Jerusalem suolna
5
1 “Jerusalem kotthlêrhai hi,A suk a tungin fang vel la,
Tuolzawlahai zong vong la,
Indik taka thilthaw hlak,
Thutak zong mi pakhat bek,
I hmu pal hlauh a ni chun,
Hi khuo hi ngaidam ka tih.
2 Kei hring zing LALPA hmingin,
Thu intiemkam hlak sien khom,
Khêlin an inkhâm zing tho.”
3 Aw LALPA, thutak i zong a,
I vuok a, an poisa chuong nawh,
I rawt nawi a, an sim chuong nawh.
Lung thǐr nêka chang hielin,
An hmel an sukrum lem a,
Sim dâm chu an tum dĕr nawh.
4 Kei chun, “Mi pasie an ni a,
An mawlin an invêt bok a,
LALPA lampui an hriet naw a,
Pathienin an thaw ve dinga,
A tuk chin khom an hriet nawh.
5 An thruoituhai kuomah fein,
Anni chu inbiekpui ka tih;
Anni chun LALPA danhai le
Pathien thu tuk hrieng an tih”
Tiin ka lo ngaituo hlak a.
Sienkhom zai khata luongin,
An ringkol an suktliek a,
An khaidiet an suktan a.
6 Chuleiin, ram palailengah,
Sakeibakneiin sèng a ta,
Satene’n thlalĕrah pot chen a ta,
Keite’n an kotah inchăn a ta,
A suok phot lo pot chen a tih,
An hel dan hi a râpthlak a,
An hnungtolna a tam bok si.
7 “Ieng leia ka ngaidam ding che?
I nauhan an mi nghatsan a,
Pathien ni lohai hming chu,
Sâlin thu an inkhàm a.
An mamaw po ka phuhrŭk a,
Sienkhom an mi uiresan a,
Nawchizor bûkah an intom.
8 Sakor hur chawm thau angin,
Tuolbawmhai nuhmei châkin,
A tu el khom an inza ruoi si.
9 Hi lei hin ka hrem naw ding?
Chuong hnamhai chunga chun,
Phuba ka lâk naw ding maw?”
Ti hi LALPA thu suok a nih.
10 “A grep huon hang suosam ro,
Amiruokchu sukram naw ro.
A kâuhai sàt thlapêk vong ro,
LALPA ta an ni si naw a.
11 Israel le Juda sungkuohai chu,
Ka lakah an ringum naw hulhuol”
Ti hi LALPA thu suok a nih.
LALPAN Israel a hnawl
12 LALPA chungthuah khêl hrilin,
“Ieng khom mi law teu naw nih,
Sietna ei chungah tlung naw nih;
Tràm le kawlhnâm tuor nawng ei tih.
13 Zawlneihai chu thli ang chauh,
Anniah thu a um nawh;
An thil hrilhai po po chu,
Anni chungah tla vong raw se”
Tiin an hril hlak a ni kha.
14 Chuleiin, LALPA, Iengkim Pathien chun hieng hin a hril:
“Chuonga an hril hlak leiin,
Ka thuhai hi i băuah,
Meiah inchangtir ka ta,
Meia raw hmang vong dingin,
Hieng mihai hi thinghèrah,
Inchangtir vong tawl ka tih.
15 Aw, Israel sungkuohai,
Nangni beitu ding cheuin,
Hnam dang daih hung thruoi ka tih.
Hnam upa le hnam tlo tak el,
An trong khom i hriet ngai lo,
An hril khom i man phak lo,
Ka hung thruoi ding a ni si.
16 An thal bawm chu thlăn inhong ang,
Râl hrât khawkhêng vong an nih.
17 I lo tharsuok fa ram an ta,
I naupa le naunuhai dol an tih.
I beram ruol le bawng ruolhai,
I grep ra le theichang rahai,
Anni chun fa zo an ta,
Kul khuo i ringsanhai chu,
Kawlhnâmin suksieng an tih.
18 “‘Chuong nia hai khom chun sukchimit nawng ka ti cheu’ ti hi LALPA thu suok chu a nih. 19 Mihaiin, ‘Ieng dinga LALPA ei Pathienin hieng thil hi ei chungah a thaw el am a na?’ an ti huna chun, ‘In mi’n phatsan a, in rama ngei ram dang pathien in biek angin, tu hin mi ramah ram dang mihai rong la bawl in tih’ tia a lo hril lei a nih, tiin la hril an tih.
Fimkhur dinga hrilna
20 Jakob sungkuohai kuoma le,
Judai ramah hi hi hril dar rawh:
21 Mi invêt le chawlolhai,
Mit nei sia hmu thei si lo,
Na nei sia hre thei si lohai,
Hi thu hi lo ngaithla ro:
22 In mi tri ding an naw maw?
Ka hmaah in inthin naw maw?
Tuipui ramri dinga trieupho,
Kumkhuoa a kàn lo ding,
Ri khampektu chu kei ka nih.
Tuipui fawn invor sien khom,
A kuong a liem chuong naw a,
Inri hum hum sienla khom,
A ramri a pèl ngai nawh.
23 Sienkhom hienghai lungril hi,
A lululin a hel a,
An tukhnungkhur mi’n nghatin,
An mi’n phatsan tah a nih.
24 An lungril suongtuonaah,
‘Ruo hmasa le ruo nuhnung,
A hun taka hung tirtu,
Bu sik hun mi ruotpektu,
LALPA ei Pathien ngei chu,
Ei tri ding a nih’ tiin
An ngaituo ngai hrim hrim nawh.
25 In bawsietnahai leiin,
Hieng thil hi in chăn hlak a,
In suolna leiin thil thra,
In chang naw phă hlak a nih.
26 Ka mipuihai laia hin,
Mi rilo ruol an um a,
Vate vĕtu ang elin,
Mihai an inchăn rŭk a,
Châng kamin mi an ăwk a.
27 Vatea sip bâwm angin,
An in inhlĕmna’n a sip a,
An hung hausa tuol tuol a,
Thil an thaw thei deu deu bok.
28 An thău a, an hung năm a.
Thil thra naw thawna tiengah,
Chin tawk hrim hrim an nei nawh.
Fahrahai chan thratna ding,
An hrilpek nuom ngai naw a,
Pasiehai an tran ngai nawh.
29 Hi lei hin hrem tawl loin,
Ka ngaizam el ding a ni?
Chuong ang hnamhai chunga chun,
Phuba ka lak naw ding maw?”
Ti hi LALPA thu suok a nih.
30 Thil râpthlăk le pangzatum,
Hi rama hin a tlung a:
31 Zawlneihan khêl an hril a,
Thiempuhan an thu hmangin,
An nuom dàn dánin an rĕl a,
Chuong ang zawnga khawsak chu,
Ka mipuiha’n an lawm si.
A tawp iem ni ta’ng a ta?