Sim dinga fielna
4
1 “Aw Israel, i lamlet ding chun,Keima tieng hin hung kir rawh”
Ti hi LALPA thu suok a nih.
“I milim tirdakumhai chu,
Ka hmu loah sie hmang a,
I pêt hmang ta naw ding chun,
2 Thudik lampui chu hraw a,
Indik tak le fel taka,
Nun hmang dinga i’n tiem chun,
Kei hring zing LALPA hmingin,
Hnamhai chu malsawm ka ta,
Annin mi chawimawi an tih.”
3 Judai rama mihai le Jerusalem mihai kuomah LALPA chun hieng hin a hril:
“In hnuoihai inlet unla,
Hling lai thlai chi thlâk naw ro.
4 Nangni Juda mihai le
Jerusalema chenghai,
LALPA-ah ser tan unla,
In lungril ser chu tan ro.
In tan nuom naw a ni chun,
Ka lungsenna chok a ta,
Kàng hmât tawl rawi a ti chêu,
Tu khom threl ruol ni naw nih.
Rûntu hung ding thu
5 “Judai ramah hril unla,
Jerusalemah puong ro:
Ram pumah tawtawrawt mûtin,
‘Inrêngin hung tlàn khawm unla,
Kul nei khuoah tlàn lŭt ei tiu’,
Tiin inring takin khêk ro.
6 Zion tieng pan dingin hril ro,
Himna hmun zongin tlân ro!
Hmar tienga inthokin sietna,
Ka hung intlungtir ding a nih,
Sietna râpthlâk tak el chu.”
7 A buzawla inthokin,
Sakeibaknei a hung suok,
Hnamhai suksetu ding chu;
A tombŭk a suoksan tah,
In ram sukram vong dingin.
In khuohai tlu ram a ta,
Hluotu tu khom nei naw nih.
8 Chuleiin, saiip silin,
Trap le inrûmin khêk ro.
LALPA lungsenna râpthlak chun,
Ami la’n kiengsan si naw a.
9 Lal le hotuhai lungril chu,
Chu ni chun zâm hleng a ta,
Thiempuhai thlabâr an ta,
Zawlneihai pang inzâng a tih,
Tiin LALPA chun a hril.
10 Kei chun, “LALPA Pathien,
Jerusalema chenghai hi,
I hlĕm letdĕr a ni chu tie!
‘Muongna um a tih’ i ta,
Hlak chu kan rǐng le kawlhnâm,
A lo inmat zing si’ ka ti a.
Rûntu an hung hnai
11 Chu pha chun hieng mihai le Jerusalem mihai kuomah, “Thlalĕr tlang fila inthokin ka mihai tieng thli lum tak hung hrâng a ta, sienkhom ka mihai zâp fai ding le mut fai dinga hrâng a ni nawh. 12 Thli na tak chu keimaa inthokin hung a tih. Tuhin an chungthu hi keiin rêl ka tih” ti thu inhriettir ning an tih.
13 Ngai ta, sûmpui angin a hung a,
A tawlailirhai khom chu,
Thrawngaleivir ang a na,
A sakor thruoihai khom chu,
Mupui vuong nêkin an hrăt lem.
Ei chung a va hang pik de aw!
Ei se let dĕr an ta hi!
14 Aw, nang Jerusalem,
Sandam i ni theina dingin,
I lungril suol sawp fai rawh.
Ieng chen am lungril rilo,
I la put pei ding a na?
15 Dan le Efraim tlangramah,
I siet tuok ding an puong tah.
16 I vêla hnamhai hril la,
Jerusalemah puong rawh:
‘Ram hla taka inthokin,
Mi’n huoltu ding an hung a,
Judai ram khuo po poah,
Indona thu an puong a,
17 Lo vengtuhai ang elin,
Jerusalem an inhuol khum,
“Ka laka an hel lei a nih”
Tiin LALPA chun a hril.
18 I nungchang le thilthawin,
Hieng thilhai hi i chungah,
A hung intlungtir a ni hi.
Hi hi i hremna tuor chu a na,
Nâ khom i ti êm êm a,
I lung a sun tlang a ni hih.
A mihai ta dinga Jeremia lungngaina
19 Aw a na ngei, aw a na ngei!
Na ti taluoin ka’n kon a.
Aw, ka lung a va hang na de!
Ka lung an inthumhron a,
Ka’n rŭm naw thei naw a nih.
Tawtawrawt ri chu ka hriet,
Indo râlkhêl rihai chu.
20 Sietna chungah sietna a tlung,
A ram pumin a tlu hmât a,
Ka chĕngna puon in ngei khom,
Thawk-le-khatin a tlu ram tah.
21 Ieng chen am indo hi hmuin,
Tawtawrawt ri ka ngaithlak ding?
22 “Ka mihai an invĕt zo a,
Tu am ka nih an mi hriet nawh;
Naupang invĕt ang an na,
Hriet thiemna an nei tlat nawh.
Thil suol thaw an thiem hle a,
Thil thra thaw an thiem si nawh.”
Sietna rûnpui tlung ding
23 Leihnuoi hi ka zuk en a,
Ruongâm bo le ruok a na,
Vanah var hrim a um nawh.
24 Tlânghai ka hei thlir vel a,
An inthin dur dur el a,
Muolhai chu an inthĕn a.
25 Ka ngha vêl a, mi an um nawh,
Chungleng vate po po khom,
An vuong hmang zo vong ta si.
26 Ka hang ngha vĕl a, ngai ta,
Lo hmun thrahai po po chu,
Thlalĕr an inchang vong a,
LALPA lungsenna hmaah,
Khuohai an tlu ram vong si.
27 LALPA chun hieng hin a tih:
“A ram pumin sieng a ta,
Sien khom sukram vong naw ning.
28 Chuleiin, hnuoi ngûi a ta,
Van khom inthim khup a tih;
Ka hril tah chu sût naw ning,
Ka rĕl tah chu hlen ka tih.
29 Sakor chungchuong mihai le
Thalngul chawituhai ri hrie’n,
Khaw tina mi tlân sieng an tih.
A thren ram hnuoiah tlân lutin,
A thren lungpui chungah kai an ta,
Khuohai rausan vong an ta,
Hluotu tu khom um ta naw nih.
30 Aw, nang mî roka um nu,
Ieng am a na i thaw kha?
Puon senlâra inthuomin,
Rangkachak incheinahai,
Ieng leia i’n bel am a na?
Ieng leia i mit dam kha,
I năl dum vĕl am a na?
Inchei a trangkai ta nawh.
I tlangvalhan an hnawl ta che,
I hringna a nih lak an tum.
31 Nau lutir hring ding nuhmei,
Nau hase tuor inrûm anga,
Thuok sama ka âwk ăwk a,
Zion naunu inrŭm ri ka hriet;
A bânhai chu phar vèlin,
“Ka chung a va pik de aw!
Tuolthattu kutah ka nun,
Pĕkin a um ta si a”
Tia a khĕk lai ri chu.