Israel ringum nawzie
3
1 “Miin a nuhmei mak sien,Suokin pasal dang nei sien,
A nuhmei chu a ko nawk ding?
Ram a sukporché vong naw ding?
Nang ruok chu nawchizor angin,
Ngaizawng i kop rawn ĕm êm a,
Ka kuomah i kir nawk ding maw?”
Ti hi LALPA thu suok a nih.
2 Tlang kol lul tieng khi thlir la,
An zalpui nawna che hmun hrim,
Khaw lai am a um rêng rèng a?
Thlalĕra chêng Arab mi angin,
Zălpui ding nghâkin lam sìrah,
I thrung ngat ngat hlak a ni kha.
I hurna le ritlonain,
Ram i sukporchè zo ta hi.
3 Chu lei chun ruo a sûr naw a,
Thrâl ruo hrim khom a sur naw hi.
Chuong sà chun hmai suksàin,
Zakmaw nawchizor ang elin,
Inzak hmêl hrim i put naw hih.
4 Tu el khom khan mi hung koin,
“Ka naupang laia inthoka,
Mi hmangaitu ka Pa i nih;
5 I lung i suksen zing ding maw?
Kumkhuoin a sen el ding maw”
Tiin i hung trong a ni kha!
Sienkhom a suol theipatawpin,
Suol i la thaw zom zing tho si”
Israel le Juda an sim a trŭlzie
6 Lal Josia inlal laiin LALPAN ka kuomah, “Hnung tol hmang Israel thilthaw kha i hmu am? Tlang sâng tinah fein, thing buk tin zăr hnuoiah a uire a. 7 Hieng ang thil a thaw hnung hin ka kuom tieng hung kir nawk naw ni’m ka lo ti a, sienkhom a hung kir chuong naw a, a zuorpuinu mi ringum lo Juda khomin a hmu a. 8 Hnung tol hmang Israel chu măkna lekha ka pêk a, a uiretna zozai lei chun ka tir hmang a. Chu chu a zuorpuinu mi ringum lo Juda chun a hmu zing sa khomin a mi trì chuong naw a, a fe suok a, a va uire ve a. 9 Ieng khom poisa loa nawchi a zor leiin a ram chu a sukporche zo a, thing le lung bul bein a uire a nih. 10 Chuong sa khom chun a zuorpuinu Juda chu ringum loin a um a, a lungril taka thaw loin ka kuom tieng a hung kìr tehlèm a” tiin LALPA chun a hril. 11 LALPA chun ka kuomah, “Mi ringum lo Israel chu a zuorpuinu mi hlem hmang Juda nêk chun fel lemah a’n ngai a nih. 12 Hi thu hi hmar tieng va puong dar ro:
‘Mi ringum lo nang Israel,
Hung kìr rawh, LALPAN a tih;
Mel rum ta naw ning chengah,
Zangai thei tak ka ni si a,
Lungsen kumkhuo naw ningah’
Ti hi LALPA thu suok a nih.
13 LALPA i Pathien helsanin,
Thing buk zâr tin hnuoia hai,
Ram dang pathienhai lakah,
Indawin i’n phalrài a,
Ka thu hril i zawm nuom nawh,
Ti hi pomin inpuong rawh”
Ti hi LALPA thu suok a nih.
14 “Nangni ringum nawhai, hung kir ta ro” ti hi LALPA thu suok a nih. “Kei hi in pasal ka na, a thlangtu cheu ka nih. Nangni laia mi khawpuia mi pakhat le sungkuoa inthokin mi pahnih ka thlang ding cheu a na, Zion-ah thruoi ka ti cheu. 15 Ka lung tuok mi berampuhai peng ka ti cheu a, anni chun hrietna le hriet thiemnain keithruoi an ti cheu. 16 Chu huna nasa taka mi in hung pung pha chun, ‘LALPA thuthlung bawm’ in kol lai hun kha ngai ta nawng in ta, hre fu ta bok nawng in ta, Thuthlung Bawm siem nawk ngai ta bok naw nih. 17 Chu pha chun Jerusalem chu ‘LALPA Lalthrungpha’ ti hung ni tang a ta, hnam tinhai chu LALPA hming chawimawi dingin Jerusalemah hung an tih. An lungril suol le lululna chu put zing ta naw ni hai. 18 Chu nia chun Juda sungkuohai le Israel sungkuohai chu infin an ta, in thlatuhai hluo dinga ka rochung rama chun hmar tienga inthokin hung tlăng an tih.
Pathien mihai milim biek thu
19 “Keima ngeiin hieng hin ka hril kha:
‘Ka nauhai anga en a,
Ram ditum tak chu pe a,
Hnam tu khom hluo nêka mawi,
Ram thra inrochungtir cheu a,
Kei hi ma loa mi zui a,
‘Pa’ tia in mi ko hi,
Ka lo beisei hlak a na.
20 Sienkhom, nuhmei ringum lo,
Pasal uirèsantu angin,
Aw, Israel sungkuohai,
In mi uiretsan si a”
Ti hi LALPA thu suok a nih.
21 Tlang kol vula inthoka,
Israelhaiin thil ngĕna
An trap khĕk ri ka hriet a,
LALPA an Pathien theinghilin,
Lam naw tieng an pĕt ta si.
22 “Nangni mi ringum lohai,
Ka kuom tieng hung kir ta ro;
In hnung tolna lungril chu,
Keiin lo sukdam ka tih.”
“Ni e, hung kir ngei kan tih,
Kan LALPA, Pathien i nih.
23 Muol le tlanga inthoka,
So nuoia milim kan biek hi,
Inhlèmna vong a lo nih;
Nang chu LALPA kan Pathien,
Israelhai sandamna,
I lo ni takzet si a.
24 Kan tleirawl lai a’nthok khan,
Kan thlatuhai inrim ra,
Beram ruol le bawng ruolhai,
An naunu le naupa chenin,
Inzakna hre phâk dĕr lo,
Milim biekna mei meiah,
Kan lo insĕng ral hlak si a.
25 Ei muolphona chu silin,
Inzak takin zâl ei tiu.
LALPA ei Pathien chungah,
Eini le ei thlatuhan,
Thil suol ei thaw hlak si a;
Ei tleirawla inthoka,
Voisun hunhai chen khomin,
LALPA ei Pathien thu chu,
Ei zawm nuom si nawh” in tih.