6 Iengkim LALPA chun a hril:
“A thinghai phûr thlu unla,
Jerusalem inhuolna dingin,
A vêlin hlăn daw kuol ro.
Nêksawrnaa sip khawpui hin,
Hremna a tuor ngei ding a nih.
7 Tuikulah tui a pût angin,
Khawlona a phù suok zing a.
Inpawngnêkna le inroknahai,
A sunga chun a hluor a;
A natna le hliemna tuorhai,
Hmu ding a um zing a nih.
8 Aw Jerusalem, fimkhur hlè la,
Ka zilna che hi poisa rawh;
Chuong an naw chun nghatsanin,
Hmun rausanah siem ka ti che a,
Hluotu hrim nei naw ti nih.”
Israelhai an hel
9 Iengkim LALPA chun hieng hin a tih:
Israel mi hlaa um sunhai chu,
Grep ra i lo fai kèl angin,
An rêngin rût khawm vong la,
A kau tin chu kuta maiin,
A rêngin lo fái kèl rawh.”
10 Tu am bein, fimkhur dingin,
Ka’n hriettir ta ding a na?
An ngaithlàk nawna dingin,
An nahai an suksĕt a,
LALPA thu chu an ta dingin,
Ngai nghokum a’n chang ta a,
An hlimpui ta hrim hrim nawh.
11 Sienkhom LALPA lungsennan,
A mi hluo sip tlat leiin,
Insùm harsa ka ti a nih.
“Khawlaia naupang ruol le
Tlangval pungkhawmhai chungah,
Bun suokin hrîkthla el rawh;
Nupa khomin tuor an ta,
Upa, tarkûna damhai khomin.
12 Chu rama chênghai chungah,
Ka kut hi ka’n let pha chun,
An in le lo le nuhmeihai,
A rêngin chân vong an ta,
Mi dangin neipek an tih”
Ti hi LALPA thu suok a nih.
13 A chîn taka inthoka
A lien tak chenin tu khom,
Duàmnain an sip a,
Zawlnei le thiempuhaiin,
Mi hlèm ringot an thaw a.
14 Ka mihai hliempui tuor chu,
Rŭndâlin an tuompek a,
‘Dam a tih, dam a tih’ an ta,
A dam chuong teu si naw a.
15 An chàng dan luoksuokum chu,
An inzăpui dèr naw maw?
Inzăpui teu teu lo e!
An hmai a trim naw hrim hrim.
Chuleiin, a tluhai lai,
Anni khom tlu vêng an ta,
Anni ka hrem huna chun,
Pei thlâkin um vong an tih’
Tiin LALPA chun a hril.
Pathien ditzawng an hnawl
16 LALPA chun hieng hin a tih:
“Lamthruomah ngirin en ro,
Lampui hlun chu indon ro,
Lampui thra indon suok unla,
Chu lampui chu hraw unla,
Chu chun in thla muong a ta,
Chawl hadamna hmung in tih.”
Amiruokchu, nangni chun,
“Hraw nawng kan tih” in ti si.
17 Nangni enkaitu dingin,
Ralvêngtuhai ka sie a,
“Tawtawrawt ri ngaithla ro”
Tiin ka hril diem chêu a,
Nisienlakhom, nangni chun,
‘Ngaithla naw ning’ in ti si.
18 An chunga thil tlung ding chu,
Aw hnamhai, ngaithla unla,
Hrepuituhai, en chieng ro.
19 Aw leihnuoi, lo ngaithla rawh,
Hienghai chunga hin sietna,
Ka hung intlun ding a nih,
An thil phanhai râ ngei chu;
Ka thuhai ngaithla loin,
Ka danhai an hnawl si a.
20 Seba a’nthoka rimtui le,
Ram hlaa mafu hmui chu,
Iem a na ka thlâkhlà ding?
In pumraw thilhlanhai chu,
Lawm tlâkah ka ruot naw a,
In hlànbieknahai khomin,
A mi suklawm chuong bok nawh.”
21 LALPA chun hieng hin a tih:
Hieng mihai lampuia hin,
Tlûkna ka sie ding a nih.
Pahai le naupahai chu,
Inpal thlu rem rum an ta,
Tuolbawmhai le ruolhai khom,
Tlu hlum rem rum tawl an tih.
Hmar tienga inthoka rûntu
22 Hi hi LALPA chun a hril:
Hmar tieng rama inthokin,
En rawh, sipai an hung saw;
Hnuoi kila hnam ropui chu,
Chok thoin a um mek tah.
23 Thal ngul le fei an chawi a,
An kolin zà an ngai nawh.
Sakora an tlan ri chu,
Tuipui inrŭm ang a na,
Ralthuom an inbel vong a,
Do ding chea hung an nih,
Aw, nang Zion naunu.”
24 An rìvà kan lo hriet a,
Kan kuthai a zoi thla a,
Lungngainan a mi man a,
Nau hase tuor ang kan nih.
25 Ram tieng fe suok naw unla,
Lampuiah invâk naw ro,
Hmêlmahan kawlhnâm an chawi,
Kil tinah râl an hung lien.
26 Aw ka mihai, saiip silin,
Vut lai intâl ta ro khai;
Naupa mal sûn ang topin,
Sûnin trap rak rak ta ro,
Sawt naw teah suksetu’n,
A mi nang thut ding a nih.
27 “Thîr fietuah ka siem che a,
Ka mihai hi kapathîr an na,
Fiein an lampui inchieng rawh.
28 An rêngin hel hmang an na,
Mi hrilsiet an hmang bok a,
Dâr le thîr ang hi an na,
An thilthawna iengkimah,
Nghar-êk an kai vong a nih.
29 Pŭm zâptu’n a zâp ling a,
Suon chu a’n tui ral vong hlak.
Annihai rawi ruok hi chu,
Mi suolhai pei vong naw chun,
Sukthieng tum a trangkai nawh.
30 Tangkaruo êksie ang el a,
LALPA hnawl hnung an ni si.